ISAIA 6
6
God ki atea o Isaia ki poropete
1Igê na harisi, i me igê na maneraha o Usia,
inê kê bâsia na Araha.
Ngaia ki oga so igê na atohana.
Ngaia ki bâ hahaneaga ma ki bâ rahataga.
Na aruhana ki meheavore na Ruma ni Rotu hagenani.
2Na marâ mamauri na gi ka ura rihia.
Na ara ni hitangita ki tonga renigi na gagahana ge ono.
Na gagahana gi rua karu buhigi na maana,
ma ki rua karu aruha na apena,
ma ki rua tanga i gaha renirerua.
3Ngaira ka tamasi raha heri, ka vivi:
“I apuna teha ngavê
na Araha raramohaga hunia.
Na raramohana ki uhuana na maveta.”
4Na ringeni na ringeta ka ngingia na Ruma ni Rotu.
Na robona na gi ki raro i Ruma ni Rotu.
5Ma inê kê pe tako ni tahinga, ma kê vi:
“E, i era ngavê tangê,
suria na tamasinga iaku ki erataga,
ma kê oga i berarogata na enoni,
ga erataga nogata na tamasinga iata.
Naka ma gê manga ngekana,
renigi na maaku mareku inê kê bâsia
na Araha raramohaga hunia.”
6Ma na hitangita na marâ mamauri na gi
ki ahisia na maraha na gi
tenia na bea ni vogasiha,
ma ki megaha so me tangê.
7Ngaia ki hataria na gaviharaku
renia na maraha na gi, ma ki vi:
“Renia na tarana ngekê
na tamasinga iamu ka kahu koro.
I hato, vigu tangahurigo nikâ,
ma ka hato na tasi iamu.”
8Ma hemuri inê kê rongoa na Araha, i vi:
“Ti kê page hagatorangenia?
Ti ki page totora tamasinga iaku?”
Inê kê arami, kê vi: “Inê akê!
Gu hagatorangeniê!”
9Ngaia ki vi: “U râ,
ma ko tamasi tangara na enoni, ko vivi:
Naka ma mu rongorongo, ma ki asa mu rongogirara.
Naka ma mu bâbâ, ma ki asa mu bâgirara.”
10Ma ngaia ki vi tangê, ki vi:
“Gu katora na enoni ngegê ke bonobonoga.
Gu katora ke pungu na karingata.
Gu katora ke guru na maata,
hanana siana ka bâbâgirara,
se rongorongo girara, se takotako mataha.
Ngaira ka page matiê vari,
ma ka page korokoro aporo vari.”
11Inê kê hagate, kê vi:
“Araha, i arihu manga i he?”
Ngaia ki arami, ki vi:
“Mataro me na hinua ka aruhuruhu ma ka hihiruga,
mataro me na ruma ka baguru ma ka kakaga,
mataro me na agua ki mangagi na hiru ma na manihê.
12Inê be katora na merongata ke henahuraura,
ma na agua hagenani ke hihiruga ngavê.
13Naka ma na ara ni tangahuruta na enoni
ka hita so igê na agua,
ka page erasira nikâ.
Ngaira ka manga na apinige raha, ga tapia,
ma ki oga ma na barêrigana.”
Ma na barêrigana ki page papêhu.
Currently Selected:
ISAIA 6: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
