ISAIA 7
7
Na tamasinga tanga na maneraha o Agasi
1I na matena ngekana na maneraha o Agasi ki marungia i Juta. O vaemana ki no Jotama, ma o virana ki no Usia. Na hearihatana ki haganega, suria o Resini, i marungia i Siria, mo Peka karena o Remalia, i marungia i Isiraele, karu taharia i Jerusaleme, ma ki bara, vigaru rêa.
2Matena na tamasinga ki tarahua na maneraha i Juta, vi na meronga i Siria ka têa me noga i na apanena i Isiraele, ngaia ma na kariana hato ka bubununuga ngavê. Ngaira ka tata mangagi na apinige, i ngingigi na roga.
3Na Araha ki vi tanga o Isaia, ki vi: “Igo ma o karemu o Seare Jasubu muru râ vurusia na maneraha o Agasi. Muru page tarahua i tara i na agua, ga hagasikigi igê na gahu, igê na agua i hato igê na apavoro, i arâ igê na ve tenia na nonganonga kerekê. 4Go vi tanga, ko vivi: Go bâbâ maninga. Gu apeape haritagi. Siana ko magu, ma siana ko anumanuma. Na mangariaganiha iaterua na maneraha o Resini henira na kariana na ai ni Siria ma na maneraha o Peka ki manga na kere asêsuterua na baro gi rua. 5I monari, Siria ma Isiraele ma na maneraha o Peka ka harikato renigo, ka vi, 6‘Nika, ge taharia i Juta! Ke hagabubununugara na enoni. Ke parênia, ma ke kasia o karena o Tabele ke maneraha.’
7“Ma inê nga na Araha God kê vi, na tarana ngekana ki bara ngavê. Renia ta? 8Na hinua raha i Siria ngaia i Tamasiko, ma na maneraha i Tamasiko ngaia o Resini, mo Resini ki pe ramo ngavê. 9Na hinua raha i Isiraele i Samaria, ma na maneraha i Samaria ngaia o Peka, ma o Peka ki pe ramo ngavê nogana. Ma tangara na ai ni Isiraele, i rarona na tangahuri harisi ge ono ki rima tenia i ngekê, ngaira ka page oga totoko, ma ki asa vige page vora nikâ, vi na haku. Manga go pe hagêguri togo, ki asa iamu, vigu tahi.”
Na tamasinga tanga o Agasi renia o Imanuele
10Na Araha ki hagatorangenia nikâ o Isaia, ki tamasi tanga o Agasi, ki vi: 11“Gu nungia na Araha God iamu renia na ani ma na giraraha, go obania: na ani tenia na agua iata na enoni ga me, se tenia kerekê i vavearo, se i tagua ma.”
12O Agasi ki arami, ki vi: “Inê ki bara, ve nungia na giraraha. Inê ki bara, ve uhungia na Araha.”
13Mo Isaia ki arami, ki vi: “Gu rongo, igo na raraha iana na maneraha o Tavite. Igo ko bani uhungira bâraha na enoni, vige piringiape nga. I hega, igo ko obania vari, vigo uhungia na piringiapeha iana God iaku nikâ? 14Hoi, na Araha ngaia marena ki page vatego na giraraha. Bâ, na kare viru ki page obara ma ki page apara na kare mane, ma ki page hêtana vi o Imanuele, i vi God ki ngahisigia. 15Ngaia ki page totono na miliki ma ki page ngêngê na pirui, mataro me ki nahunia na takoha maninga. 16Ma i nago tarana na matena ngekana na apanena iaterua na maneraha ngegana, garu hagamagusigo, karu page hihiruga igê. 17Ma na Araha ki page nakagi na bagabevoani, ka tarahugamu, igo ma na kariamu ma na ahemata iamu. Na bagabevoani ngegê ka page era ngavê teharigi na ani, ga haganega igê na matena i Isiraele ki hura tenia i Juta, mataro ma i ngekê. Na bagabevoani ngegê ngaia ki na maneraha i Asiria.”
Na bagabevoani
18O Isaia ki tamasi tanga o Agasi, ki vi:
“Igê na matena na bagabevoani ngegana
na Araha ki page vunuhira igê na me ni Esipito,
hanana ga arâ me mangagi na ruruha ni rango
tenigi na maani ve i Nile,
ma tangara nikâ na me ni Asiria,
hanana ga arâ me mangagi na ruruha ni manivo.
19Na ruruha ni rango ma ni manivo ngegana
ka page gaha me, ka angapopo
igê na maruguna, ga roro, ma igê na vaba,
ma ka page gahuigi na ara ni tone ma na go hato.
20“I na matena ngekana
na Araha ki page taharia igê na mane ni tapuruha,
na mane tenia i na apanena tarê na ve i Uparatesi.
Ngaia ki na maneraha teha i Asiria.
Ngaia ki page gorogoro râ na taboturimi
ma na varehu i bêmi ma i apemi.
21“I na matena ngekana
na mane ki page nahunira ma igê
na bêhâgana na puruka ma na goti gi rua.
22Ngaira ka page vatea rako na miliki,
hanana i mauri re.
Na kere ani, ga tahi ma ka hita so igê na agua,
ka page mauri re ma na miliki ma na pirui.
23“I na matena ngekana
na tone ma na rauga era ka page rubuhigi
na pariki na rehagaro gi tage na apinige na vaini koro.
Na ani gi tage na apinige ki araria na rehagaro na haga.
24Na enoni ka page migirâ na epage ma na mage
ma ka page hagavasi igê,
suria na agua hagenani ki masigu ngavê
renigi na tone ma na rauga era.
25Na tone ki rubuhigi na aru
igê na tarihani na hungani.
Na enoni ki bara, vige tagara nikâ i ngekana.
Na puruka ma na sipi ka purigi, ma ka ngêngê igê.”
Currently Selected:
ISAIA 7: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
