JEREMIA 3
3
Isiraele ki pe toto suria God
1Na Araha ki vi: “Manga na mane ma ki kasia kaniana, ma ngaia na gete ki arâ pania ma ki auragia na mane getea, ki hega, ngaia na mane ki girara vari, i torea aporo nikâ ka ani akana? Na tarana ngekê ki erasia navê na agua. I hega, i Isiraele ki tagenana ma manga ngekana nikâ? Igo, Isiraele, ko vagogo surira rako na mane. Gu vi vari, vigo kahu aporo me tangê?
2“Gu bâsigi na tarahane na hungani.
I hega, igo ko pe gamogamo rârâ vari
igê ta na agua i ngegana?
Igo ko paronga manga na êrâ,
suria igo ko ahehi hekarigi i tara
karira na mane mangara na me ni Arabia,
ga gamorahira na enoni igê na masusu.
Igo ko erasia ngavê na agua,
suria go gamogamo.
3Tahema ki pe rangi rârâ,
ma ki mareha nikâ na sivo ni hagahisi.
Igo ko maratorana ngavê na êrâ.
Gu pe girara vigu maki!
4“Manga i he ko girara, vigo visiê, ko vivi,
‘Igo ki na vaemaku.
Igo ko takuiê,
haganega me tenia na matena gê sisite.
5I asa, vigu ama ni mangariaga nga tare.
I asa vigu oba era tare.’
Hoi, Isiraele, na tamasinga iamu maremu ma ngekana.
Ma igo ko ama ni katogi nga na eraha!”
I tuguhira na ai ni Isiraele me Juta viga urisi parongata
6Matena o Josia ki maneraha, na Araha ki vi tangê, ki vi: “Go pe bâsia vari na tauhana i Isiraele. Ngaia ki na gete i pe toto hesuri. Ngaia ki paniê. Ngaia ki râ ki paronga manga na êrâ igê na ara ni hungana ma i ruguhani na ara ni apinige maravarava. 7Inê kê vi ma, vi ngaia ki aporo me tangê, i murina i katokato vikana. Ma ki mareha. Ma Juta ki bâsigi na tarani hato ngegana. Juta ki manga vi ka goana, ma ki pe toto hesuri nogana. 8Juta ki girara nogana, vi inê kê kasia Isiraele ma kê tarigenia hura, suria ngaia ki pe toto suriê ma ki gamogamo. Ma Juta ki amaka suria ka goana Isiraele, i pe toto hesuri. Ngaia nogana ki haganega ki gamogamo, 9ma ki mareha ngavê vige maki. Ngaia ki erasia ngavê na agua. Ngaia ki pe toto suriê, suria i vogasigi na hê ma na apinige. Na tamana ma vi ngaia ki gamogamo. 10Hato vigana, Juta, ka goana Isiraele i pe toto hesuri, ngaia ki vi, vi obania vi aporo me tangê. Ma hete i hagaparu ma. Ngaia kani gê visia, inê na Araha.”
11Ma hemuri na Araha ki tamasi tangê, ki vi: “Isiraele ki kasi reniê, ma Juta ki pe toto suriê, ma Isiraele ki pe era ngavê manga i Juta. 12Vikê gu râ ma ko tamasi tanga i Isiraele, ko vivi: Na Araha ki tamasi vikê: Isiraele, go pe toto suriê, gu aporo me tangê. Inê kê pe obania na siva. Inê be koro tangago hete. I asa iaku ve mangariaga. I asa be ama ni oba era nga tangago. 13I tuguhigo ma, vigu tangahurigo, vi igo ko tasi ma ko aritoheê, inê na Araha God iamu. Gu tangahurigo, vi igo ko paronga manga na êrâ, suria go vogasira na harasita na enoni getera, ma ko aharêngigi na ramata iaku. Ngaia kani gê visia, inê na Araha.
14“Kariaku, mu pe toto suriê, mu aporo me. Igamu ka na aniku. Inê be tavora tani na hitangimi surigi na ara ni hinua ma tani tenigi na ara ni varo ninuni, ma be torera aporo tanga na hungana i Sione. 15Inê be nakara na maneraha tangagamu, na mane ga têtê viteaku. Ma ngaira ka page marungigamu igê na takoha mataha ma na giraraha. 16Matena mu rakorako igê na agua, na enoni ki hato, vige page tamasia nikâ na Bokesi na Suruheri. Ngaira ki hato, vige botage nikâ renia. Ngaira ka page tako mu vê renia. Ma ki asa vige tagarahia aporo na urusina, suria ngaira ka vi, vi ngaira ka pe obania. 17I na matena ngekana ka page hêtana Jerusaleme vi ‘Atohana na Araha,’ ma na enoni hato i maveta ka page hakuhaku me igê, hanana ga rahesia. Ngaira ki hato hagetage, vige page togeaga nikâ, ke râ suri barisuta mareta ma na teniha era iata. 18Isiraele, ki page hakunia i Juta, ma ngairerua karu page pania na agua, ga bani henahuraurerua tanga, ma karu page aporo tanga na agua, gê bani haganahunira na uvarimi renia, hanana viga gâga igê tare.”
Na kariana God ka vogasira na ataro
19Na Araha ki vi:
“Isiraele, inê kê obania,
vigê taugo manga vi igo ka na kareku
ma kê haganahunigo renia na agua, i bâkoro era,
teharigi na ara ni agua hato i maveta.
Inê kê obanigo, vigo visiê,
vi inê ki na vaemamu,
ma ko hatohato, vigu kasi reniê nikâ.
20Ma igo ko manga na gete êragi, i pe toto hesuri.
Igo ko pe toto suriê.
Ngaia kani gê visia, inê na Araha.”
21Na enangita igê na tarahane na hungani.
Na Isiraelita ka angiangi ma ka avaravara,
suria ga bagaparongata
ma ka pe botage renia na Araha God iata.
22Mu aporo tanga na Araha,
igamu hato na ani mu pe toto suria.
Ngaia ki page hagakorogamu aporo,
ma ki page katogamu, kamu tototo suria aporo.
Igamu kamu vi: “Ua,
igami kami aporo me tanga na Araha,
suria ngaia ki na God iaka.
23Igami kami vogasira na ataro igê na hungani,
ma ki asa iata, vige tamanigami.
Na rahesiana ngekana ka na tonoha ma na gamogamoha ma.
Na hetamaniha tanga i Isiraele ki râ me hete
tenia na Araha God iaka.
24Igami kami vogasia o Bala na ataro
renira na totoha ni sipi ma ni puruka,
renira na karemami, mane ma hehene,
renigi na ara ni nahuninga,
na êvarimami ka tagara bâraha renigi
haganega me tenia i kere vê noga.
Na tarani ngegana ka hagamakigami.
25I ararigami, vigami maki ngavê.
Ke nahuigami na makiha!
Igami ma na uvarimami
igami kami haritohea tare na Araha God iaka.
I mareha ngavê, vigami tê viteana.”
Currently Selected:
JEREMIA 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific