LUKA 21
21
Na votovoto iana na gete na nâ
(Mk 12.41-44)
1O Jesu ki bâ rârâ ma ki bâsira na mane ruruguha, ga kasikasi haga i rarona na bokesi ni haga tanga na Ruma ni Rotu. 2Ma nikâ ngaia ki bâsia ta na gete, i nâ ma ki matareha ngavê, ma ki kasirerua na senti gi rua i rarona na bokesi. 3Ma ngaia ki vi: “Be vi tangagamu: na gete na nâ matareha ikê ki kasi nga i rarona na bokesi na haga, i raha teharigi na haga ga kasi na enoni hato getera. 4Renia na enoni getera ka kasi na ani ga hita na haga, na haga ga pe obanigi tangara so mareta. Ma ke bâsia na nâ ikê. Ngaia ki matareha ngavê, ma ngaia ki kasi hato ngavê na haga, hanana vi ngêngê renigi.”
O Jesu ki tamasi renia na hagaerasiana na Ruma ni Rotu
(Mt 24.1-2; Mk 13.1-2)
5Tani na hitangita ka tamasi renia na Ruma ni Rotu, ka vi: “E, na ruma ki bâkoro era renigi na hê bâkoro ma renigi na votovoto, na enoni ga tagarenigi tanga God.” Ma o Jesu ki vi: 6“Mu bâsigi na marâ hato ngegana. I page arâ me na matena, i asa vê tani na hê, vi ge oga gatagata igê na peregana. Ngaigi hato ki page agorata so i ano.”
Na bagabevoana ma na henahuita
(Mt 24.3-14; Mk 13.3-13)
7Ngaira ka hagatea, ka vi: “Araha, i na keta ki page voravora me igê na tarana ngekana? Ma na ta ki na girarana, hanana mi girara na matena, i page voravora me igê na marâ ngekê?”
8O Jesu ki vi: “Mu bâsigamu! Siana ta na enoni ki hagabekasigamu! Renia rako na mane ka page arâ me, ma ka vivi, vi ngaira kani inê, ka vivi, ‘Inê kani ngaia!’ Ma ka vi nikâ, ‘Nga na matena ngekê!’ Ma siana kamu arâ surira. 9Siana kamu magu, matena mu rongogi na henahuita, na ani ga hagarangi ma na ani ga hagatê. Na marâ ngegana ka page hagenago me, ma ka mareha, vi ge vi, vi na hagahatungina ki hagarangi me noga.”
10Ma ngaia ki vi nikâ: “Na marê ka page hemeronge heri. Na gavumane ka page heariha heri. 11Ma igê na ara ni agua ka page voravora me na nunu raha, ma na magêha, ma na mera. Ma ka page voravora me na marâ, ga hagamagusira na enoni, ma na girarani raha i vavearo.
12“Ma i nago tarani ga voravora me na marâ ngegana, ka page rakugamu, ma ka page merongasigamu, ma ka page hagatamasigamu i na ruma ni sukuru, ma ka page toregamu reniê inê i maata na maneraha ma na gavumane. 13I ngekê ki na matena koro tangagamu, mu tarohenia igê na Taroha Koro. 14Mu garigari takoha i nago tarani na marâ ngegana, ma kamu vi, vigamu kamu pe hataera i obami, vi gamu teharira igê na tamasinga iami. 15Renia inê nga kanigê page vategamu na tamasinga ma na takoha mataha, ma ki asa ta na merongami, vi ge tamasi pusigi, se vige hagaigagi na tamasinga iami. 16Na enami, ma na goami, ma na kariami, ma na tamami ka page mahatangenigamu, ma ka page hagamesira na hitangimi. 17Na ara ni enoni ka page kitenigamu reniê inê. 18Ma ki asa hagetage ta na marâ, vi ge erasigamu. 19Mu nganganihaga, suria igê na tarana ngekana igamu kamu page tahitahi.
