2 ESETARASE 8
8
1Na angero ki arami, ki vi: “God raramohaga hunia ki hagavora na maveta ikê tangara rako na enoni, ma na maveta i hemuri me tangara ta kereani ma. 2Esera, nakê be vatego na hagararinga. Manga go hagatea na maveta, ngaia ke girara ge hagarongogo, vi ngaia ki hagavoragi rako ngavê na makoni na mako tangagi na apira ma na momo na golo ki sisite ma. Na maveta i ngekê ki tagenana ma henia. 3God ki hagavorara rako ngavê na enoni ma ta kereani ma kaniga page tahi.”
O Esera ki nungia God tangara na kariana
4Inê kê tako, kê vi: ‘Inê be garia nga na takoha mataha, hanana ve nahunia na aitangisiha. 5Ga kasiê i maveta ikê ma ka pe rongoê hagenago, ma inê kê page pania na maveta ikê, hanana gê pe obania vikana. God ki nakagi tangê na kere harisi pe rako, hanana vigê mauri surigi.”
6Tahema inê kê nunginungi, kê vi: “Araha God, gu nakê inê na kariamu purua, be nungigo vikê. Gu hasia ta na marâ i pasimami ma ku naka ke akê mataro me ki hunguhungu renigi na aitangihamami ma na parongamami haoru, hanana igami na enoni erataga kami nahunia na mêriha. 7Na buka apuna ki vi, vi igo getego ma ko God ma ko hagavoragami igami hato. 8Igo ko votoa na mêriha ma ko ratoa na apena na enoni renigi na rimana ma na êgana. Igo ko hagatotoa i obana kenana, ma ki gâga bâkoro i ngekana igê na gi ma na ve. Na apena go hagatotoa ki gâga i obana kenana surigi na hageha gi siva. 9Igo getego ma ko anumasirerua maninga na anga ni kare, i anumasia na apena na kare, ma na apena igê, hanana i gâga bâkoro. Hemuri, matena na anga ni kare ki apara na kare, go hagatotoa igê, 10igo ko bonasirerua na susuna na apena na gete karu vunuvunu renigi na tavoni. 11Na kare gari go hagavora, ko hagangêa noga vikana ma hemuri ko ama ni marupea nga renia na takiha iamu. 12Igo ko bâsuria na enoni, hanana i hagakoro obamu, ko hagesuria renigi na ramata iamu ma ko hagaotoa renia na takoha mataha iamu. 13Igo nga kanigo hagavora. Tahema, manga vi igo ma ko obania, igo ko girara go tavoa râ na mêrihana tenia, se go hagamarumungenia ki ama ni mauri nga. 14Ma suria go agana tare ko hagamesia na enoni, na tamasinga iamu ki bani hagavora maninga, tanu hega kani vora me?
15Hoi, Araha, be vi nga vikê: Igo nga ko girara vari, vi na ta kani koro tangara na enoni hato getera i maveta, ma tangê inê, inê kê angi maramara renira na kariamu igo. 16Inê kê takoha bâraha ma kê hetaki bâraha renira na kariamu maremu na Isiraelita, na raraha iana o Jakobo. 17Tahema inê kê obania be nungigo tangara ngaira ma tangê so inê nogaku, suria gê girara, vi igami hato mi oga i maveta ikê, kami bani tasi. 18Ma kê bani girara, vi na suriha ki sugi tarahugami. 19Hoi, gu rongoê ma ku aganaria na nunginungiha iaku.”
Na nunginungiha iana o Esera i nago tarana God ki torea akê i pasina ki haganega ikê. Ngaia ki nungi vikê. 20“Araha, igo ko mauri tare ma na avorana akê na vavearo ka na animu. 21Na atohamu ki bâkoro ngavê teharigi na ara ni takoha hato iamami. Na bâbâhamu raha ki raha teharia na aitangisiha iamami. Na bera na angero i pasimu ka ura ka tatata i maamu. 22Ngaira ka nanê, ka maramara roga se na gi, manga go bonasira. Na tamasinga iamu ki monari tare ki bê ki arâ. 23Na bonasiha raramohaga iamu ka katogi na marâ ga mamagutaga. Igo ko sira râ ma ma na rutuni na asi ka mamata, ma ko hagaronogi na hungani renia na mangariaganiha iamu. Na monariha iamu ki gâgâ hagahu. 24Araha, igo ko hagavorê ma inê ka na kariamu. Tahema gu aganaria na nunginungiha iaku. 25Inê ki asa be muni mataro me kê meme ma kê hagatasia na aitangisiha.
26Siana ko takusigi tare na tasi iata na kariamu, ma ku takusira hete na ani ga bani totosurigo. 27Siana ko botage renira na enoni erataga henigi na bagatauhata, ma ko botage renira hete na ani ga bani râ suria na suruheri iamu, henaka vi ngaira ka mamasiaga ngavê. 28Siana ko takusira na ani ga bani haritohego igê na ogaha iata hagenani, ma ku takusira hete na ani ga tamasi ageagesigo vi igo ko God iata. 29Siana ko mutera na kariamu, suria vi na enoni getera ka pe oga manga vige marisita hete enoni ma ka oga mangara na o. Ma ku takusira hete na ani ga bani hagesurira bâkoro ngavê na enoni renigi na ramata iamu. 30Siana ko mangariaga tangara na ani go takusira viga era teharira na o, ma ku takuira hete na ani ga hagêguritogo tare renigo, God raramohaga hunigo.
31I monari, igami ma na êvarimami kami bani hagabângenia na ogaha era, i hagaokea me na mera, ma surigami igami na enoni tasi, tahema ga visigo vi igo ko hetaki. 32Ga page visigo nga, vi igo ko hetaki monari, manga vi igo ma ko atea vigo takigami, igami na enoni tasi, mi bagaparongamami me tare. 33Na ani ga tê viteamu, ngaira ka page nahunigi na meta meni na tauhata koro, ga bani nakagi i pasimu.
34Na enoni na ta kani ngaira? I ararigo vari vigo mangariaga tangara? Na enoni ga girara ga meme na ta kani ngaira? I ararigo vari vigo obâbaera tangara? 35Ka be tamasia na monariha. I mareha rârâ ta na enoni vige vora me i maveta ma ke pe tasi. I mareha rârâ ta na enoni i mauri, vige pe erasia rârâ ta na marâ. 36Tahema, Araha, na enoni ka page girararerua na otohamu ma na korohamu, manga vigo takira na ani ga pe rurugi na tauhata koro i pasimu.”
37Na Araha ki aramiê, ki vi: “Ta agua na tamasinga iamu ki oto ma na marâ ka page akê me manga go bani visigi. 38Igo ko girara nga, vi na takoha iaku ki asa vige page râ tangara na enoni ga tasi, se vi manga i he ka vora me, se vi tanga na mera, na suruha se vi na hagamagahurunga iata. 39Ma inê kê page vagevagesigi hete na voraha me iata na enoni koro, na ogaha iata i maveta, na tahingata ma na meta ga page nahunigi. 40Na marâ ka page akê me nga manga gê bani visigi. 41Na mane i tagara i mu, ki kasigi rako na maani na ngêra, ma na matena ga bani akê me, ngaia ki hasigi na ani rako, ma ki mareha vi ngaigi hato kani vige vagavagaraga se vige akê me igê na matena tange. Na maveta ki manga ngekana nikâ. Mareha vi ngaira hato ga oga i maveta ikê kani vige page tahi tagenata.”
42Hoi, inê kê vi: “Gu nakê nga be tamasi. 43Na maani na ngêra na mane i hasigi ki asa vari vige akê me, suria go pe hagarangisigi igê na matena tange, se na rangi ru vari ke erasigi. 44Ma na enoni ka tora getera. Igo ko maningaira renigi na rimamu maremu. Igo ko hagavorara ka maratoramu, ma ko hagavorara na ara ni marâ hato, hanana ga tamanira. Manga i he kani go girara vigo hagakitara henigi na maani na ngêra, na mane i hasigi? 45I bara ngavê, Araha God! Gu hagatahira na enoni na animu maremu. Gu takira. Gu takira na enoni go bani hagavorara.”
46Na Araha ki arami, ki vi: “Na matena ngegê kani tangara na enoni ga oga i ngekê, ma na maveta i hemuri me kani tangara na enoni ga page oga i hemuri me. 47Igo ki asa vigu takuira na enoni gê hagavorara, tehariê inê, gê takuira. Siana hagetage ko visigo maremu nikâ, vi igo ka na hitangita na enoni erataga, manga go bani tako me hagarako vikana. 48Inê kê vagevage bâraha, 49suria igo ko haritagi maninga ma ko pe tamasi paroparo, vi igo ka na enoni koro. 50Na enoni ni maveta ikê, ga paroparo igê na ogaha iata ma ka kasira akê mareta, ngaira ka page hatamigi raha na mamasiaganiha igê na hagahato tangiani. 51Hoi, Esera, gu takusigi hete na marâ koro ga oga tangagamu, igo ma na ani ga maratoramu. 52Tangagamu hato na Paratiso ki tahataha, na apinige ni mêriha ki bani akê, na maveta i hemuri me ki bani nanê, na ara ni marâ mu obanigi ka bani oga, na hinua iaku ki bani uhu, na mamaroha tarema tenigi na tagaraha raha henigi na mamasiaganiha, ki nanê, na koroha ma na takoha mataha karu bani oga hagenani. 53Na hunana na eraha ka bani puru hagabarasia, hanana siana ki tarahugamu. Na maeha hato ka bani magahuru, na mera ki bani hato, na agua ni hagaitangiha ki bani magahuru, na eraha ma na hagaparunga karu bani hato. 54Na mamasiaganiha hato ka bani hato ma na tarana koro ngavê ki bani hura mave me nga, ngaia ka na enoni ki asa vige meme.
55Tahema siana ko hagate nikâ renira na enoni rako teha ngavê ga pe tahi. 56Suria, matena i akê me na matena iata ni ateha, ngaira ka ruhia God raramohaga hunia, ka kikitenigi na ramata iana ma ka usi vige tê viteana. 57Ma nikâ ngaira ka hagamamasiagara na kariana koro God. 58Ngaira ka tako i obata, ka vi, vi God ki pe gâgâ, henaka ga girara, vi ngaira ka page meme. 59Ngekana na vagevageha, gê bani visigi ka oga tangagamu, ma na mamatahaniha ni rio ma na mamasiaganiha karu tangara ngaira. Ma God raramohaga hunia ki pe obania ta na enoni vige pe tahi. 60Ngaia ki hagavorara na ara ni enoni hato ma ki hagarêa na mêriha tangara ngaira hato, ma ngaira, i hagavorara, ka hagaerasia na atana na ani i hagavorara ma ka pe visia koro na ani i votoa na mêriha tangara. 61Tahema na tangiana gê page surira igê ki hagarangi me noga. 62Inê kê bani hagarongogamu igo ma ta kereani ga maratoramu renia na tarana ngekê ma ki mareha vi na enoni hato.”
Na girarana na hagahato tangiani
63Inê kê arami, kê vi: “Araha, igo ko bani hagagirarê renigi na girarani go page katogi igê na hagahato tangiani ma ko pe hagagirarê, vi manga i he kani gê girara vi i na keta kani page voravora me igê.”
Currently Selected:
2 ESETARASE 8: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific