1 SAMUELE 3
3
Na Araha ki atea o Samuele
1O Eli ki hagaotoa na kare mane o Samuele igê na tagaraha ni vogasiha tanga na Araha. I na mateni ngegana na Araha ki tamasi ma ki hagamarutera na enoni i ta na matena ma. 2O Eli ki sugi vahagaga ngavê na maana. I ta na bungiana ngaia ki mêru i na kiboru iana. 3O Samuele ki mêru i na kiboru apuna i oga igê na bokesi na suruheri iana God. Matena igê na hagahogotana ngavê matena na laiti ki tarê mênga, 4na Araha ki unia o Samuele. O Samuele ki arami, ki vi: “Oi, Araha!” 5Ngaia ki tango râ i pasina o Eli ma ki vi: “Igo kanigo uniê? Inê ikê!”
O Eli ki arami, ki vi: “Inê kê pe unigo. Aporo ku mêru.” Vikê o Samuele ki aporo ki mêru.
6Na Araha ki unia nikâ o Samuele. Vikê o Samuele ki aharaga, ki râ i pasina o Eli ma ki vi: “Igo kanigo uniê? Inê ikê!” Ma o Eli ki arami, ki vi: “Mareha, kareku. Inê kê pe unigo. Aporo ku mêru.”
7Na kere mane o Samuele ki pe girara, vi na Araha kani unia, suria ngaia ki na matena na Araha ki kahu tamasi moramora tanga igê.
8Na Araha ki unia o Samuele na oruta na matena. O Samuele ki aharaga, ki râ i pasina o Eli ma ki vi: “Igo kanigo uniê? Inê ikê!”
Hoi, o Eli ki kahu tahetara, vi na Araha nga kani unia na kere mane. 9Tahema ngaia ki vi tanga, ki vi: “Aporo ku mêru! Ma ki manga vi unigo nikâ, go vivi, ‘Araha, gu tamasi. Na kariamu kani inê gê karingago.’” Vikê o Samuele ki aporo ki mêru.
10Na Araha ki râ ki ura so i ngekana ma ki unia nikâ manga i nago, ki vi: “Samuele! Samuele!”
O Samuele ki arami, ki vi: “Araha, gu tamasi. Na kariamu kani inê, gê karingago.”
11Na Araha ki vi tanga, ki vi: “I ta na tangiana inê kê page katoa ta na tarana tangara na Isiraelita. Na tarana ngekana ki page hagamagusira ngavê. Na ani mavê na enoni i rongoa ki page anumanuma ngavê. 12I ngekana inê kê page hagamonarigi tangara na ahemata iana o Eli na ara ni hinarunga hato iaku, mareha vige hitahita râ tani. 13Inê kê bani vi tanga o Eli, vi inê kê page hagaitangia na ahemata iana tare ki bê ki arâ, suria o karena karu tamasi erasiê. O Eli ki bani girararerua garu kato vikana ma ki pe ura pusirerua. 14Tahema inê kê tohe, vi i mareha rârâ na vogasiha se vi na votovoto, ge girara vige hagamagahurua tenira na ahemata iana o Eli na hagaitangiha meni na bagatauhata.”
15O Samuele ki tâ so i banana mataro me ki tangi. Hemuri ngaia ki aharaga ma ki tangahigi na maani ruma i ruma iana na Araha. Ngaia ki magu, hanana vige hagarongoa o Eli renia na maruteha iana. 16O Eli ki unia, ki vi: “Kareku Samuele.”
O Samuele ki arami, ki vi: “Oi, inê akê.”
17O Eli ki hagatea, ki vi: “Na ta ki visia tangago na Araha? Siana ko pinihia ta na marâ teniê. God ki page hagaitangigo ngavê, manga vigo pinihia ta na marâ teniê.” 18Vikê o Samuele ki hagarongoa renigi na ara ni marâ hato. Ngaia ki pe pinihia rârâ ta na marâ. O Eli ki vi: “Na Araha ngekana. Ngaia ki page katogi na tarani i takusigi vi oto ngavê.”
19O Samuele ki raha ki râ. Na Araha ki ngahisia ma ki hagamonarigi na ara ni marâ i visigi o Samuele. 20Vikana na Isiraelita hato suria na apanena hagenani ka girara, vi i monari o Samuele ki na poropete iana na Araha. 21Na Araha ki ama ni voravora nga me i Silo i na agua i bani vora me igê tanga o Samuele ma ki bani tamasi igê tanga. Matena i tamasi o Samuele, na Isiraelita hato ka karinga maninga.
Currently Selected:
1 SAMUELE 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
