HAGONEGAHANI 33
33
Garu hetaruahu o Jakobo mo Esau
1O Jakobo ki bâsia râ o Esau i merarâ me na tangarê ge he na me iana. Vikê ngaia ki voasira na karena tangara ka Lea, ka Ragele ma na gete getererua gi rua iana. 2Ngaia ki nakarerua na gete getererua gi rua iana henira na kareterua, ma hemuri ka Lea henira na karena, ma hemuri tatare ka Ragele henia o Josepo. 3O Jakobo ki nanago tarata. Matena i memênga vige tarahua râ o veogana, ngaia ki bani tubê so i ano hagepi. 4Mo Esau ki tango vurusia, ki ruia ma ki siginia. Ngairerua karu angi tagenaterua. 5Matena o Esau ki sira râ ma ki bâsira na gete ma na kare, ngaia ki hagate, ki vi: “Ti kanigo merarâ me?”
O Jakobo ki arami, ki vi: “Maneraha, na kareku ngegana. God ki koro ngavê tangê.” 6Ma hemuri na gete getererua gi rua henira na kareterua ka ura me ma ka tubê so i ano. 7Ma hemuri ka ura me nogata ka Lea ma na karena, ma hemuri tatare na ahemana o Josepo ma ka Ragele karu ura me ma karu tubê so i ano. 8O Esau ki hagate, ki vi: “Na togoha gê bani tarahura me i tara, tanu hega go kato vikana?” O Jakobo ki arami, ki vi: “Inê kê kato vikana, suria vigê hagakoro obamu.”
9O Esau ki vi: “O vaesiku, ga bani aharêsiê. Nakara ma vê tangago.”
10O Jakobo ki vi: “E, siana. Gu koro aporo hete tangê. Gu aganaria na panepanenga iaku tangago. Tangê inê, matena gê bâsigo, ki tagenana gê bâsia God, suria igo ko komaniê ngavê. 11Gu aganaria nga na panepanenga iaku tangago. God ki koro ngavê tangê ma ki haganahuniê renigi na ara ni marâ ga arariê, vigê nahunira.” O Jakobo ki ama ni togeaga nga tanga, mataro me ki aganaria.
12O Esau ki vi: “Hoi, nika ge râ. Be nanago taramu.
13O Jakobo ki arami, ki vi: “Igo ko girarara na kare ka pe mêa ni râha, ma inê kê takusira nikâ na sipi ma na togoha hekareta. Manga viga hagasusura re râha, henaka ma i rarona na tangiana gi tage, ngaira hato ka page me igê. 14Gu nanago nga taraku. Inê be meramumuri haritagi na togoha ma na kare, gê arâ surira ma ngaira. Inê kê page atata vê nogaku i Etome.”
15O Esau ki vi: “Hoi, manga ngekana, gu nakê, be panira so tani na me iaku henigo.”
Ma o Jakobo ki arami, ki vi: “Inê kê pe tako vikana. Gê obania ma hete, vigê hagakoro obamu.” 16Hoita, igê na tangiana ngekana o Esau ki aporo i Etome, 17ma o Jakobo ki râ i Sukote. I ngekana ngaia ki toregi igê na ruma iana ma na mamaruku tangara na togoha iana. Tahema ga hêtana na aguna ngekana vi Sukote, i vivi ‘Mamaruku.’
18Matena o Jakobo ki aporo me tenia i Mesopotamia, ngaia ki ata bâkoro ma i hinua i Sekemi i Kanani ma ki tagarahia igê na tênga iana tarege tenia na hinua. 19Ngaia ki vuria na mako, na tênga iana ki oga igê, renigi na tangarê gi tage na haga na siliva. Ngaia ki vuria tenira na raraha iana o Hemore, o vaemana o Sekemi. 20Ngaia ki tagarahia na panga na bea ni vogasiha i ngekana ma ki hêtana vi ‘El’, i vivi ‘God.’ Ngaia kani God iana o Isiraele.
Currently Selected:
HAGONEGAHANI 33: KCB
Highlight
Share
Copy

Want to have your highlights saved across all your devices? Sign up or sign in
© 2011 Bible Society of the South Pacific