JEREMIA 51
51
Na siva i tarahua i Babilonia
1Na Araha ki vi:
“Inê kê page hagatorangenia na roga raha
ke nahuia i Babilonia ma na enoni igê.
2Inê be hagatorangenira na ai ni mahuara,
ke ruhuruhua i Babilonia,
manga na maguara i ahegenigi râ na momo.
Igê na bagabevoani ngegana
ngaira ka page sugaria igê na ara ni agua
ma ka rurugua na agua hagenani.
3Siana kamu naka na matora tangara na mane ni me igê,
hanana siana ka hanatenigi na mage iata,
se viga ngahingahi pusira mareta.
Nahuira nga na mane na gapu haoru.
Mutera na ara ni mane ni me hato.
4Ngaira ka page mamari
ma ka page meme surigi na tara i hinua iata.
5Inê na Araha God raramohaga huniê,
inê kê pe kasi renira na ai ni Isiraele me Juta,
naka ma, ma ngaira ka haritoheê,
inê na God Apuna iata.
6Gavatenia i Babilonia.
Mu gava tange na manavami,
i era ma kamu meme,
matena na hagaitangiha ki tarahua i Babilonia
renigi na bagatarihata na enoni igê.
I ngekê inê be barua aporo na siva tangara
ma be hagaitangira ararigi na bagatarihata hato.
7I nago i Babilonia ki manga na kâkâ na golo i rimaku.
Na enoni hato i maveta ka tono igê
ma ki aripo na maata.
Ngaira ka tonomia na vaini igê
ma ka bekabekaga ngavê.
8Ma i ngekê i Babilonia ki parama,
ma ki vota ma ki aruhuruhu.
Mu angiangi maramara renia.
Mu baraigi na maara iana
ma hanana ga page mavomavo vari.
9“Na mahuara, ga oga i ngekana, ka vi:
‘Igia ka uhungia, viga tamania i Babilonia
ma ki bani teha na matena, vige tamania igê.
Nika, ge râ ke aporo i pasika.
God nga kani hagaitangia i Babilonia
ma ki ruhuruhua ngavê renia na raramohana.’”
10Na Araha ki vi:
“Na kariaku ka ngere, ka vi:
‘Na Araha ki pane henigia.
Nika, ge râ ke hagarongora na ai i Jerusaleme
renigi na tauhana na Araha God iaka.’”
11Na Araha ki hagatorangenia na maneraha ni Metia me Pesia,
suria ngaia ki kato, viga ruhuruhua i Babilonia.
Igê na tarana ngekana
ngaia ki barua aporo renia na siva tangara,
suria ngaira ka ruhuruhua ngavê na Ruma ni Rotu iana.
Na araha ni me, ga taharia i Babilonia,
ka ngere tangara na mane ni me iata, ka vi:
“Rategi na mage iami.
Mu ngahi ma kamu kasi mamava.
12Sugaria na para rihuia Babilone.
Ge rako na mane ni anumasiha.
Nakara na me ke ahi hekarigi.”
Na Araha ki hagamonaria na haganunuha iana
tangara na ai ni Babilonia.
13Ngaira ka ogasigi na berarogani na ve raha
ma ka ruruguha ngavê.
Ma na matena iata ki hato noga
ma ki sugi hato iata.
14Na Araha raramohaga hunia ki bani tohe renia marena,
vi ngaia ki page hagatorangenira rako na mane ni me,
hanana viga taharia i Babilonia,
manga na ruruha raha ni pê.
Ngaira ka page kasikasi mamava, suria ga teha.
Na ki ni visiha raha God
(Jeremia 10.15-19)
15Na Araha ki hagavora na maveta,
suria ngaia ki raramohaga hunia.
Ngaia ki hagavora na ano,
suria ngaia ki tako mataha ngavê.
Ngaia ki gasia na vavearo,
suria ngaia ki girara ngavê.
16Ngaia ki tamasi ma,
ma na ve ka vahao i avorana na vavearo.
Ngaia ki katogi na marangea igê na roto.
Ngaia ki unigi me na tarêheroga
tenigi na maani na tangi.
17Matena na enoni ka bâsigi na tarani ngegana,
ngaira ka konekone ma ka tugupu.
Na mane, ga tahegi na nunuta na ataro,
ka maki, suria na harasita ki asa,
vige hagavoregi rârâ ta na marâ.
Na harasita ka na marâ ni hagaparunga,
na marâ purua ma, ga pe mauri.
18Ngaigi ki na marâ ni hagarurugana ma.
Ige na mateni ni hagaitangiha
na Araha ki page hagamagahurugi râ.
19Ngaira ka pe maratorana na God,
na Isiraelita ka rahesia.
Ngaia nga ki na ani i hagavorara
na ara ni marâ hatohato,
ma ki atera na Isiraelita ka vora re na anina.
Na atana ki na Araha raramohaga hunia.
Na mata iana na Araha
20Na Araha ki vi:
“Babilonia, igo ka na mata iaku,
na tangaruha iaku igê na hearihatana.
21Renigo igo inê kê teharigi na agua.
Inê kê mutera na maneraha igê.
Inê kê nahuira na hosi ni me
henira na mane ni me igê.
Inê kê kumukumugi na kati ni me
henira na mane ni me igê.
22Renigo igo inê kê nahuira ka me na mane ma na gete,
na gemêa ma na enoni haoru,
na kere mane ma na kere gete.
23Renigo igo inê kê nahuira na totoha ni sipi
henira na avanuta,
na puruka ni tagaraniha henira na avanuta.
Inê kê menamenarira na maneraha
henira na kariata.”
Na hagaitangiha tanga i Babilonia
24Na Araha ki vi:
“Igamu kamu page bâsiê,
gê barugi aporo tanga i Babilonia ma na enoni igê
na ara ni bagatarihata hato tanga i Jerusaleme.
25Babilonia, igo ko manga na barana,
i erasia na maveta hagenani.
Ma inê nga na Araha inê ka na merongamu.
Inê be ranguigo ma be ruhuruhugo so i ano.
Inê be sungigo ko makaka.
26Na ruma ma na para iamu ka page aruhuruhu,
ma ki asa vige page tagarahigi aporo.
Igo ko page hihiruga ngavê tare, ki bê ki arâ.
Ngaia kani gê visia, inê na Araha.
27“Kasi mamava ni sugariha.
Uhigi na ahuri,
hanana na agua getigi ka rongogi.
Hagarêra na agua getigi,
hanana ge meheariha i Babilonia.
Bonasira na maneraha ni Ararata, Mini me Asekenase,
hanana ge sugaria i Babilonia.
Atea ta na araha ni me,
hanana i bêngenia na sugariha.
Na hosi ni me ke râ igê na hearihatana,
ke râ manga na ruruha ni pê.
28Hagarêra na agua getigi,
hanana ge meheariha i Babilonia.
Unira me na maneraha ni Metia
henira na tamata ma na kariata
ma henira na mane ni me hato
igê na agua, ga marungigi.
29Na maveta ki angingi ma ki gisigisi,
suria inê na Araha kê hagamonaria na katoha iaku,
hanana gê ruhuruhua i Babilonia, ki hihiruga.
30Na mane ni me ni Babilonia ka kasia vê na hearihatana
ma ka ogasigi ma na ruma nganganihaga iata.
Ngaira ka rumakaka, ka mangara na gete.
Na maani para na hinua ka ahogehoge.
Na gi ki ngêgi na ruma.
31Na mane tora tamasinga ka hagarongoa hesurisuri
na maneraha ni Babilonia, ka vi,
vi na merongana ka hoge
ma ka ama hekuru renia na hinua.
32Na merongana ka ura hagabarasia na tara tarê i ve
ma ka sungigi na ruma nganganihaga.
Na mane ni me ni Babilonia ka bagatugupu.
