JEREMIA 4
4
Urisi parongami
1Na Araha ki vi: “Ai ni Isiraele, manga mu urisi parongami, mu aporo me tangê. Manga mu kasikasi râ na nununi na ataro, gê kitenigi, ma kamu tototo suriê aporo, 2hoi, i oto tangagamu, vigamu tohetohe reniê igê na otoha ma igê na monariha. Ma na enoni hato i maveta ka page avarasiê, hanana vigê mamahata tangara, ma ngaira ka page visiê raha.”
3Na Araha ki vi tangara na ai ni Juta me Jerusaleme, ki vi: “Mu maningaigi na mu. Siana kamu ata ni hasihasi mavê i gupuni na rauga era. 4Ai ni Jerusaleme me Juta, mu tototo suriê, inê na Araha iami. Mu tari suriê i mêrihami hagenani. Manga i mareha, na mangariaganiha iaku ki page manga na anguruna na gi renigi na bagatarihami. Ngaia ki page ngatongato tare, ma ki asa ta na enoni, vige page hunuia.”
Na ai ni Babilonia ka taharia i Juta
5Ai ni Juta me Jerusaleme,
mu uhigi na ahuri suria na agua hagenani.
Mu ngere raha, ke rongo mataha.
Mu aretaku me, kami rukuruku
igê na hinua nganganihaga.
6Mu râ i Sione.
Mu tangotango ma kamu rukuruku.
Siana kamu babeaga, se mu parepare.
Na Araha ki nakagi na bagabevoani
ni hagamuteha ma ni hagaruhuruhunga,
ga arâ me tenia i Babilonia.
7Na ani, i hagamutera na enoni i maveta,
ki bani tavoraha me noga,
manga na laione tenia na tahuna.
Ngaia ki arâ me,
hanana i hagaerasia ngavê i Juta.
Na hinua i Juta ka page aruhuruhu
ma ka page hihiruga.
8Mu hagesuru tatari.
Mu angiangi ma kamu gegege,
suria na mangariganiha raha iana na Araha
ki tâ nga tanga i Juta.
9Na Araha ki vi tangê, ki vi:
“Igê na matena ngekana
na maneraha henira na kariata
ka page bubununuga ngavê.
Na mane ni vogasiha ma na poropete
ka page gasuga ma ka page tugupu.”
10Ma inê kê aramia, kê vi:
“Araha God, igo ko hagahagaparura ngavê
na ai ni Jerusaleme,
suria igo ko surua, vi na ramana tangara,
ma hete i tarahura ma na henahuita.”
11Ta na tangiana na Araha ki page vi
tangara na ai ni Jerusaleme, ki vivi:
“Na roga mahana ki arâ me tangagamu
tenigi na hareni na hungani igê na masusu.
Ngaia ki mareha vê, vi na roga ni hatanga,
hanana vi ahegenigi vê na momo. Mareha!
12Ngaia ki na roga raha raramohaga hete,
suria inê nga ka na roga ngekana.
Inê kê râ me, hanana gê surigamu.”
13Bâ, na meronga ka rotorotoaga me.
Na kati ni me ka manga na maguara.
Na hosi iata ka gaha teharira na ahetaronga.
I era ngavê tangagia!
Igia ka meme!
14Ai ni Jerusaleme, mu urisi parongami,
ma hanana mu tahitahi.
Na bagatauhami ki angarigamu arihu taraha?
15Na rongoha era ki râ me tenia na hinua i Tane
ma tenigi na hungani i na apanena i Eparaimi.
16Haganunura na enoni i maveta.
Haganunua i Jerusaleme,
vi na merongana ka râ me noga
tenia na agua hagatê.
Ngaira ka page hagaramo
ma ka page taharigi na hinua i Juta.
17Ngaira ka page ura rihuia Jerusaleme
mangara na mane ga anumasia na mu,
suria na enoni igê ka haritohea na Araha.
Ngaia kani visia na Araha.
18Juta, igo ko hagaratemu maremu
renigi na bagatarihamu.
Na meni na bagatarihamu ngegana.
Tahema i tarahugo na mamasiaganiha,
i nahuia na aitangihamu.
O Jeremia ki mesira na enoni i pasina
19Hara! Hara! Inê kê hiote!
Bunaniaku! I tata!
I asa be ape haritagi.
Inê kê rongogi na ahuri ni me.
Na mane ni me ka hagaramo.
20Na bagabevoani ka râ me hesurisuri.
Na agua hagenani ki erataga ngavê.
Ga parama na ruma ni gahu, ma ka aruhuruhu.
Na gahu na ruma iaka ka tatari tarome.
21Inê kê rigia arihu taraha na hearihatana?
Inê kê rongogi arihu taraha na ahuri ni me?
22Na Araha ki vi:
“Na kariaku ka beka ngavê.
Ngaira ka pe aitangisiê.
Ngaira ka mangara na kare bonobonoga.
Ngaira ka pe nahuni takoha.
Ngaira ka manisingenigi na eraha,
ma ka hitenia na koroha.”
23Inê kê rigia na ano.
Ngaia ki mamao ma ki hagagara era.
Inê kê rigia na vavearo.
Ngaia ki mareha igê na marara.
24Inê kê rigigi na barani.
Ngaigi ki gisigisi.
Inê kê rigigi na hungani.
Ngaigi ki angingi.
25Na maveta ki hihiruga.
Na manu ka magahuru nikâ.
26Na mako ango ki aruga.
Na hinua igê ka aruhuruhu.
Na mangariganiha iana na Araha
ki hagarateni na tarani ngegana.
27Na Araha ki vi:
“Na maveta hagenani ki page manihêga,
ma ki asa vigê hagamagahurua ngavê.
28Na maveta ki page angingi.
Na vavearo ki page roto hono.
Ngaia kani gê visia, inê na Araha.
Na katoha iaku ki tâ i tâ.
I asa ve urusia nikâ.”
29Na enoni hato ka page gava tenia na hinua,
matena ga rongora na mane ni me igê na hosi
ma na mane ni hananiha, ga nagiakuruhi me.
Tani ka page gava tangagi na vapuni,
ma tani tangagi na vaba, ka ahiahi igê.
Na ara ni hinua ka page hihiruga,
ma ki asa ta na enoni, vige ogasigi aporo nikâ.
30Jerusaleme, i era ngavê tangago.
Hega, go tuguni rotorotoaga memera?
Hega, go rêni renigi na golo?
Renia ta go pupuni?
Igo ko maningaigo maremu purua ma kego!
Na mane, go gogogo surira tare,
ka kitenigo ngavê i ngêke,
ma ka obania, viga nahuigo ko meme.
31Jerusaleme, inê kê rongogo, go ngere,
manga na gete i harate kare.
Manga na gete i hagâkani ki apara kare.
Igo ko ngerengere,
suria go manava tanga na matumu.
Igo ko gusigi na rimamu, ko vi:
“E, gê meme!
Ga râ me ka nahuiê!”
Currently Selected:
JEREMIA 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
