JOSUA 5
5
1Na maneraha hato iata na Amorita i na apanena so i Jotano ma na maneraha hato iata na Kananita igê na tarasini kereso, ngaira ka rongoa, vi na Araha ki hagamamataria na ve i Jotano mataro me na Isiraelita ka tarêhia. Ngaira ka magu ma ka bubununugu renira na Isiraelita.
Na reteha ni gavoni vara i Gilegale
2Hoi, na Araha ki vi tanga o Josua, ki vi: “Gu tagarahigi na gê na hê ma ku retegi râ na gavoni na varata na Isiraelita.” 3Vikana o Josua ki kato, manga i bonasia na Araha renia. Ngaia ki retegi na gavoni na varata na Isiraelita igê na agua ga hêtana vi hungana ni Reteha. 4-6Matena na Isiraelita ka pania i Esipito, na mane hato ka bani retera. Henaka, ma surigi na harisi tangahuru ge he ga aharêvoro surigi igê na bagamasusu raha, ngaira ka pe retera rârâ na kare mane ga vora me i na matena ngekana. Nikâ, na mane hato, na mane na gapu haoru matena ga pania i Esipito, ngaira ka bani me hato i ngekê, suria ga guguruga tanga na Araha. Na Araha ki bani tohe, vi ngaira ki asa iata, vige bâsia na agua na mako koro ni ngauha ma ni togoha, i bani surua tangara na êvarita. 7O kareta na mane ngegana ka pe retera rârâ. Na voraha haoru ngekana o Josua ki retera.
8I murina i hato na reteha na enoni hato ka oga igê na tênga, mataro me ki mavo na maara iata. 9Na Araha ki vi tanga o Josua, ki vi: “I ngekê inê kê hatungia na makiha tenigamu, suria mu vora na kare rakuraku i Esipito.” Tahema mataro me i ngekê ka hêtana na agua ngekana, vi Gilegale.
10Matena na Isiraelita ka tênga i Gilegale igê na bena hagarangia i Jeriko, ngaira ka hagarahasia na tangiana na Paseka igê na manurahitana na tangahuruta matare he na tangiana igê na hageha. 11Igê na tangiana i muri ngaira ka kahu ngêgi moramora na ngêra ni Kanani: na koni ga hahigi ma na bereti i pe ahunga. 12Na mana ki hato vige vota nikâ, ma na Isiraelita ka pe ngêgi rârâ nikâ. Tenia na matena ngekana ngaira ka ngaugi ma na ngêra ni Kanani.
Na mane i têa na tatapa borahu
13Ta na tangiana, matena o Josua ma na Isiraelita ka tênga hagarangia i Jeriko, o Josua ki parama, ma ki bâsia na mane, i ura me i maana ma ki têa na tatapa borahu. O Josua ki ura râ tanga ma ki hagatea, ki vi: “I hega, na tamamami vari kani igo se na merogamami?”
14Na mane ki arami, ki vi: “Mareha! Inê ki na maneraha iata na mane ni me iana na Araha. Kani inê akê.”
O Josua ki aba so i ano, hanana i rahesia, ma ki vi: “Na ta ko obaniê, vigê tanua? Inê kê nanê ma ngekê.”
15Na maneraha iata na mane ni me iana na Araha ki arami, ki vi: “Gu tarasigi râ na santele iamu. Igo ko ura igê na agua i apuna.” O Josua ki kato vikana.
Currently Selected:
JOSUA 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific