YouVersion Logo
Search Icon

HAGONEGAHANI 32

32
O Jakobo ki nanê ni metamasi o Esau
1Matena o Jakobo ki uruia na râha iana, tani na angero ka râ me vurusia. 2Matena i bâsira, ngaia ki vi: “Na tênga ni me iana God ikê.” Tahema ngaia ki hêtana na agua ngekana vi ‘Maganaimi,’ i vivi ‘Na tênga iana God.’
3O Jakobo ki hagatorangenira na mane tora tamasinga ka nanago tarana i pasina o Esau, i oga i Seiri i Etome. 4Ngaia ki hagatorara, viga vivi: “Inê Jakobo na kariamu, inê kê hagarongogo Esau na maneraha iaku, vi inê kê bani oga i pasina o Labani ma kê hagarihu vi ve aporo me tariha me i ngekê. 5Inê kê nahunira na puruka, na tonki, na sipi, na goti ma na kare vurivuri. Inê kê vi tangago vê, maneraha, gê hagakoro obamu, hanana go korokoro tangê.”
6Matena na mane tora tamasinga ka aporo me i pasina o Jakobo, ngaira ka vi: “Igami kami râ i pasina o veogamu o Esau. Ngaia ki râ me noga hanana vi megohetarahu. Ngaia ki merarâ me na me iana na tangarê ge he.” 7O Jakobo ki magu ma ki anumanuma. Ngaia ki voasira ka vora gi rua na enoni i merarâ. Tagenana nikâ tangara na sipi, na goti, na puruku ma na kamelo. 8Ngaia ki tako ki vi: “Manga vi i arâ me o Esau ma ki meheariha tani, tani vari ki girara i gavagava.”
9O Jakobo ki nunginungi, ki vi: “God, o viraku o Abarahamo mo vaemaku o Isako karu rahesigo, gu aganariê. Igo Araha go bani vi tangê, kê aporo tanga i pasiku ma tangara na goaku, ma ko vi nikâ, vi na ara ni marâ ka page korokoro tangê. 10Naka ma inê kê pe ararigi na korohamu ma na totosuriha iamu, ma igo ko ama ni hagabângenigi nga tangê, vi inê na kariamu. I nago matena gê tarêhia na ve i Jotano, inê kê matareha ngavê ma kê nahunia ma na vato. Ma i ngekê inê kê nahunirerua na tênga gi rua ninuni. 11Inê kê avarasigo, gu hagatahiê tenia o veogaku o Esau. Inê kê magu ngavê. Inê kê magu, i era ma ki râ me ki megamiheariha ma ki mutegami hato, igami, na gete ma na kare nikâ. 12O girara, i nago igo ko bani surua, vi na ara ni marâ ko katogi ka korokoro tangê, ma ko vi, vigo hagarakonira na raraha iaku, ma ki bara ta na enoni, vige tomanira ga rakorako ngavê mangagi na momogani na one i one.”
13-15O Jakobo ki mêru i ngekana. Matena i tangi me, ngaia ki atera hura tenia na togoha iana na panepanenga tanga o veogana o Esau: na tangarê gi rua na goti hehene ma na tangahuru gi rua na ani mane, na tangarê gi rua na sipi hehene ma na tangahuru gi rua na ani mane, na tangahuru gi oru na kamelo hekareta, na tangahuru ge he na puruka hehene ma na tangahuru gi tage na ani mane, na tangahuru gi rua na tonki hehene ma na tangahuru gi tage na ani mane. 16Ngaia ki voasira hehegitigi ma ki nakara na kariana ka bâsurira hegitigi. Ngaia ki vi tangara, ki vi: “Mu nanago taraku, ma kamu kasikasi bevoa ma kamu arâ tatage.” 17Ngaia ki bonasia na kariana i hagenago, ki vi: “Matena o veogaku o Esau ki tarahugo ma ki hagatego ki vivi, ‘Ti na maneraha iamu? He go arâ igê? Ti na avanuta na togoha go bâsurira ko mumurira,’ 18hoi, gu aramia, ko vivi, ‘Ngaira ka na togoha iana o vesimu o Jakobo. Ngaia ki panegenira tangago, suria igo o Esau ka na maneraha iana. O Jakobo ngaia me i muri.’” 19Ngaia ki bonasia vikana nikâ na ruata na kariana, na oruta ma ngaira hato na ani ga bâsurira hehegitigi na togoha, ki vi: “Matena mu tarahua o Esau, mu vivi nga vikê: 20‘Na kariamu o Jakobo ngaia me i muri.’” O Jakobo ki tako ki vi: “Hagare. Inê hagakoro obana vari renira na panepanenga, ma na matena gê tarahua, ngaia vari ki page koro aporo tangê.” 21Ngaia ki kasira vê na panepanenga ka nanago ma ngaia ki mêru so igê na tênga.
O Jakobo ki mehenguringuri ta na mane
22Igê na bungiana ngekana o Jakobo ki rite, ma ki merarâ kaniana gi rua ma na gete getererua gi rua iana ma na karena tangahuru matare tage ma ka tarêhia na ve i Jaboke. 23Matena i kasira tarê hato, ngaia ki kasira tarê nikâ na ara ni nahuninga hato iana, 24ma ngaia getea ki oga so tenira.
Ma ta na mane ki râ me ma ki mehenguringuri rârâ mataro me ki sugi tangi. 25Matena ngaia na mane ki girara vi bara tanga vige ramo teharia o Jakobo, ngaia ki tahuru pirasia na suri apirana. 26Na mane ki vi tanga o Jakobo, ki vi: “Nakê be râ. I tangi noga.”
O Jakobo ki aramia, ki vi: “I asa,
nga noga go hagabângenia na korohamu tangê.”
27Na mane ki hagate, ki vi: “Ti na atamu?”
O Jakobo ki arami, ki vi: “Inê o Jakobo.”
28Na mane ki vi: “I hato vige hêtamu nikâ vi o Jakobo. Igo ko meraheariha God ma na enoni ma ko teharira. Tahema ge hêtamu vi o Isiraele, i vivi ‘Meheariha God.’”
29O Jakobo ki vi: “Gu visia me na atamu!”
Ma ngaia ki arami, ki vi: “Tanu hega ko obania, vigu girara na ataku?” Ma hemuri ngaia ki hagabângenia na korohana tanga o Jakobo.
30O Jakobo ki vi: “E, inê bâsia God ma inê kê pe me.” Tahema ngaia ki hêtana na agua ngekana vi Peniele, i vivi ‘Na maana God.’
31Matena i raboa me na arito, o Jakobo ki râ pania i Peniele. Ngaia ki abogo, suria i atasi na suri apirana. 32Rârâ ki tariha me i ngekê, na raraha iana o Isiraele ke pe ngaua na varogina igê na suri apirana na ganiana, suria na mane ngekana ki tahuru pirasia na suri apirana o Jakobo.

Currently Selected:

HAGONEGAHANI 32: KCB

Highlight

Share

Copy

None

Want to have your highlights saved across all your devices? Sign up or sign in