1 SAMUELE 2
2
Na ki iana ka Hana
1Ka Hana ki nunginungi, ki vi:
“Na Araha ki hagakoro obaku ngavê.
Inê kê vagevagesigi na tauhana tangê.
Inê kê rurusira na merongaku.
Inê kê ageage ngavê, suria God ki tamaniê.
2Na Araha ki apuna teha ngavê.
Mareha rârâ tani vige maratorana.
Mareha rârâ tani vige raramohaga manga God.
3Siana kamu tamasi paroparo.
Siana kamu hagarahasigamu maremi.
Na Araha ki na God i giraragi
na ara ni marâ hatohato
ma ki surigi na parongata na enoni hato.
4Na epage iata na mane ni me ramo ka babaro agani
ma na ani ga pe ramo ka ramo teha ngavê.
5Na enoni i aharêsira na ngêra
ka tagara tangara na enoni getera meni na ngêra.
Ma na ani ga magê ki aharêsira ngavê na ngêra.
Na gete i gomara ki aparara na kare gi pi,
ma na gete i aparara na kare rako ki magari.
6Na Araha ki hagamesira na enoni
ma ki hagamaurira.
Ngaia ki kasira na enoni
igê na agua iata na enoni ga me
ma ki hagaporosira nikâ tenia.
7Ngaia ki katora tani ka matareha
ma tani ka ruruguha.
Ngaia ki kasira so tani
ma ki hagarahasira tani.
8Ngaia ki ragera akê tenia na mako
na ani ga matareha
ma ki hagatahira na ani i bara tangara
tenigi na mamasiaganiha iata.
Ngaia ki katora
ka vora na tamata na enoni raha.
Na atohata ki oga henigi na atohata.
Na Araha ki hagagatagatanigi na gatani na maveta
ma ki naka na maveta ki gatagata igê.
9Ngaia ki anumasigi na ogaha iata na kariana
ma na ani ga haritohea ka magahuru igê na mengo.
Na enoni ki asa vige teha suria vi na raramohana ngaia marena.
10Na merongana na Araha ka page mutemute.
Ngaia ki page gugusuhia hurira tenia na vavearo.
Na Araha ki page suria na maveta hagenani.
Ngaia ki page haganahunia na maneraha iata
renia na ramoha, hanana i tehateha.”
11Hemuri o Elekana ki aporo i Rama ma na kare mane o Samuele ki oga vê i Silo ma ki tamania o Eli na mane ni vogasiha igê na hagarahenga tanga na Araha.
Na bagatauhaterua o karena o Eli
12O karena o Eli ngairerua ka na eragani nuni. Ngairerua karu pe botage renia na Araha. 13Ngairerua karu mane ni vogasiha ma karu pe toto surigi na tarani, hanana vige marisiterua vi ngairerua ka na mane ni vogasiha. Ngairerua karu bonasira na enoni ka votovoto tangarerua teharia manga i visia na ramata. Manga na enoni ma ki tagarenia na vogasiha iana, na kariana na mane ni vogasiha ki merâ me na marâ ni taketakeha na rivona gi oru. Matena na ganiana ki agobo mênga, 14ngaia ki takea so i rarona ma na agua mavê i takegi ngaigi ka na anina na mane ni vogasiha. Na tarana ngekana ki vora me tangara na Isiraelita hato ga râ me i Silo, hanana viga tagarenigi na vogasiha iata. 15Ta na tarana i era ngavê nikâ. Matena ga mamênga vige taugi na êbeni tanga vige susu renigi, na kariana na mane ni vogasiha ki arâ me ma ki bani vi tanga na mane i tagarenia na vogasiha iana, ki vivi: “Vateê me na mavorona na ganiana be hanua tanga na mane ni vogasiha. Ngaia ki pe obania na ganiana i bani mako. Ngaia ki obania ma na ani i maga.”
16Manga na mane ma ki arami, ki vivi: “Naka ke katoa suria na otoha ma ke susu hagenago renigi na êbeni ma ko kahu torea na agua go obania,” hoi, na kariana na mane ni vogasiha ki vivi: “Mareha vego! Vateê me nga! Manga i mareha, inê kê raugi tenigo!”
17Na bagatauhaterua o karena o Eli ngegê ki erataga ngavê i maana na Araha, suria ngairerua ki mareha vigaru hagahigasigi na vogasiha tanga na Araha.
18I na matena ngekana na kere mane o Samuele ki ama ni tagara nga tanga na Araha. Ngaia ki tuguni renia na gahu siki tanga na hagarahenga. 19I na ara ni harisi kenana ki tagarahia tare tani na kere aruha ma ki torea râ tanga, matena i takua o vaniana tanga i Silo, hanana i vogasia na Araha manga bani hanana i na ara ni harisi. 20I na matena ngekana o Eli ki nungia God ki korokoro tangarerua o Elekana ma kaniana, ma ki vi tanga o Elekana, ki vivi: “Renia na gete ikê na Araha ke haganahunigo renira na kare, hanana ga urusia na ani go bani tagarenia tanga na Araha.”
Ma hemuri ngairerua karu aporo i pasiterua.
21Na Araha ki koro tanga ka Hana. Ka Hana ki aparara na kare gi rima nikâ: na kare mane gi oru ma na kere gete gi rua. Na kere mane o Samuele ki raharaha, matena i tagara tanga na Araha.
22O Eli ki gemêa ngavê. Ngaia ki ama ni rongogi nga na bagatauhaterua o karena tangara na Isiraelita. Ngaia ki rongorerua nikâ, garu meramêru na gete ga tagara i maana ruma na ruma na gahu iana na Araha. 23Vikê ngaia ki vi tangarerua, ki vi: “Tanu hega muru kato vikana? Na enoni hato ka hagarongoê renigi na bagatauhamurua. 24O kareku, i hato i ngekê! Na tarana, ga visia na kariana na Araha, ki erataga ngavê! 25Manga ta na enoni ma ki katoa ta na tarana i pe koro tanga ta na enoni, God ki girara i roherohe pusia. Ma ki manga ta na enoni ma ki ruhia na Araha, ti ki girara i roherohe pusia?”
Ma ngairerua karu haritohea o vaematerua, suria na Araha ki bani kato vi nahuirerua karu meme.
26Na kere mane o Samuele ki ama ni raharaha nga ma God ma na enoni ka vagevagesia.
Na hinarunga tanga na ahemata iana o Eli
27Ta na poropete ki râ me i pasina o Eli. Ngaia ki merâ me na tamasinga iana na Araha. Ngaia ki vi: “Matena na êvarimu o Aroni ma na ahemata iana ka vora re na kare vurivuri iana na maneraha i Esipito, inê kê hagagirara o Aroni reniê inê mareku. 28Tenigi na ara ni raraha hato iana o Isiraele, inê kê atera na raraha iana, hanana ga mane ni vogasiha iaku, ka vogasi igê na bea ni vogasiha, ka susu renigi na marâ ga sigini koro, ma ka tuguni renia na anga ni girarasiha, hanana ga garigari takoha teniê. Nikâ inê kê vi, vi i oto tangara, viga nahunia tapanena na marâ ga susu renia igê na bea ni vogasiha. 29Tanu hega igamu, igo ma o karemu, kamu pe hagahigasigi na vogasiha ma na votovoto gê nungigi tenira na kariaku? O Eli, tanu hega, igo ko hagahigasirerua o karemu tehariê inê? Igo nga ko nakarerua karu ngêgi na mavoroni koro na ganiani, na kariaku ka vogasiê renigi, karu binibinikaga renigi. 30I nago, inê na Araha God iata na Isiraelita, inê kê bani surua, vi na ahemata ma na raraha iamu kamu vora re na mane ni vogasiha iaku tare ma tarema. Ma i ngekê kê vi tangago, vi i mareha! Inê be hagahigasira hete na ani ga hagahigasiê inê ma be merongasira na ani ga merongasiê inê. 31Rongo! I sugia ma ve mutera na mane na gapu haoru hato igê na ahemata iamu ma igê na raraha iamu, hanana siana ka gâga ka gemêa na mane igê na ahemata iamu. 32Na bagabevoani ka page tarahugo ma ko page hengarira na ani getera na Isiraelita, suria gê korokoro tangara. Ma igê na ahemata iamu ki asa tani vige page oga rârâ ke gemêa. 33Henaka, ma inê be hagatahia na ani gi tage na hitangita na apaparaha iamu, hanana i voravora re na mane ni vogasiha iaku. Ma ngaia ki page vahagaga na maana ma ki asa vige page tako togo. Ma na apaparaha hato getera iamu ka page meme igê na hearihatana. 34O karemu gi rua o Gopini mo Pinegasi karu page meme igê na tangiana gi tage. Na tarana ngekê ki page hagatanga monari tangago, vi na ara ni marâ gê bani visigi ka page voravora me mave. 35Inê kê page atea ta na mane ni vogasiha, na ani i page tototo suriê ma ki page arâ surigi na ara ni tamasinga hato iaku tanga. Inê kê page katoa ki heheuri tare na apaparaha iana, hanana ga page tagara tare i maana na maneraha, gê page atea. 36Na anima na hitangita na apaparaha iamu, i page tahitahi vari, ngaia ki page arâ nga i pasina na mane ni vogasiha ngekana, hanana i nungia renigi na haga ma na ngêra. Ngaia ki page baganunungira na mane ni vogasiha, hanana viga naka ki tamanira meni ngêra.”
Currently Selected:
1 SAMUELE 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
