2 ESETARASE 4
4
I bara na enoni vige aitangisigi na tauhana God
1Na angero Uriele, God i bani hagatorangenia me tangê, ki arami, ki vi: 2“Igo ko takusia vari, vi igo ko girara go aitangisigi na tauhana God raramohaga hunia? E, igo ki mareha ngavê, vigu aitangisigi na tarani ga akê me i maveta ikê!”
3Inê kê arami, kê vi: “Angero inê kê aitangisigi!”
Na angero ki arami, ki vi: “God ki hagatorangeniê, hanana gê hagatego renigi na hagatenga gi oru renigi na tarani ga akê me i maveta ikê. Ma igo nga ko aramigi. 4Manga igo ma ko girara vi go aramia na ani gi tage ma na hitangini, hoi, inê kê aramigi na hagatenga iamu renigi na tauhana God ma kê hagagirarago vi manga i he na teniha era kani oga igê na aitangihata na ara ni enoni hato.”
5Inê kê arami, kê vi: “Hoita, angero.”
Na angero ki vi tangê, ki vi: “Hoi, manga i he kanigo hagararingenia na kilo gi tage na higahigana na gi? Manga i he kanigo hagararingenia na higahigana na roga? Manga i he kanigo torea aporo me na tangiana i bani hato?”
6Inê kê arami, kê vi: “Tanu hega kanigo hagateê renigi na hagatenga ga bara ngegana? I mareha rârâ ta na enoni vige girara ge aramigi!”
7Hoi, ngaia ki vi: “Manga vi inê ma be hagatego ma, vi gi hita na ruma kani i na porona na asi? Gi hita na ve kaniga gogo ka hetakutaku henigi na ve i ruguhana na maveta? Gi hita na ve kaniga oga i avorana na vavearo? I he nga na teha, ga huhura igê tenia na agua iata na enoni ga me? I he nga na teha ga bêbanu igê tanga na Paratiso? 8Manga vi ve hagatego renigi ma na hagatenga ngegana, vari igo ku bani aramiê, ku vi: ‘E, inê ki mareha rârâ vi ve so igê na ve i ruguhana na maveta. Inê kê mamênga vi ve bêbanu igê na agua iata na enoni ga me. Inê kê ki mareha rârâ vi ve akê i vavearo.’ 9Bâ, inê kê hagatego ma renigi na roga, na gi ma na tangiana i nanora i bani hato. Ngaigi ka na marâ go bani giraragi. 10Ma igo ko pe girara vigu aramiê. E, igo ko pe aitangisigi rârâ na marâ ga bani oga me henigo tenia na matena go sisite. 11Manga i he na kere takoha iamu kani vi girara i aitangisigi na tauhana God raramohaga hunia? I hega, na enoni, na maveta erataga ki bani hagaerasia, ngaia ki girara vari i aitangisigi na tauhana God, i asa vige erataga?”
Matena gê rongo vikana, inê kê susure kê tubê so kê puru i ano. 12Inê kê vi tanga na angero, kê vi: “Igami kami gahanita kanimi vora me, suria na ogaha iamami i maveta ni tasi ma ni mamasiaganiha ki era ngavê, suria igami kami pe aitangisia, vi manga i he kaniga akê me na tarani, manga vi hanani ge akê me.”
13Na angero Uriele ki arami, ki vi: “I ta na tangiana inê kê râ i bemu ma kê rongora na apinige ga harikato. 14Ngaira ka vi: ‘Nika, ge râ ke meheriha na asi ma ke bugurenia bê aporo taraka.’ 15Ma na navo na asi ka harikato nogata, ka vi: ‘Nika, ge parênia na bemu taraka.’ 16Ma na apinige ka harikato hagaborâ ma, suria na gi ki râ me ma ki ngêgi hato. 17Ma na asi ki harikato hagaborâ ma nogana, suria na one ki gatagata pusia vige banu me. 18Hoi, manga go surirerua ma ko hagakitakitagi na berarogaterua, na ani ta na hitangiterua kani oto?”
19Inê kê arami, kê vi: “Ngairerua tagenaterua karu pe oto, suria na apinige kani tanga ma na bemu ma na navo na asi kani tanga ma na asi.”
20Na angero ki arami, ki vi: “Go vi koro. Hoi, tanu hega kanigo pe girara na aramiha tangagi na hagatenga ga takego so igo maremu? 21I tagenana ma na apinige ka tanga ma na bemu ma na navo ka tanga ma na asi, na ani i maveta ikê ka girara ga aitangisigi ma na tarani ga akê me i maveta ikê, ma na ani i vavearo ka girara ga aitangisigi ma na tarani ga akê me i vavearo.”
Na suriha raha
22Inê kê hagatea na angero, kê vi: “Gu visia me tangê. Tanu hega kanigê girara vigê aitangisia ta na marâ? 23Inê kê pe obania vi ve hagate renigi na tarani ga akê me i vavearo. Inê kê obania ma hete, vigê hagate renigi na tarani ga akê me i pasimami i maveta ikê. Tanu hega God kani nakara na enoni i na agua getigi ka hagamakira na Isiraelita? Tanu hega kani naka mavê i Isiraele i takuia, ki vota igê na raramohata na enoni ahuroto i na agua getigi? Tanu hega na ramata ma na suruheri, God i bani vatera re na êvarimami, kaniga bani vora re na marâ purua ma i ngekê? 24Tanu hega na mêriha iamami kaniga abubu mangagi na anita na rango se na namu ma na marâ vigana? Tanu hega God kani takusia vi igami kami pe araria na hetakiha iana? 25Tanu hega God kani pe tamanira na kariana marena? Nga na hagatenga gê obania vigê hagate renigi ngegana.”
26Uriele ki arami, ki vi: “Manga vi igo ma ko mauri arihu, igo ko page konekone renigi na tarani go page bâsigi, suria i ngegê ki magahuru rêrê râ nga. 27Na mamasiaganiha ma na tarani ga pe koro ka aharêsia i ngegê. Tahema ngaia ki pe ararigi na ara ni marâ koro hato, God i bani surugi tangara na enoni ga têtê viteana i muri me. 28Na eraha, go hagateê renia, ka bani hasia ma na matena ni reteha ki mamênga. 29Na reteha ni eraha ki akê me nga hagenago ma na maveta ga hasia igê, ki magahuru râ nga hagenago, hanana i kahu girara i akê me na matena haoru tanga na hasiana na koroha igê. 30Igê na haganegahana na maveta na maana gi tage na eraha ka hasia igê na aitangihana o Atama. Bâ, na eraha ki bani rasi teha ngavê! Takusia, ngaia ki ama ni rasirasi nga mataro me na matena ni reteha ma ni tahurunga igê na tangiana ni suriha raha. 31Igo ko bani girara, vi na maana gi tage togo na eraha ki rasirasi teha ngavê. 32Igê na tangiana ni suriha raha karu page era ngavê na reteha ma na tahurunga ni bêni na eraha, i bara vige tomanigi.”
33Hoi, inê kê hagate, kê vi: “Mi nanasi arihu manga i he ma ki kahu akê me na tarana ngekana? Tanu hega na mêriha iamami kani abubu ma na mamasiaganiha ka aharêsia?”
34Uriele ki arami, ki vi: “Siana ko hagatata teharia God raramohaga hunia. Igo ko takusigo so maremu ma, ma God ngaia ki takusira na ara ni enoni hato. 35Na hagatenga iamu ka tagenani ma henigi na hagatenga iata na enoni koro ga bani me ma ka oga igê na agua, God i nakara ka oga nanasi igê. Ngaira ka hagate, ka vi: ‘Igami kami oga taraha ikê? I na keta ka na tangiana ni suriha raha? I na keta kanimi taugi igê na memami?’ 36Na angero Jeremiele ki aramira, ki vi: ‘Igê nga na matena ga page gâga ikê na ara ni enoni hato, ga mamasiaga manga igamu, suria God ki bani hagararingenia na higahigana na matena i ngegê. 37Ngaia ki bani tomanigi na harisi ma na tangiani. I mareha rârâ ta na marâ vige urusi mataro me na matena ngegê i hatongia igê na tara, i tuguhia vi arâ suria.’”
38Inê kê arami, kê vi: “Bâ, angero, igami hato i maveta kami erataga ngavê. 39I hega, i monari, vi na enoni koro ga bani me, ki tuguhira viga naasigi na meta surigi na tasi iamami?”
40Ngaia ki arami, ki vi: “I hega, na gete i obara, ki girara vari i pe apara na karena matena ga bani hatohato na hageha gi siva?”
41Inê kê arami, kê vi: “I bara vê nga!”
Na angero ki vi nikâ: “Igê na agua iata na enoni ga bani me, na agua God i nakara igê na atarota, ki manga na anga ni kare. 42Na agua ngekana ki obania bâraha vi tagarenira aporo na atarota, God ki hagêguria renira haganega me tenia na haganegahana na maveta, manga na gete i obania bâraha vige hato na haraniha ni aparaha. 43Igê nga na matena ngekana igo ko page nahunigi na aramiha tangagi na hagatenga hato iamu.”
44Inê kê hagete, kê vi: “Angero, manga igo ma ko takusia, vi inê kê girara gê aitangisia, i hega, i arari ma, 45vigo visia me tangê ta na marâ nikâ? I hega, na matena i mamênga ma ki borahu teharia vari na matena i bani hato? 46Inê kê bani girara, vi borahu manga i he na matena i bani hato, ma na matena i mamênga me inê kê pe girara.”
47Na angero ki bonasiê, ki vi: “Râ me, ku ura i otoku. Inê be hagabâsigo renia na maruteha ma be ramatenia na girarana.” 48Hoi, inê kê ura hagarangia ma kê bâ, ma kê bâsia na gi i vavata ki ritare i maaku, ma na matena i teha râ, inê kê bâsia na robona i gâga mênga i ngekana. 49Hemuri na roto ni rangi ki ritare i maaku, ma ki rangi ru. Matena i hato na rangi ru na sivosivo ki gâga mênga. 50Uriele ki vi tangê, ki vi: “Gu takorihia. Na rangi ru ki raha teharia na sivosivo i mumuri me, ma na gi ki raha teharia na robona i hita so i muri. I tagenana ma na matena i bani hato ki borahu teharia na matena i mamênga me. Na matena i mamênga me ki mangarerua na sivosivo ma na robona.”
Na girarana na hatongina na maveta.
51Inê kê hagatea na angero, kê vi: “Gu takusia manga vi inê ma kê tahitahi mênga mataro me na hagahatongina na maveta? Manga i mareha, ti kani tahitahi mênga igê na matena ngekana?”
52Ngaia ki arami, ki vi: “Inê kê girara gê hagarongogo renigi tani na girarana na hagahatongina na matena, manga vi igo ma ko hagateê vikana. Ma inê kê pe oga ikê, hanana vi ve hagarongogo, vi manga i he kanigo mauri borahu. Ma inê nogaku kê pe hagare.
Currently Selected:
2 ESETARASE 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific