2 MANERAHA 22
22
O Josia na maneraha i Juta
(2 Sihonga 34.1-28)
1O Josia ki tonga na harisi ge varu iana, matena i vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru gi oru matare tage. Kenana kani ka Jetita ka karena o Ataia i hinua i Bosakate. 2O Josia ki hagakoro obana na Araha. Ngaia ki amake suria na maneraha o Tavite na êvarina ma ki marupegi maninga na ramata hato iana God.
3Matena o Josia ki maneraha noga surigi na harisi tangahuru matare varu, ngaia ki hagatorangenia o Sapane na mane ni segesegeha iana, karena o Asaliahu ma o vesina o Mesulama, ki râ i ruma ni rotu. 4Ngaia ki bonasia, ki vi: “Go arâ i pasina o Gilikia na mane ni vogasiha i teha ma ko tarahua tenia, vi na haga gi hita kaniga tavogi na mane ni vogasiha ga tagara i maana na ruma ni rotu, tenira na enoni. 5Go vi tanga, ki vatera na haga na mane ga basuria na surungiana ni ruma ni rotu. Ngaira ki tuguhira viga vurira re, 6na mane totora ruma, na mane ga bâsurigi na tagaraha ni ruma, ma na mane ga pangapanga na apê renigi na hê, ma ka vurivuri re na apinige ma na hê tanga na surungiana. 7Na mane ga bâsuria na tagaraha, ka bâsurigi maninga ngavê na haga, hanana i pe araria vige bâbâ igê, manga i he ki huhura na haga.”
8O Sapane ki torea na tamasinga iana na maneraha tanga o Gilikia. O Gilikia ki hagarongoa, vi ngaia ki tarahua na buka na ramata i ruma ni rotu. O Gilikia ki vatea o Sapane na buka ma o Sapane ki tomania. 9Hemuri ngaia ki aporo i pasina na maneraha ma ki hagarongoa, ki vi: “Na kariamu ka bani tavogi na haga i ruma ni rotu ma ka bani vatera na mane ga bâsuria na surungiha.” 10Hemuri ngaia ki vi: “O Gilikia ki vateê na buka. Ngaia kani ikê.” Ma ngaia ki tomania raha tanga na maneraha.
11Matena na maneraha ki rongoa hato na tomatomaha igê na buka, ngaia ki tarisigi na tuguni iana, suria i anumanuma. 12Ngaia ki bonasira o Gilikia na mane ni hagarahenga o Agikama karena o Sapane, o Akabore karena o Mikaia, o Sapane na mane ni segesegeha iana ma o Asaia na kariana, ki vi: 13“Mu arâ kamu hagate surigia i pasina na Araha inê ma na enoni hato i Juta, renigi na hagesuringa i na buka ikê. Na Araha ki mangariaga tangagia, suria na êvarika ka pe marupegi na ramata i na buka ngekê.”
14O Gilikia, o Agikama, o Akabore o Sapane ma o Asaia ka râ ka hagatea ka Guluta na poropete, i oga i na apanena haoru na hinua i Jerusaleme. O vaniana ka no Salumu karena o Tikiva ma o vesina o Garagasi. O Salumu ki bâsurigi na gahu tanga na hagarahenga i ruma ni rotu. Ngaira ka hagarongoa ka Guluta renigi na tarani i vora me. 15Ngaia ki vi tangara, ki vi: “Mu aporo i pasina na maneraha, 16ma kamu hagarongoa renia na tamasinga iana na Araha, i vi, ‘Inê kê page hagaitangia i Jerusaleme ma na enoni hato igê, manga i bani visia na buka i tomania na maneraha. 17Ngaira ka kiteniê ma ka vogasira ma na ataro. Tahema ngaira ka hagamangariê renigi na bagatauhata. Na mangariaganiha iaku ki tâ nga tanga i Jerusaleme. 18Tanga na maneraha, inê na Araha God iata na Isiraelita, inê kê vi vikê: Igo ko bani rongogi na tamasinga igê na buka 19ma ko bani urisi parongamu ma ko ruhigo maremu i maaku, matena go tarisia na tuguni iamu ma ko angi, suria go rongoa, vi manga i he kê haganunu, vigê hagaitangia i Jerusaleme ma na enoni igê. Inê kê page katoa ki bâbâ mamagutaga. Ngaira ka page hearange renia na atana. Ma inê kê bani aganaria na nunginungiha iamu. 20Na hagaitangiha gê bani naka tanga i Jerusaleme ki page voravora me i murina go meme igo. Igo ko page meme bâkoro.’”
Hoi, na mane ka meaporo na tamasinga ngekê tanga na maneraha o Josia.
Currently Selected:
2 MANERAHA 22: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific