2 MANERAHA 21
21
O Manase na maneraha i Juta
(2 Sihonga 33.1-20)
1O Manase ki tonga na tangahuru matarerua na harisi iana, matena i vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru gi rima matara gi rima. Kenana kani ka Gepesipa. 2O Manase ki murisigea na Araha, suria i râ surigi na bagatauhata na enoni ahuroto, na Araha i bani tarigenira hura tenia na agua tarata na kariana. 3Ngaia ki tagarahigi aporo na agua ni vogasiha ni ataro, i bani ruhuruhugi o Hisikia o vaemana. Ngaia ki tagarahigi na bea ni vogasiha tanga o Bala na ataro ma ki tagarahia na nununa ka Asera na ataro, tagenana manga o Agaba na maneraha i Isiraele. O Manase ki rahesigi nikâ na higu. 4Ngaia ki tagarahigi na bea ni vogasiha ni ataro i ruma ni rotu, na ruma na Araha i bani naka hete tanga viga rahesia ma igê ngaia. 5Igê na beraro gi rua ni ruma ni rotu ngaia ki tagarahigi igê na bea ni vogasiha tangagi na higu. 6Ngaia ki susu igê renia o karena. Ngaia ki hagatera na ataro ma ki harikua ma ki hagatera na enoni ni girarasiha ma na nunuta na enoni ga bani me. Ngaia ki tasi ngavê i maana na Araha ma ki hagamangaria. 7Ngaia ki hagêrasia na nununa ka Asera na ataro i ruma ni rotu, na ruma na Araha i bani tamasi renia tangarerua o Tavite ma o Salomo o karena, ki vi: “Ikê nga i Jerusaleme, i rarona nga na ruma ni rotu ikê, ngaia nga ka na agua gê bani atea tenigi na apaneni hato iata hehegitig na varo ninuni tangahuru matarerua iana o Isiraele. Ngaia nga ka na agua ga rahesiê igê inê. 8Ma ki manga na Isiraelita ma ka marupegi na ramata hato iaku ma na ramata hato o Moise na kariaku i bani vatera renigi, hoi, inê ki asa vi ve page nakara na merongata ke tarigenira hura tenia na agua, gê bani haganahunira na êvarita renia.” 9Ma na ai ni Juta ka murisigea na Araha ma o Manase ki hagatasira ka tasi raha ngavê teharira na enoni ahuroto, na Araha i bani tarigenira hura tarata na kariana.
10Na Araha ki tamasi i harata na poropete na kariana, ki vi: 11“Na maneraha o Manase ki bagaparongana ngavê teharira na Kananita. Ngaia ki hagatasira na ai ni Juta renigi na nunuta na ataro. 12Tahema inê na Araha God iata na Isiraelita kê page naka na bagabevoana raha ke tarahurerua i Jerusaleme me Juta, hanana na enoni ga rongorongo tarohana, ka konekone ngavê. 13Inê kê page hagaitangia i Jerusaleme tagenana manga i Samaria, tagenana manga o Agaba na maneraha i Isiraele henira na raraha iana. Inê kê page sinoa i Jerusaleme ki matarotaro ngavê renira na enoni igê, ki matarotaro manga na apira ga tanania hato ma ka buhingenia. 14Inê kê page nakara vê na enoni ga page tahi ma kê page tagarenira tangara na merongata, ga page henahuraura ma ka page rurugua ngavê na apanena iata. 15Inê kê page katora vikana na kariaku, suria ngaira ka murisigeê ma ka hagamangariê haganega me tenia na matena na êvarita ka hura tenia i Esipito mataro me i ngekê.”
16O Manase ki mutera rako ngavê na enoni koro ma na gaputa ki tata berabera surigi na tara i Jerusaleme. Na nahunga ninuni ngekê ki hagapuria akê na bêngeniana na ai ni Juta ka rahesira na ataro. Vikana ngaia ki katora na enoni ka murisigea na Araha.
17Na tauhana hato getigi o Manase henigi na bagatauhana ka bani segegi so igê na buka ni sihonga renira na maneraha i Juta. 18O Manase ki me ma ka bagia i mu ni hagamahe, na mu iana o Usa, i mataro râ igê na ruma raha iana na maneraha. O Amone o karena ki maneraha urusia.
O Amone na maneraha i Juta
(2 Sihonga 33.21-25)
19O Amone ki tonga na tangahuru gi rua matarerua na harisi iana, matena i vora re na maneraha i Juta. Ngaia ki oga i Jerusaleme ma ki marungia i Juta surirerua na harisi gi rua. Kenana kani ka Mesulemeti, ka karena o Garusi i hinua i Joteba. 20Ngaia ki murisigea na Araha manga o Manase o vaemana. 21Ngaia ki râ surigi na bagatauhana o vaemana ma ki hagarapera na ataro iana o vaemana. 22Ngaia ki kitenia na Araha God iata na êvarina ma ki aharêngigi na ramata iana na Araha.
23Na mane ni hagaotonga iana ka harikato renia ma ka nahuia ki me i ruma raha iana. 24Na ai ni Juta ka nahuira ka me na mane ga nahuia ki me o Amone ma ka atea o Josia o karena ki maneraha.
25Na tauhana hato getigi o Amone ka bani segegi so igê na buka ni sihonga renira na maneraha i Juta. 26Ga bagia o Amone igê na matahu i mu ni hagamahe iana o Usa. O Josia o karena ki maneraha urusia.
Currently Selected:
2 MANERAHA 21: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