33Na merongata ka sugi nahuira ke me
ma ke purira so, mangagi na ngêra ga taketake.
Ngaia kani gê visia, inê na Araha raramohaga huniê,
ga rahesia na Isiraelita.”
34Na maneraha ni Babilonia o Nebukanesa
ki rete vurusia i Jerusaleme
ma ki unumia manga na bagahua raha.
Ngaia ki rurugua na hinua
manga ga karangia na pi.
Ngaia ki masu aharêngia
renigi na marâ i obanigi
ma ki kasigi râ na ani i usitenigi.
35Na ai ni Sione ki ararira, viga vivi:
“Na me nga ni Babilonia kani ga nahuigami.”
Na ai ni Jerusaleme ki ararira, viga vivi:
“Ngaira nga na ai ni Babilonia kani ga hagamamasiagagami.”
36Tahema na Araha ki vi tangara na ai ni Jerusaleme, ki vi:
“Inê be rohe pusigamu.
Inê be barua aporo na siva tangara na merongami
renigi na bagatauhata tangagamu.
Inê be hagamamatarigi na ve banga i Babilone
ma na ve raha i Babilonia.
37I Babilone ki page aruhuruhu
ma na marâ vasiga ma ka page ogasia.
Na enoni ka page makimaki tenia
ma ka page kakahuru renia.
Ngaia ki page hihiruga ngavê.
38Ngaira hato na ai ni Babilonia ka henguruhi
mangara na laione ma na kareta ga pasi ngê.
39Inê be hagarêa na magotoha tangara,
hanana i aripo na maata ma ka vagevage.
Ma i hemuri ka page mauru
ma ka mauru tatarê.
40Inê be harasira mangara na kareta na sipi se na goti
mangara na sipi mane se na goti mane.
Ngaia kani gê visia, inê na Araha.”
Na hinua i Babilone ki vota
41Na Araha ki tamasi renia i Babilone, ki vi:
“Babilone, na hinua raha,
i rongo raha na atana i maveta hagenani,
ka bani henahuraua.
Na enoni igê na agua getigi ka makimaki tenia.
42Na ruarua ki banu i Babilone.
Na hêni na asi ka arobo huria.
43Na enoni ka makimakitenigi na hinua i Babilonia.
Ngaigi ki aruhuruhu.
Na agua ki avagavaga ma ki hihiruga.
I asa ta na enoni, vige page râ nikâ i ngekana.
44Inê be hagaitangia Belo na ataro ni Babilone
ma be tavogi aporo tenia na marâ i hanagogi.
Na enoni i na agua getigi ki hato,
vige page râ nikâ i Babilone,
hanana vige vogasia igê.
“Na para ni hinua i Babilone ka ahogehoge.
45Kariaku, ai ni Isiraele, mu gavatenia.
Mu gava tangagi na manavami,
suria inê kê mangariaga ngavê tanga i Babilone.
46Siana kamu bagahagêguri ma kamu magu,
suria mu rongogi na ani mavê na rongoha.
Siana kamu tongesurigi.
I na ara ni harisi ka akê me tare na rongoha,
ga tora hegitigi:
na rongoha renia na hearihatana igê na agua,
na rongoha renia ta na maneraha,
i meheariha tani na maneraha.
47Tahema ki sugia ma na matena
vi inê be hagaitangira igê na ataro ni Babilone.
Inê be hagamakira ngavê na enoni hato igê,
suria ga hagêguri togo purua ma renira.
Ngaira hato na enoni igê ka page meme.
48Na vavearo ma na maveta hagenani
karu page ngerengere vagevage,
matena na me ni Metia me Pesia ka henahuraua
ma ka ruhuruhua igê.
49Babilonia ki hagamesira na enoni
suria na maveta hagenani,
ma i ngekê ngaia ki page vota,
suria i hagamesira rako na ai ni Isiraele.
Ngaia kani gê visia, inê na Araha.”
50Na Araha ki vi tangara na kariana i Babilonia, ki vi:
“Igamu kamu bani tahi tenia na mera.
Mu râ nga! Siana kamu hagarihu!
Naka ma igamu kamu hagatê tenia i pasimi,
igamu kamu takusiê, inê na Araha iami,
ma kamu takusia aporo Jerusaleme.
51Igamu kamu vi: ‘Igami kami maki.
Ga ruhigami ma ki nahuigami ngavê na makiha,
suria na ai ni mahuara ka ogasigi
na agua i Ruma ni Rotu iamu,
na agua ga apu tangara.’
52Tahema inê kê vi: I sugia ma
be hagaerasigi na nunuta na ataro i Babilone
ma suria na agua hagenani
ka page gegege igê na enoni, ga mamari.
53Henaka manga vi Babilone ma ke akê ngavê i vavearo
ma ke tagarahia igê na ruma nganganihaga,
inê be hagatorangenira na me, ke ruhuruhua.
Ngaia kani gê visia, inê na Araha.”
54Na Araha ki vi:
“Rongo! Na ai ni Babilone ka angi.
Ngaira ka angiangi raha,
suria na apanena iata ki aruhuruhu ngavê.
55Inê be ruhuruhua i Babilone
ma be mutera ngavê.
Na merongata ka anuia i Babilone
manga na asi i maguhu,
ma ka kasi mamava ma ka taharia.
56Ngaira ka râ me,
hanana viga ruhuruhua i Babilone.
Ngaira ka henahuraura na mane ni me igê
ma ka barugi na epage ni me iata,
suria inê ka na God,
gê hagaitangira na ani ga erataga
ararigi na bagaparongata.
57Inê be hagaitangia i Babilone.
Inê be katora ke ruguhira na maneraha igê,
na mane igê ga tako mataha,
ma na enoni raha ma na mane ni me igê.
Ngaira ka page arâ ka mauru,
ma ka mauru tatarê.
Ngaia kani gê visia,
inê na Araha raramohaga huniê,
gê marungia i Babilone.
58Na para nganganihaga rihuia i Babilone
ka page ahogehoge
ma na gi ki page ngaugi na maani para raha.
Na enoni i maveta ka tagara hagaborâ ma.
Ngaira ka tagara raha tanga na ta?
Na gi ki page ngaugi na tagaraha iata.
Ngaia kani gê visia,
inê na Araha raramohaga huniê.”
O Jeremia ki kasi tamasinga tanga i Babilonia
59Igê na heta na harisi o Setekia ki maneraha suria i Juta, ngaia ki râ i Babilonia henia o Seraia, karena o Neria ma vesina o Maseia. O Seraia ki onosurigi na ara ni marâ hato tanga na maneraha. Inê kê hagararigi tani na tarani tanga. 60Inê kê bani segegi so igê na buka na ara ni bagabevoani, ga page tarahua i Babilone, henigi na tamasinga hato iaku renia. 61Inê kê vi tanga o Seraia, kê vi: “Matena go tariha i Babilonia, ki tuguhigo, go tomanigi raha tangara na enoni na ara ni marâ igê na buka ikê. 62Ma hemuri ko nunginungi, ko vivi: ‘Araha, igo ko bani vi, vi igo ko page ruhuruhua na hinua ikê, hanana i baguru ngavê renira na enoni, renira na togoha, ma renira na ani mavê na marâ ga mauri. Ngaia ki page hihiruga ngavê tare, ki bê ki arâ.’ 63Seraia, matena go tomania hato na buka ikê tangara na enoni, hoi, go baroa igê na hê ma ko kasia i ve i Uparatesi, 64ma ko vivi: ‘Nga hanana ge katoa i Babilonia ngekê. Ngaia ki page kokoro ma ki asa vige page akê aporo, suria ga page tarahua na bagabevoani, na Araha ki page hagaitangia renigi.’”
Ikê ki hato igê na tamasinga iana o Jeremia.
Currently Selected:
JEREMIA 51: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
