ISAIA 2
2
Na ramana ki page manasia na maveta
1Ikê na maruteha iana o Isaia, karena o Amose, renirerua i Juta me Jerusaleme.
2I na matena i muri vê
na hungana, i oga igê na Ruma ni Rotu,
ki page akê teha ngavê,
ma ki page teharigi na barani hato i maveta.
Rako na enoni tenigi na agua hato i maveta
ka page tihuri tanga.
3Ma ngaira ka page vivi:
“Nika, ge akê i na hungana iana na Araha
tanga na Ruma ni Rotu iana God,
na Isiraelita ka rahesia.
Ma ngaia ki page hagesurigia
renigi na obaniha iana tangagia.
Ma igia ka page arâ surigi na hagesuringa iana tangagia,
suria na hagesuringa iana na Araha
ki râ me tenia i Jerusaleme, tenia i Sione,
na agua i tamasi igê tangara na kariana.”
4Na Araha ki page hagaotogi
na berarogata na enoni i maveta, ga hevisi.
Na tangaruha ni hearihatana
ngaira ka page katogi renigi na marâ ni tagaraniha i mu,
ma ka page tagarahigi na ora renigi na gira iata.
Na enoni hato i maveta ki hato, vige page heariha nikâ,
se vige hagarêgi nikâ na hearihatana.
5Hoi, na raraha iana o Jakobo,
nika, ge râ suria na tara,
i mavesia tangagia na Araha.
Na enoni paroparo ka page vota
6Araha, igo ko bani kasi renira na kariamu,
na raraha iana o Jakobo.
Renia na haritavo, na maru ma na matuha
tenia i kerekê ma tenia i Pilisitina
ka raramohaga igê na agua hagenani,
suria ga rako na ai mahuara igê.
7Na agua ki vunu renigi na siliva ma na golo,
ma na ruruguha ka rako makira.
Na hosi ma na kati ni me ka aharêsia.
8Na nunuta na ataro ka rako igê.
Na enoni ka vogasigi igê na marâ,
ga tahegi re rimata mareta.
9Siana ko bonotenigi na tasi iata.
Gu hagamakira ma ku hagaruruhi apeta
ngaira hato, na enoni raha ma na enoni purua.
10Mu ahiahi igê na vaba!
Mu ahiahi igê na kiru,
hanana mu gavagava
tenia na mangariaganiha iana na Araha
ma tenigi na raramohana ma na bâbâhana.
11Ta na tangiana ka page hatohato hagetage igê
na enoni, ga paroparo ma ka heruruhi,
ma na Araha ngaia getea ma ka page hagarahasia.
12Igê na tangiana ngekana na Araha raramohaga hunia
ki page kasira so igê na enoni raha hato, ga ramata,
ma na ani ga paroparo ma ka heruruhi.
13Ngaia ki page hatungigi na apinige raha i Libanone
ma na apinige hato, ga raha ma ka gatagata i Basani.
14Ngaia ki page hagahataragi na barani ma na hungani.
15Ngaia ki page hogegi na bebetehe raha
ma na ara ni para ni hinua nganganihaga.
16Ngaia ki page katogi ka kokoro na haka,
naka ma na ani raha ngavê, ga bâkoro.
17Na enoni, ga paroparo ma ka heruruhi,
ka page hato hagetage.
Ma na Araha ngaia getea ma ka page hagarahasia,
18suria na ataro ka page magahuru hagetage.
19Na enoni ka page ahiahi
igê na vaba ma na kiru,
hanana ga gavagava
tenia na mangariganiha iana na Araha
ma tenigi na raramohana ma na bâbâhana,
matena i arâ me ki ngingia na maveta.
20Igê na tangiana ngekana
ngaira ki page kasigi râ igê na nunuta na ataro,
ga tagarahigi renigi na golo ma na siliva,
ma ki page panigi tangara na kiki ma na roke.
21Matena i arâ me na Araha ki ngingia na maveta,
na enoni ka page ahiahi igê na kiru ma na vaba,
hanana ga gavagava tenia na mangariaganiha iana
ma tenigi na raramohana ma na bâbâhana.
22Siana kamu hagêgurira na enoni,
suria ngaira ka girara ga meme.
Na ta kani ngaira?
Currently Selected:
ISAIA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
