JOSUA 6
6
Na Isiraelita ka henahuraua i Jeriko
1Na maani para na hinua i Jeriko ka purupuru tare ma na mane ni anumasiha ka anumasigi tenira na Isiraelita, hanana vi siana ka bêbanu igê. 2Na Araha ki vi tanga o Josua, ki vi: “Be tagarenia i Jeriko tangago henira na maneraha ma na mane ni me ramo hato igê. 3Igo ma na mane ni me iamu ki tuguhigamu, vigamu arâ rihuia na hinua hagetage i na ara ni tangiani surigi na tangiani ge ono. 4Na mane ni hagarahenga gi pi, ga tonganigi na ahuri, ki tuguhira, ga nanago tarana na bokesi na suruheri. Igê na pita na tangiana igo ma na mane ni me iamu ki tuguhigamu, mu arâ rihia na hinua hagepi, matena na mane ni hagarahenga ka uhigi na ahuri. 5Ngaira ki tuguhira ga okegenigi na ringeni tagenani. Matena mu rongogi, na mane hato ki tuguhira, viga ngerengere raha, ma na para ni hinua ka kahu guguru so, ma na mane ni me hato ka page banu ototo râ nga i hinua.”
6O Josua ki unira me na mane ni hagarahenga, ma ki vi tangara, ki vi: “Mu tugia na bokesi na suruheri ma na verepi na hitangimi ka nanago tarana henigi na ahuri iata.” 7Hoi, ngaia ki bonasira na mane ni me iana, ki vi: “Mu arâ rihuia na hinua. Tani na hitangimi ka nanago tarana na bokesi na suruheri iana na Araha, hanana ga anumasia.”
8-9Hoi, ngaira ka kato manga i bonasira o Josua. Na mane ni anumasiha ka nanago tarata na mane ni hagarahenga, ga uhigi na ahuri. Na mane ni hagarahenga ga tugia na bokesi na suruheri ka mumurira, ma na mane ni me ga hita râ ka mumurira me. Na ahuri ka angiangi suria na matena hagenani ngekana. 10O Josua ki hagapêpura na mane ni me iana, hanana vi siana ka ngerengere se viga tamasi, mataro me ki bonasira ka ngerengere. 11Vikana ngaia ki katora na kariana ngegana ka râ rihuia na hinua hagetage togo ma, matena ga merâ na bokesi na suruheri iana na Araha. Ma hemuri ngaira ka aporo ni mêruha igê na tênga.
12-13Ki tangi me ma o Josua ki bani rite hagahogo. Ngaia ki bonasira na mane ni hagarahenga ma na mane ni me iana ka kato nikâ vikana manga igê na tangiana i hato. Vikê na mane ni hagarahenga ka tugia nikâ na bokesi na suruheri. Ngaira hato ka râ rihia na hinua manga i nago: hagenago na mane ni anumasiha; na ruata me na mane ni hagarahenga gi pi, ga uhigi na ahuri, matena ga râ rihia na hinua; na oruta na mane ni hagarahenga ga tugia na bokesi na suruheri iana na Araha; ma na muritagana me ka na mane ni me ga hita râ. 14Igê na ruata na tangiana ngekana ngaira ka râ rihia na hinua hagetage togo ma, ma ka kahu aporo igê na tênga. Ngaira ka kato vikana surigi na tangiani ge ono.
15Igê na pita na tangiana, matena i tangi me, ngaira ka râ rihia hagepi na hinua manga bani hanana. Igê ma na tangiana ngekana ngaira ka râ rihia hagepi na hinua. 16Na pita ga râ rihia, matena na mane ni hagarahenga ka sugi uhigi na ahuri, o Josua ki bonasira na mane ni me iana, ka ngerengere raha. Ngaia ki vi: “Na Araha ki haganahunigia renia na hinua! 17Mu ruhuruhua nga na hinua hagenani. Mu mutera na enoni ma na togoha hato igê manga na vogasiha tanga na Araha. Siana kamu mutera ka Ragaba na êrâ ma ngaira hato i ruma iana, suria ngaia ki pinihirerua karu tahi na mane iaku garu râ bâbâ. 18Siana kamu toregi tangagamu maremi na hitangini na marâ, gê bonasigamu kamu ruhuruhugi, i era ma na bagabevoani ma na hagaitangiha ka tarahua na tênga iata na Isiraelita. 19Na ara ni siliva, na golo, na kapa, i higa na aiani ka na anina na Araha. Ngaigi ki apuna. Mu nakagi vê ma henigi na ruruguha i ruma ni ruruguha iana na Araha.”
20Hoita, na mane ni hagarahenga ka uhigi na ahuri iata. Matena na mane ni me ka rongogi, ngaira ka ngere ototo râ nga ma na para ni hinua ka kahu guguru. Na mane ni me hato ka tagere ototo râ nga igê na hungana, ka banu igê na hinua ma ka henahuraua. 21Ngaira ka ahurara ka me na enoni hato i hinua: na mane, na gete, na kare ma na gemêa. Ngaira ka nahuira ka me nikâ na puruka, na sipi ma na tonki.
22O Josua ki vi tangararerua na mane garu râ bâbâ i nago, ki vi: “Muru banu i ruma iana ka Ragaba na êrâ ma kamuru merahura me ngaia ma ngaira hato i ruma iana, manga muru bani surua tanga.” 23Ngairerua karu râ ma karu mehura ka Ragaba henira o vaemana, kenana, goana ma na enoni getera i ruma iana. Ngairerua karu merahura hato ngaira ma na enoni vurivuri iata tanga na agua ni tahinga hagarangia na tênga iata na Isiraelita. 24Hemuri ngaira ka sungia na hinua ki makaka henigi na ara ni marâ igê nga noga ma na golo, na siliva, na kapa i higa ma na aiani. Na marâ ngegana ngaira ka toregi râ ma ka nakagi henigi na ruruguha i ruma ni ruruguha iana na Araha. 25Mo Josua ki hagatahira ka Ragaba na êrâ ma ngaira hato i ruma iana, suria ngaia ki pinihirerua na mane garu râ bâbâ, i hagatorangenirerua tanga i Jeriko. Na raraha iana ka gâga mêngara i Isiraele mataro me i ngekê.
26I na matena ngekana o Josua ki haganunura na enoni, ki vi:
“Na anima na enoni i uhungia,
vi tagarahia aporo na hinua i Jeriko,
na Araha ki page hagaitangia.
Na anima na enoni i tagarahigi aporo na para ni hinua
ngaia ki page têtê tara renia na bêbê ni kare mane iana.
Na anima na enoni ki tagarahigi aporo na maani para ni hinua
ngaia ki page têtê tara renia na kare mane iana hagemuri.”
27Hoita, na Araha ki ngahisia o Josua, ma o Josua ki rongo raha na atana suria na agua hagenani.
Currently Selected:
JOSUA 6: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific