LUKA 22
22
Na katoha renia o Jesu
(Mt 26.1-5; Mk 14.1-2; Jn 11.45-53)
1Ga hagarangi me noga na Tangiani Raha, ga ngaua igê na bereti, i pe ahunga. Na atani na Tangiani Raha ngegana ka na Paseka. 2Na mane ni vogasiha ga teha ma na mane ni hagesuringa ni Rotu ka garia na tarana ta kani vi ga nanahuia o Jesu renia; suria ngaira ka magutenira na enoni.
O Juta ki agana ki hagavuringenia o Jesu
(Mt 26.14-16; Mk 14.10-11)
3Ma Satana ki angaria o Juta Isikariote. Ngaira ki na hitangita na tangahuru matarerua na kariana o Jesu. 4Vikana ngaia o Juta ki râ ma ki meratamasi na mane ni vogasiha ga teha ma na araha iata na mane ni me, ga bâsuria na Ruma ni Rotu, hanana vi manga i he ki girara, vi mahatangenia o Jesu tangara. 5Ngaira ki koro na obata renia, ma ka vi, ge vuria. 6O Juta ki agana henira, ma ki haganega ki garia na matena, i koro tanga, hanana vi mahatangenia igê o Jesu tangara, hanana vi siana na enoni ke girara.
O Jesu ki hagagara na ngêra na Paseka
(Mt 26.17-25; Mk 14.12-21; Jn 13.21-30)
7Surigi na Tangiani Raha, ga ngaugi igê na bereti, i pe ahunga, ki ata me na tangiana, vi ga nanahuira igê na kareta na sipi. 8O Jesu ki hagatorangenirerua o Petero mo Joane, ma ki vi tangarerua, ki vi: “Muru arâ ma kamuru hagarêa na ngêra na Paseka tangagia, ka ngaua.” 9Ngairerua karu hagatea, karu vi: “I he kanigo obanigamirua, vi gamuru hagarêa igê?”
10Ngaia ki vi: “Muru rongo! Matena muru bêbanu vê i hinua raha, ta na mane, i torea na pi na ve, ki page arâ me vurusigamurua. Muru bêbanu suria i ruma, i bêbanu igê. 11Ma kamuru vi tanga na avanuna na ruma, kamuru vivi, ‘Na Araha ki hagatego, vi i he na kiboru tangagami, na kariaku minê, hanana mi page ngêa igê na ngêra na Paseka?’ 12Ngaia ki page hagabâsigamurua renia na kiboru raha i haha. Na ara ni marâ, muru obanigi, ka bani nanê igê, ma i ngekana kamuru hagarêgi na ara ni marâ.” 13Ngairerua karu râ, ma karu tarahugi na ara ni marâ, i bani visigi o Jesu tangarerua. Ma ngairerua karu hagarêa igê na ngêra na Paseka.
Na ngêra mora iana na Araha
(Mt 26.26-30; Mk 14.22-26; 1Kor 11.23-25)
14Na matena ni ngêra o Jesu ma na kariana ka oga so, hanana vi ga ngêngê. 15Ma ngaia ki vi tangara, ki vi: “Inê kê obania bâraha vi ve ngêa na ngêra na Paseka ikê henigamu hagenago, ma kê kahu hatamia na mamasiaganiha raha. 16Be vi tangagamu: i asa, vi ve page ngêa nikâ, mataro me ki mataha igê na morana na girarana, na matena God i araha igê.”
17Mo Jesu ki têa na kâkâ, ki visia raha God, ma ki vi: “Mu têa ma kamu tono, igamu hato. 18Renia ve vi tangagamu: i asa iaku, vi ve tono nikâ na vaini ikê, haganega tenia i ngekê, mataro me ki arâ me na Arahanga iana God.”
19Ma ngaia ki têa na bereti, ma ki visia raha God, ki pipia, ma ki vutungira, ki vi: “Ikê na apeku, [gê tagarenia renigamu. Mu tanua na tarana ngekê, hanana mu takusiê igê.” 20I tagenana ma, matena ga ngê hato, ngaia ki vatea na kâkâ tangara, ma ki vi: “Na kâkâ ikê ki na suruheri haoru iana God. Na gapuku, gê ringia renigamu, hanana i hagagatagatania na suruheri ngekê.] 21“Ma kamu bâ! O vani, i hagavuringeniê, ki meêbêrihu! 22Renia o Karena Enoni ki page meme suria na katoha iana God. Ma ki era ngavê tanga na mane ngekana, i hagavuringenia!” 23Ma ngaira ka haganega ka hehagateri, vi o ti na hitangita, kani page katokato vikana.
Na hagesuringa iana o Jesu renia vi ti kani teha
24Na kariana o Jesu ka hemangari renia vi o ti na hitangita kani araha i berarogata. 25O Jesu ki vi tangara, ki vi: “Na araha i maveta ikê ka marungira ma ka ramonira na kariata, ma na maneraha ka obanira na enoni, vi ge visira, vi ga koro. 26Ma na tarana ngekê ki pe ararigamu, vi gamu tanua. Ma ki tuguhia na enoni raha i pasimi, ki manga hete na enoni purua. Ma ki tuguhia na enoni, i araha, ki manga hete na enoni tagara. 27O ti kani teha, na enoni, i oga so ma tanga i ngêngê, se na enoni, i totora me na ngêra? Ngaia nga ka na ani i oga so ma tanga i ngêngê. Ma i berarogami inê nga kanigê manga na enoni, i totora me na ngêra.
28“Ma igamu nga ngana ani, mu bani oga heniê igê na ara ni mamasiaganiha iaku. 29Ma ki tagenana ma o Vaemaku ki hagêguriê, kê araha, inê nogaku be hagêgurigamu, kamu araha. 30Igamu kamu page meêbêrihu, matena inê kê araha. Ma igamu kamu page gâga so igê na atohata na maneraha, hanana mu surira na varo ninuni tangahuru matarerua iana o Isiraele.
O Jesu ki vi, vi o Petero ki page hagaiga pusia marena
(Mt 26.31-35; Mk 14.27-31; Jn 13.26-38)
31“Simone, Simone! Bâ, Satana ki nungia God, ki hagamarumungenia, ki uhungigamu hato, manga na mane, i haata na raisi. Ma God ki hagamarumungenia. 32Ma inê kê bani nungia God tangago, Simone, hanana go ramoramo igê na tongesuriha. Ma na matena go ahariê aporo, ki tuguhigo, go hagaramonira na tamamu.” 33O Petero ki arami, ki vi: “Araha, inê kê nanê, hanana vi gê arâ henigo igê na ruma ni hagaitangiha, ma kê meme henigo!”
34O Jesu ki arami, ki vi: “Petero, be vi tangago: i rikini akê matena na kua mane ki mamênga, vi ge angiangi ma igo ko bani hagaiga hageoru, vi igo ko pe girarê.”
Na kato ma na anga ma na tatapa borahu
35Ma o Jesu ki vi tangara, ki vi: “I nago matena gê hagatorangenigamu ma igamu kamu pe migirâ na kato ma na anga se na buti, ta na marâ ki marehasigamu vari?” Ngaira ka arami, ka vi: “Mareha!”
36O Jesu ki vi: “Ma i ngekê, manga vi na enoni, ma ki nahunia na kato se na anga, ngaia ki koro ma, i migirâ. Ma ki manga vi na enoni, ma ki pe nahunia na tatapa borahu, i koro, ki hagavuringenia na tuguni iana ma ki vuria na tatapa. 37Suria inê kê vi tangagamu vikê, kê vi: na segesegeha apuna ki vi, ‘Na enoni ka takusia, vi ngaia ki na enoni era.’ Ma ki tuguhia, i voravora me monari tangê na tamasinga ngekana. Suria na marâ, ga bani segegi reniê inê, ka page voravora me monari.” 38Na kariana ka vi: “Bâ, Araha, na tatapa borahu gi rua ikê!” Ngaia ki arami, ki vi: “E, nakarerua vê ma!”
O Jesu ki nunginungi i Mu ni Olive
(Mt 26.36-46; Mk 14.32-42)
39O Jesu ki hura vê, ma ki râ igê na Hungana ni Olive, manga bani hanana i arâ tare, ma na kariana ka râ henia. 40Matena ga ata me i ngekana, ngaia ki vi tangara, ki vi: “Mu nunginungi, hanana mu ramoramo pusia na heuhungiha.” 41Ma ngaia ki ura râ panira tanga na agua, na ararina na agua na mane i girara i arihatenia na hê, ki mataro râ igê. Ma ngaia ki susure, ma ki nunginungi. 42Ngaia ki vi: “Vaemaku, manga go obania, ma ko torea vê paniê na kâkâ na mamasiaganiha ikê. Ma ki koro ma, igo ma.” 43[Ma tenia na vavearo na angelo ki vora me tanga ma ki hagaramonia. 44Ngaia ki hataera ngavê, ma ngaia ki amani nunginungi nga. Na mavaruna ka manga na êsusu na gapu, ga susu so i ano.]
45Hato na nungiha iana, ma ngaia ki aharaga ma ki aporo i pasita na kariana, ma ki bâsira ga mêru, renia i rugu bâraha na obata. 46Ma ngaia ki vi tangara, ki vi: “Hega mu mêru? Mu aharaga, ma kamu nunginungi, hanana mu ramoramo pusia na heuhungiha.”
Ga hagatotongoa o Jesu
(Mt 26.47-56; Mk 14.43-50; Jn 18.3-11)
47Na mane ni me ka ata me, matena i tamasi mênga. O Juta, na hitangita na tangahuru matarerua na kariana o Jesu, kani bêngenira. Ngaia ki oto me i pasina o Jesu, hanana vi nunugua. 48Ma o Jesu ki vi: “Juta, igo ko hagavuringenia vari o Karena Enoni renia na nunuguha?” 49Matena na kariana o Jesu, ga oga henia, ka bâsia na tarana ngekana, ngaira ka vi: “Araha, i araria, mi meraheariha renigi na tatapa borahu?” 50Ma ta na hitangita ki tapia na kare vurivuri iana na mane ni vogasiha i teha, ma ki retea râ na karingana i otona. 51Mo Jesu ki arami, ki vi: “Siana! Naka vê! Ngaia ki hataria na karingana na mane ma ki hagenani aporo.
52Ma hemuri o Jesu ki vi tangara na mane ni vogasiha ga teha ma na araha iata na mene ni me, ga bâsuria na Ruma ni Rotu, ma tangara na meraha, ga râ me i ngekana, hanana vi ga hagatotongoa, ki vi: “Tanu hega kanimu migirâ me na tatapa borahu ma na bêata? Na manero vari kani inê? 53I na ara ni tangiani inê kê gâga henigamu i Ruma ni Rotu, ma igamu kamu pe bani hagatotongoê. Ma i ngekê ki na matena iami, ma na matena iana na araha ni mengo.”
O Petero ki hagaiga pusia marena renia o Jesu
(Mt 26.57-58, 69-75; Mk 14.53-54, 66-72; Jn 18.12-18, 25-27)
54Ngaira ka hagatotongoa o Jesu, ma ka torea vê, ka me banu i ruma iana na mane ni vogasiha i teha. Mo Petero ki mumurira me hagatê. 55Ga bani tanga na gi i beraro i ruma, mo Petero ki oga so henira na enoni, i rangira na gi. 56Ma ta na kere gete tagara ki bâsia o Petero, matena i oga so i ngekana, ki rangia na gi. Ngaia ki boretenia, ma ki vi: “Ngaia nikâ kani oga henia!” 57Mo Petero ki hagaiga, ki vi: “Se kego, inê kê pe hagarea ngavê!”
58I na kere matena i muri ta na mane ki bâsia nogana, ma ki vi: “Igo nikâ ka na hitangita!” Mo Petero ki arami, ki vi: “Se vego, inê ki mareha!”
59I rârâ, ma ta na mane nikâ ki hingia bâraha, ki vi: “Monari era, o va ani ikê kani oga henia, suria ngaia nikâ ki na mane i Galilea!” 60Ma o Petero ki arami, ki vi: “Se vego, inê kê pe hagarea na marâ, go visia!”
Matena i tamasi mênga vikana, ki parama, ma ki angi na kua mane. 61Na Araha ki ahoro râ ma ki boretenia o Petero, mo Petero ki takusigi aporo na tamasinga iana na Araha, i bani tamasigi, ki vi: “Hageoru igo ko page vivi, vi igo ko pe hagareê, ma hemuri ki page angiangi na kua mane i rikini akê.” 62Mo Petero ki hura vê ma ki angi bâraha ngavê.
Na mane ni me ka memarabe ma ka tahurua o Jesu
(Mt 26.67-68; Mk 14.65)
63Na mane ni me, ga bâsuria o Jesu, ka memarabe ma ka tahurua. 64Ngaira ka bara na maana, ma ka hagatea, ka vi: “O ti kani tahurugo? Mêsigo ma ko girara!” 65Ma ngaira ka tamasi erasia, ma ka guharia bâraha.
O Jesu i maata na Kaunselo na Siu
(Mt 26.59-66; Mk 14.55-64; Jn 18.19-24)
66Matena i tangi me, na meraha i pasita na Siu, na mane ni hagesuringa ni Rotu ma na mane ni vogasiha ga teha ka haku me, ma na mane ni me ka merâ me o Jesu tangara. 67Ngaira ka vi: “Gu visia me, na Mesaia vari kani go, se mareha?” O Jesu ki arami, ki vi: “Manga ve visia vê, igamu ki asa vigamu tongesuriê. 68Ma manga ve hagategamu, igamu ki asa vigamu, mu aramiê. 69Ma tenia i ngekê o Karena Enoni ki page gâga so henia God raramohaga hunia igê na atohana.”
70Ngaira hato ka vi: “Hoi, o Karena God vari kanigo?” Ngaia ki aramira, ki vi: “Mu vi gamu vi inê, inê nga!” 71Ma ngaira ka vi: “Igia ka pe obania ta na enoni, vi ge tamasi renia! Igia mareka ka bani rongogi na tamasinga iana marena!”
Currently Selected:
LUKA 22: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
