JEREMIA 52

Jerusaleme ki vota

(2 Maneraha 24.18—25.7; Jeremia 39.1-10)

1O Setekia ki maneraha i Juta, matena na harisi iana ki tangahuru gi rua matare tage, ma ki marungia i Jerusaleme surigi na tangahuri harisi matare tage. Na atana kenana kani ka Gamutate, ka karena na ani getea o Jeremia. I Libina ka na hinua iana. 2Na maneraha o Setekia ki haritohea na Araha, tagenana manga na maneraha o Jehoiakimo. 3Tahema na Araha ki mangariaga ngavê tangara na ai ni Jerusaleme me Juta, ma ki kasi renira.

O Setekia ki guguruga tanga o Nebukanesa na maneraha i Babilonia. 4Tahema o Nebukanesa ki merarâ me na mane ni me hato iana, ma ka taharia i Jerusaleme igê na tangahuruta na tangiana igê na tangahuruta na hageha igê na sivata na harisi, o Setekia ki maneraha surigi. Ngaira ka taunga i metara na hinua ma ka rapigi na para rihia na hinua. 5Ngaira ka ama ni sugaria nga na hinua, mataro me igê na tangahuri harisi matare tage o Setekia ki maneraha surigi. 6Na magêha ki raha teha, ma ki mareha rârâ na ngêra tangara na enoni. Igê na sivata na tangiana igê na heta na hageha igê nga na harisi ngekana na me ni Babilonia ka tahakurugi na para ni hinua. 7Henaka vi na me ni Babilonia ka ura rihia na hinua, na ara ni mane ni me iana o Setekia ka gava suria na bungiana. Ngaira ka gava ka aharê igê na mu ni hagamahe rihia na ruma raha iana na maneraha. Ngaira ka hura tenia na maani para, i ratorerua na para gi rua, ma ka gava tanga na maruguna i Jotano. 8Ma na mane ni me ni Babilonia ka tarigenia ma ka têa na maneraha o Setekia igê na bena hagarangia i Jeriko, ma na mane ni me hato iana ka gava pania. 9Ngaira ka torea o Setekia tanga na maneraha o Nebukanesa, i goga i hinua i Ribila igê na apanena i Hamata.

Ma i ngekana o Nebukanesa ki suria igê. 10I ngekana i Ribila ngaia ki bonasira igê na me iana, hanana ga hagamesira o karena o Setekia. Ngaira ka nahuira i maana. Ngaira ka hagamesira nikâ na enoni raha ni Juta. 11Ma hemuri ngaira ka akarogi na maana o Setekia, ma ka rakua renigi na seni ma ka torea vê tanga i Babilonia. O Setekia ki oga i ruma ni hagaitangiha i Babilone, mataro me ki me igê.

Na ruhuruhuana na Ruma ni Rotu

(2 Maneraha 25.8-17)

12Igê na tangahuruta na tangiana igê na rimata na hageha igê na tangahuru matara na sivata na harisi o Nebukanesa ki maneraha surigi i Babilonia, o Nebusaratana, na mane ni hagaotonga iana na maneraha ma ki araha iata na mane ni me iana, ngaia ki banu i Jerusaleme. 13Ngaia ki sungigi na Ruma ni Rotu, na ruma raha iana na maneraha, ma na ruma iata na enoni raha hato i Jerusaleme. 14Na mane ni me iana ka hogegi na para ni hinua. 15Ma hemuri o Nebusaratana ki henahuraura na enoni, ga hita so i hinua, henira na ani ga manisingenigi na tagaraha, ma na ani ga bani pane henira na ai ni Babilonia. 16Ngaia ki panira so i Juta na ani ga matareha ngavê ma ka pe tongasira rârâ ta na marâ, ma ki hagatagarahira igê na pariki ni vaini ma i mu.

17Na me ni Babilonia ka barugigi na u na kapa na u ni Ruma ni Rotu, ma na kati igê ma na baga apira na kapa. Ngaira ka toregi na ara ni kapa hato tanga i Babilone. 18Ngaira ka hanagogi vê nikâ na sipeti, ma na marâ ga sinosino rahu hurigi, matena ga maningaia na bea ni vogasiha, ma na marâ ga maningaigi renigi na laiti, ma na apira, i gogogo hurigi na gapu, matena ga vogasi, ma na apira ga susu igê na marâ i sigini koro, ma na ara ni marâ na kapa getegi tanga na hagarahenga. 19Ngaira ka toregi vê na ara ni marâ, ga tagarahigi renigi na golo se na siliva. Ngaigi ka na kere apira sisite, na apira ni maraha, na apira ni gapu, na apira ni rahu, na atohani na laiti, na apira ni marâ i sigini koro, ma na apira ga karangigi igê na vaini tanga na vogasiha.

20Na maneraha o Solomone ki bani mahatangenigi tanga na Ruma ni Rotu na u gi rua, na kati, ma na baga apira raha, i matare i gerita na nunuta na puruka mane tangahuru matarerua. Na marâ hato ngegana ka tagarahigi renigi na kapa ma ka hihigaga ngavê. 21-22Na u gi rua ngegana karu heavore. Na borahusina na ara ni hitangiterua ki 9 mita. Ngairerua karu raroga ma karu 6 mita hagarabo. Na upupugana na kapa ki 8 sentimita. Igê na ara ni bêterua na u ki oga igê na kapa na boroterua na kapa. Na borahusigaterua ki 1 mita ma na 50 sentimita. Ngairerua karu maremarega ki ruhu ki taku, ma ka tagarahigi igê na marâ ga bâ mangagi na guani na bana, 23na tangarê gi tage, ma ka bâsigi ma na tangahuru gi siva matara ke ono, matena ga bâbâ hari surigi akê. Na ara ni marâ hato ngegê ka tagarahigi renigi na kapa.

Ga henahuraura na ai ni Juta tanga i Babilonia

(2 Maneraha 25.18-21, 27-30)

24Ma nikâ o Nebusaratana, na araha iata na mane ni me, ki henahuraura o Seraia na mane raha teha ni vogasiha, mo Sepania na mane ni vogasiha, na ruata tanga, ma na mane gi oru, ga onosuria na Ruma ni Rotu. 25I berarogata na enoni i hinua ngaia ki rakura na araha ni me igê na hearihatana, na vere pi na mane ni hagaotonga iana na maneraha, ga gâga mêngara i hinua, na mane segesege iana na araha ni me igê na hearihatana, i garira na mane tanga na hearihatana, ma na enoni raha tangahuru ge ono tenigi na hinua getegi. 26O Nebusaratana ki torera tanga na maneraha i Babilonia, i oga i hinua i Ribila i na apanena i Hamata. 27I ngekana na maneraha ki bonasira igê na kariana, ka hagatavatavara ma ka hagamesira.

Vikê ga henahuraura na ai ni Juta tenia na apanena iata. 28Ikê ngaira hato na enoni o Nebukanesa ki henahuraura. Igê na pita na harisi i maneraha surigi ngaia ki torera vê 3,023 na ai ni Juta. 29Igê na varuta na harisi i maneraha surigi ngaia ki torera vê 832 na ai ni Jerusaleme. 30Matena i maneraha surigi na harisi tangahuru girua matare oru, o Nebukanesa ki torera vê na enoni 745. Ngaira hato ga toma hakura ki vora 4,600 na enoni.

31Igê na matena o Evili Merotaga ki vora renia na maneraha i Babilonia, ngaia ki hetaki tanga o Jehoiagino na maneraha ni Juta, ma ki kasia hura tenia na ruma ni hagaitangiha. Na tarana ngekê ki vora me igê na tangahuru matara na ruata na hageha igê na harisi tangahuru gi oru matara na pita na harisi, i murina ga bani henahuraua igê o Jehoiagino. 32O Evili Merotaga ki koro tanga ma ki hagarahasia teharira na maneraha getera, ga bani henahuraura henia tanga i Babilonia. 33I ngekana na maneraha ki hagamarumungenia o Jehoiagino, hanana vi i urusia na gahu iata na enoni rakuraku ma ki mebêrihu, mataro me ki me. 34Nikâ ngaia ki naka tani na tarana, hanana vi vatea na kere mena, i ararigi na ogaha iana i na ara ni tangiani, mataro me ki meme.

Currently Selected:

JEREMIA 52: KCB

Highlight

Copy