O Jesu ki tamasi renia na hagaerasiana Jerusaleme
(Mt 24.15-21; Mk 13.14-19)
20“Bevoana mu bâsira na mane ni me ga rihia Jerusaleme, mu page girara, vi ngaira ka sugi hagasuhia. 21Ma i na matena ngekana, na enoni, ga oga i Jutea, ki ararira ga gavagava tange na hungani. I koro, na enoni, ga goga i hinua raha, ka pania, ma na enoni, ga oga i bemu, siana ka bêbanu i hinua raha. 22Renia na tangiani ngegana ki na ‘Tangiani ni Hagaitangiha’, ma ka hagamonarigi igê na ara ni marâ, na Buka Apuna i bani visigi. 23Na tangiani ngegana ka page aera ngavê tangara na gete, ga obara, ma tangara na gete, ga hagasusu kare. Na bagabevoana, i era ngavê, ki page tarahua na agua ngekê, ma God ki page hagaitangira na enoni ngegê. 24Ngaira ka page nahuira ka meme renigi na tatapa borahu, ka page rakura ma ka page torera tangagi na agua hato getigi, ma na enoni ahuroto ka page hagaerasia ngavê i Jerusaleme, ma ka page nahunia, mataro me ki hatohato na matena, vi ge nahunia vikana igê.
Na râha me iana o Karena Enoni
(Mt 24.29-31; Mk 13.24-27)
25“Na girarani ka page voravora me igê na arito ma na hageha ma na higu. Ma na enoni i maveta ka page anumanuma bâraha renigi na bagabevoani, ma ka page magutenia na asi, renia i rongo raha ma ki maguhiguhi raha. 26Na enoni ka page bubununuga, matena ga naasia na eraha, i tarahua na maveta hagenani. Ma na marâ i vavearo ka page hagatasigi na tarata. 27Ma hemuri o Karena Enoni ki page voravora me, i arâ me igê na vaha. Ngaia ki raramohaga hunia, ma ki bâbâ hahaneaga teha. 28Matena ga haganega ka voravora me na tarani ngegana, mu aharaga ma kamu bâbâ rikiriki, suria na tahingami ki hagarangi me noga.”
Na maramaraveta renia na apinige na fiki
(Mt 24.32-35; Mk 13.28-31)
29Mo Jesu ki tamasi maramaraveta vikê tangara, ki vi: “Mu bâsia na apinige na fiki ma na ara ni apinige getigi. 30Bevoana mu bâsia na hagahisi, igamu kami girara, vi hagarangi me noga na matena na hutohutoêa. 31I tagenana ma, na matena mu bâsigi na tarani ngegana, ga voravora me, igamu kamu page girara, vi God ki sugi râ me, ke marungira na enoni.
32“Mu rongo! Na ara ni tarani ngegana ka page voravora me togâta na enoni, ga gâga i na matena i ngekê. 33Na vavearo ma na ano karu page hato, nga ma na tamasinga iaku ki asa, vi ge page hato.
34“Mu bâsigamu! Siana kamu aruma bâraha surigi na magotoha ma ki ruguhigamu na tonoha, ma na takoha raha renia na mauriha na apemi. Manga i mareha, ki parapara ma vari, ma ki tarahugamu na Tangiana ni Hagaitangiha. 35Renia ngaia ki manga na etu, i tura na enoni hato i maveta hagenani. 36Mu bâbâ, ma kamu nunginungi tare, hanana mu ramoramo, kamu tahitahi tenigi na ara ni marâ, ga page voravora me ngegana, ma kamu rêra i maana o Karena Enoni.”
37I na bevoana ngekana surigi na tangiani o Jesu ki hagesurira igê na enoni i Ruma ni Rotu, ma na matena i susu na arito, ngaia ki huhura, ma surigi na bungiani ngaia ki gâga igê na Hungana ni Olive. 38Igê na mahogotani na ara ni enoni ka arâ i Ruma ni Rotu, hanana vi ga karinga.
Currently Selected:
LUKA 21: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific