1 KORINTO 13
13
Na hetakuiha
1Ata ni vi ma: manga vi inê, ma be tamasi igê na tamasinga iata na enoni, se vi na tamasinga iata na angelo nikâ, ma na hetakuiha ki pe oga i pasiku, na ringeku, gê tamasi, ki vora re na marâ purua ma, manga na ringena na gogo, se na belo, i angiangi. 2Ata ni vi ma: manga vi God, ma ki ateê, kê poropete; manga vi inê, ma kê giraragi ma kê rongogiraragi na ara ni marâ, ga pinihi; manga vi inê, ma na tongesuriha iaku ki gatagata, ngaia ki girara i gurugi râ na hungani, manga vi na hetakuiha, ma ki pe gâga i pasiku, inê kê re vora na marâ purua ma. 3Ata ni vi ma: manga vi inê, ma kê votogi purua na ara ni marâ iaku, ma nikâ gê hagamarumungenira, ka sungia na apeku, ma na hetakuiha ki pe oga i pasiku, inê kê tagara purua ma.
4Manga vi na hetakuiha, ma ki gâga i pasimu, igo ko piringiape, ma ko haritagi. Manga vi na hetakuiha, ma ki gâga i pasimu, igo ki asa, vi gu hengari, se vi gu ura haha, se vi gu paroparo. 5Manga vi na hetakuiha, ma ki gâga i pasimu igo, ki asa, vi gu suraga, se vi gu hagatage, se vi gu bagamangamangariaga. Manga vi na hetakuiha, ma ki gâga i pasimu, igo ko bonotenira na enoni, ga erasigo. 6Manga vi na hetakuiha, ma ki gâga i pasimu, igo ki asa, vi gu vagevage renigi na eraha, ma ko vagevage renia ma hete na monariha. 7Manga vi na hetakuiha, ma ki gâga i pasimu, igo ki asa, vi gu rumakaka, ma ko ama ni tongesuri nga, ma ko ama ni hagêguritogo nga, ma ko ama ni piringiape nga hete.
8Na hetakuiha ki gâga tare, ma ki asa, vi ge page hato. Na tamasinga iata na poropete ka page hato. Na votovoto na ringeni na tamasinga, ga râ hehegitigi, ka page magahuru. Na giraraha ki page hato. 9Na giraraha iaka ma na tamasinga iata na poropete ka buhigi tani ma na marâ. 10Na matena i arâ me na marâ, na ani i koro teha, na ani, i koro sisite, ki page magahuru.
11Matena gê sisite, inê kê tamasi manga na kare, inê kê hata manga na kare, ma kê takotako manga na kare. Ma i ngekê inê kê bani vora re na enoni raha, ma inê kê bani kasigi râ na tauhata na kare. 12Na marâ, igia ka bâsigi i ngekê, ka mangagi na nununi, ga bâsigi i ve, ma ka pe marava. Ma hemuri me igia ka kahu bâ togotogo renigi. Matena i ngekê na giraraha iaku ki sisite ma. Ma hemuri ngaia ki page teha ngavê, tagenana ma manga na giraraha iana God reniê.
13Ma i ngekê mênga, na ani gi oru igê ka gâga mênga: na tongesuriha, na naasiha, ma na hetakuiha. Ma na ani, i raha ngavê i berarogani ngaia ka na hetakuiha.
Currently Selected:
1 KORINTO 13: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
