ISAIA 5
5
Na ki ni mu ni vaini
1Nakê be kiria na baro ki
renia na tamaku koro,
i takuia na mu ni vaini iana.
Na tamaku ki nahunia na mu ni vaini
igê na mako koro teha ngavê
igê na tarihana na hungana.
2Ngaia ki harasia na mu,
ki hikiru ma ki hasi igê
na varoni koro na vaini.
Ngaia ki torea na bebetehe,
hanana i anumasia igê na mu.
Ngaia ki tagarahia na agua,
i rusirusi igê na guani na vaini.
Ngaia ki naasia na matena,
viga matamata igê na guani mamaki,
ma hete ga mahe ma.
3Tahema na tamaku ki vi:
“Igamu na ai ni Jerusaleme me Juta,
mu hagakitakitagamirua
inê ma na mu ni vaini iaku.
4Na ta nikâ kê katoa
tanga na mu ni vaini iaku?
I hega kani ga mahe ma na guani,
gê vi ma, viga mamaki?
5Hoi, be vi tangagamu.
Inê be katoa vikê hete
na mu ni vaini iaku.
Inê be hogea na ravoravo rihia.
Inê be hogea na para pusia
ma be nakara na marâ vasiga i mu,
ke oka igê ma ke puria.
6Inê be naka vê, ke masigu ngavê.
Siana be uvegi na arani na vaini.
Siana be vavoa.
Inê be nakagi vê na rauga era ma na tone,
ke rubuhia na mu iaku.
Inê be manimanigi na roto,
siana ka rangisia na mu iaku.”
7Isiraele ka na mu ni vaini,
na mu iana na Araha raramohaga hunia.
Na ai ni Juta ka na varoni na vaini,
i hasigi i mu iana.
Ngaia ki vi ma, viga korokoro,
ma hete ga nahu inuni.
Ngaia ki vi ma, viga katogi na otoha,
ma hete ga hagamamasiagara na enoni,
suria ga pe râ surigi na otoha.
Na bagatarihata na enoni
8I page era ngavê tangagamu, igamu na enoni
mu ama ni vurigi nga na ruma ma na mako
tamami na ani mu bani nahunigi.
Sugia ma mu oga parera,
ma kamu parênia getegamu na agua hagenani.
9Inê kê bani rongoa na Araha raramohaga hunia,
i tohe, ki vi: “Na ruma hato, ga bâkoro ngegê,
ka page baguru ma ka page aruhuruhu.
10Na mu raha ni vaini ki page araria ma
na apira gi tage togo na vaini.
Na mu raha ni koni ki page araria ma
na heni gi tage togo na koni.”
11I page era ngavê tangagamu,
igamu na enoni mu riteritehigi na tonoha,
tararugi na bungiani, ma ka ruguhigamu.
12Matena mu magoto,
igamu kamu tarugigi na gita,
mu tahutahuru ma kamu êhihi,
ma kamu totono papasi na vaini,
ma kamu pe botage renia na Araha
ma renigi na tagaraha iana.
13Tahema ga page henahuraugamu.
Na maneraha iami ka page mesi magêha.
Na enoni purua ka page mesi tonoha.
14Na agua iata na enoni ga me
ki manganga, hanana i kumira.
Ngaia ki unumira na maneraha
henira na ani ga magoto ma ka barongo.
15Na ara ni enoni hato ka page maki,
ma na ani, ga paroparo, ka page vota.
16Na Araha God raramohaga hunia
ki hagabângenia, vi teha i pasina na otoha,
vi na parongana ki oto ma ki koro teha ngavê,
suria i surira na kariana igê na otoha.
17Igê na hinua, ga aruhuruhu ngavê,
na sipi binibinikaga ma na kareta ka page ngêngê igê.
18I page era ngavê tangagamu!
Igamu kamu okea hurigamu maremi na hagaitangiha,
suria mu okea tangagamu maremi na eraha
renigi na varo raha ma na varo nganganihaga.
19Igamu kamu uhungia na Araha,
na God iata na Isiraelita, kamu vi:
“Naka vê ke katogi na katoha iana,
hanana igia ke girara na parongana!”
20I page era ngavê tangagamu!
Igamu kamu visigi na marâ era, viga koro,
ma na marâ koro, viga era.
Mu visia na roto hono, vi na mavetana,
ma na mavetana, vi na roto hono.
Mu visigi na marâ, ga mahe, viga mamaki,
ma na marâ, ga mamaki, viga mahe.
21I page era ngavê tangagamu,
mu vi, vigamu tako mataha
ma ka mave na parongami.
22I page era ngavê tangagamu,
mu teha igê na tonoha ni vaini,
ma igê nikâ na ani mu torarigi,
ki raramohaga.
23Ki page era ngavê tangagamu!
Igamu kamu taugi na haga na vatevate igê na kotiha,
hanana vigamu pe hagaitangira na ani ga aharê,
ma kamu pe tamanira na ani, ga pe aharê rârâ.
24Tahema, tagenana mangagi na rauga ma na go maria
ga herumirumi, matena ga nonoro igê na gi,
na vagami ka page kakaga,
na takami ka page maugu,
ma ki ahegenigi na roga,
suria mu usitenigi na hagesuringa,
i vategia na Araha raramohaga hunia,
na God iata na Isiraelita,
i apuna teha ngavê.
25Tahema na Araha ki mangariaga tangara na kariana.
Na rimana ki nanê, hanana i hagaitangira.
Na barani ka page gisigisi,
ma na gahuata na enoni ga me
ka page arata tokora i tara mangagi na roro.
Henaka, ma na mangariaganiha iana na Araha
ki asa vige page hato.
Na rimana ki nanê mênga, hanana i hagaitangira.
26Na Araha ki hagagirarara na me igê na marê hagatê,
hanana viga arâ me.
Ngaia ki vunuhira, hanana viga arâ me
tenigi na ara ni agua i maveta hagenani.
Bâ, ngaira ka garigari ma ka hata ni rêrête me.
27Mareha vê na hitangita, vige memega na apena,
se vige tariahehu, se vige mêruahehu, se vige mêru.
Na gahu ka pe gugubaga.
Na varoni na buti ka pe mumuagani.
28Na mage iata ka mamaniniaga.
Na epage iata ka bani rohegi.
Na misi nêgata na hosi iata
ka gatagata mangagi na hê ahe.
Na wili igê na kati ni me iata
ka ahaporo manga na maguara.
29Ngaira ka ngerengere
ma ka ngurunguru mangara na laione,
ga ranguia na ganiana ma ka torea vê.
Ma ki asa na enoni, vige tahura tenira.
30Igê na tangiana ngekana
ngaira ka page ngunguruhia i Isiraele,
manga na asi i magugu ma ki arobo.
Bâsia na agua: na mengo ma na anumanumaha.
Na roto hono ki gahuia na marara.
Currently Selected:
ISAIA 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
