ISAIA 3
3
Na ai ni Jerusaleme me Juta ka oga purupuru
1Bâ, na Araha, na Araha raramohaga hunia
ki sugi hagamagahurura
na enoni raha ma na ara ni marâ hato,
na ai ni Jerusaleme me Juta ka hagêgurira.
Tenira ngaira ngaia ki page hagamagahurura
na ngêra ma na ve iata,
2na meraha ma na mane ni me iata,
na mane igê na kotiha ma na poropete iata,
na mane ni matuha ma na maneraha iata,
3na maneraha ni me ma na gavumane iata
na mane ni hagaotonga ma ngaira hato na enoni,
ga haritavo ma ka marumaru.
4Na Araha ki page nakara na kere mane,
ga pe tako bâkoro mênga,
ka bêngenira na enoni.
5Na ara ni enoni ka page hagamamasiagara mareta heri.
Na enoni haoru ki asa, vige page hagahigasira na bani nuni,
ma na enoni purua ka page guguruga tangara na enoni raha.
6Igê na matena ngekana
na raraha ki page vi tanga so na goana, ki vivi:
“Igo ko nahunia mênga na gahu.
Vikê gu bêngenigami igê na bagabevoani ngegê.”
7Ma ngaia ki page arami, ki vivi:
“Inê kê usi! I bara vê!
Inê kê pe girara, vi ve tamanigamu.
Inê ka pe tongasiê nogaku na gahu ma na ngêra.
Inê kê usi, ve bêngenigamu.”
8Ua, i page era ngavê tanga i Jerusaleme!
Juta ki vota.
Ngaira ka erasia na Araha
renigi na tamasinga hato iata ma na bagaparongata.
Ngaira ka guguruga bâraha tanga God.
9Na têheniana iata ki page erasira so mareta.
Ngaira ka tasitasi mave mangara na ai ni Sotomo.
I page era ngavê tangara surigi na tauhata mareta.
10Na enoni, ga koro ma ka oto, ka page babarisi,
suria na ara ni marâ ka page râ bâkoro tangara.
Ngaira ka page vagevagesigi na marâ, ga tagara tange.
11Ma ki page era ngavê tangara na enoni erataga,
suria ga page mamasiaga renigi na tarani,
ga katogi tangara na enoni getera.
12Na enoni, ga tagarenigi na haga hagaba,
ngaira ka hagamamasiagara na kariaku.
Ma na ani, ga vatera na kaone, ka hagabekasira.
Kariaku, na maneraha iami ka bêgamu bera.
Tahema igamu kamu tako tugupu.
13Na Araha ki aharaga igê na kotiha,
hanana i tamasigi na suriha iana
renira na kariana.
14Na Araha ki ranganira
na meraha ma na maneraha iata na kariana.
Ngaia ki tamasi vikê tangara, ki vi:
“Igamu nga kamu hanago igê na mu ni vaini,
ma kamu erasia.
Na marâ, mu bani hanagogi tenira na enoni matareha,
ka aharêsigamu i ruma iami.
15I oto tangagamu vari,
vigamu purira so na kariaku?
I oto tangagamu vari,
vigamu hagamamasiagara na enoni matareha?
Ngaia kani gê visia,
inê na Araha God raramohaga huniê.”
Na Araha ki ramonira na gete ni Jerusaleme
16Na Araha ki vi:
“Bâ, na gete i Jerusaleme ka ura haha ngavê.
Ngaira ka arâ paroparo.
Ngaira ka amane tare.
Ngaira ka arâ ririgenigi na kâta.
Na tete ka angarangara i ugata.
17Ma inê be hagaitangira.
Inê be goro bê hurira,
ke rupaturi ma ke maki.”
18Igê na tangiana ngekana
na Araha ki page tavogi râ igê
tenira na gete i Jerusaleme
na ara ni maheta hato, ga paroparo renigi:
na tete i ugata, na tarepuri ma na tahi,
19na mamahe ma na bangabanga ni rima,
20na gahu i bêta ma na rarasê,
na ebo i rimata ma na garo bara,
21na ringi i kakêta ma na eburungi i barisuta,
22na gahu, na tuguni ma na aruhata, ga bâkoro,
ma na kere kato ni haga iata,
23na tuguni maraherahe, ga bâsira ma igê, ma na gahu siki,
ma na gahu, ga hogotenigi i bêta ma i riota.
24Vige sigini koro, ma hete ga sigini era.
Vige hogotenigi na garo bara,
ma hete na ataka ma vê na varo.
Vige bâkoro na varehuta, ma hete i gura na bêta.
Vige tuguni bâkoro, ma hete na tarisigani na gahu.
Vige bâkoro, ma hete na makiha.
25Gete ni Jerusaleme,
na mane iami ka page meme igê na hearihatana,
naka ma ga ramo teha na mane ni me iami.
Igamu kamu page angi ma kamu angiangi maramara
igê na mahera na hinua iami.
26Ma na hinua hagenani ki page manga na gete,
i oga so rupaturi i ano ma ki angi,
suria na hinua ki hihiruga.
Currently Selected:
ISAIA 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
