1 KORINTO 14
14
Nikâ na votovoto iana na Higona Apu
1I tuguhigamu, mu tangasia na hetakuiha. Mu tenigi na votovoto iana na Higona Apu, ma hagenago ma kamu kahu tangasia na votovoto iana na Higona Apu, mu poropete. 2Na enoni, i tamasi igê na ringena, i rongo getigi, ngaia ki pe tamasi tangara na enoni, ma tanga God hete, suria i mareha ta na enoni, vi ge rongogirara. Igê na raramohana na Higona Apu ngaia ki visigi na marâ, ga monari ma ka pinihi. 3Ma na enoni, i tarohenia na tamasinga iana God, ngaia ki tamasi tangara na enoni, ma ki tamanira, ma ki hagaramonira, ma ki hagamanapura. 4Na enoni, i tamasi igê na ringena, i râ getigi, ngaia ki katoa tanga so ngaia marena, ma na enoni, i tarohenia na tamasinga iana God, ngaia ki tamania na haku hagenani na enoni, ga tongesuri.
5Inê kê obanigamu hato, vigamu tamasi igê na ringeni na tamasinga, ga râ hehegitigi. Ma na marâ, inê kê obania bâraha, kani vi igamu hato kamu tarohenia na tamasinga iana God. Suria manga vi na enoni, ma ki tarohenia na tamasinga iana God, ngaia ki koro teharia na enoni, i tamasi igê na ringena, i rongo getigi, manga vi i pe gâga ta na enoni, i girara vi urusigi na tamasinga iana, hanana vige tamania na haku hagenani na enoni, ga tongesuri. 6Hoita, goaku igê na tongesuriha, manga vi inê, ma be tamasi igê na ringeni na tamasinga, ga rongo getigi, matena gê vatugigamu, ki hega, inê kê tamanigamu vari? Mareha ngavê, manga vi inê ma kê pe hagagiraragamu renia God, se gê pe hagesurigamu, se gê pe torea me tangagamu ta na taroha iana God, se vi na hagesuringa.
7Ngaia ki manga na êhihi, se na ukurere, ma na marâ vigana. Na marâ ngegana ka pe mauri. I asa ta na enoni, vi ge girara na ringena, manga vi ta na enoni ki tahurua, se i uhia, manga vi na ringeni ka pe rongo hegitigi. 8Ma ki manga vi ta na mane, ma ki uhia na ahuri, ma ki pe uhia bâkoro, o ti kani nanêa na hearihatana? 9I tagenana ma, i asa ta na enoni, vi ge rongogiraragi na marâ, go visigi, manga vigo tamasi igê na ringeni, ga râ hegitigi, ma ka pe rongo mataha. Na tamasinga iamu ka page hato purua! 10Na tamasinga iata na enoni i maveta ka rako era, ma ka râ hehegitigi, ma na ara ni hitangini ki nahunigi na girarani. 11Ma ki manga vi ta na enoni, ma ki tamasi tangê igê na tamasinga iana, ma inê kê pe rongogiraragi na tamasinga iana, igamirua kamuru mahuara heri. 12Suria igamu kamu tangasigi na votovoto iana na Higona Apu, tahema ki tuguhigamu, vigamu hagatagarahigi nga na votovoto, ga tamania na haku na enoni, ga tongesuri.
13Na enoni, i tamasi igê na ringeni, ga rongo hegitigi, ki tuguhia, i nungia God, ki vatea na votovoto, hanana i hagagirara na enoni renigi na girarani. 14Manga inê, ma kê nunginungi igê na tarana ngekana na ataroku ki nunginungi monari, ma inê kê tako purupuru ma, suria inê kê pe rongogirara. 15Hoi, na ta be katoa? Inê be nunginungi igê na ataroku, ma be nunginungi igê na aitangihaku nikâ. Inê be kiki igê na ataroku, ma be kiki igê na aitangihaku nikâ. 16Manga vi igamu, ma kamu visia koro God igê ma na ataromi, manga i he na enoni purua, i gâga henigamu, matena mu rotu, kani girara vi aramigamu, ki vivi “I monari” igê na hatungina na nunginungiha iami mu visia koro igê God? Ngaia ki tugupu ngavê renigi na marâ, mu visigi. 17Henaka vi i koro ngavê na nunginungi iami mu visia koro igê God, na nunginungiha ngekana ki asa, vi ge tamania na mane ngekana.
18Inê kê visia koro God, renia inê kê tamasi igê na ringeni na tamasinga, ga rongo hegitigi, teharia na anima na hitangimi. 19Ma igê na matena ga rotu, inê kê obania hete, vigê visigi na tamasinga gi rima, na enoni ka girara ga rongorongo giraragi, hanana gê hagesurira, teharigi na rehagaro na tamasinga igê na ringeni, ga rongo hegitigi.
20Goaku igê na tongesuriha, siana kamu takotako mangara na kere kare. Igê na apanena na eraha ki tuguhigamu, mu mangara na kere kare haoru, ma igê na takotako iami kamu mangara na enoni, ga takotako mataha. 21Na Buka Apuna ki vi:
“Na Araha ki vi,
inê be tamasi tangara na kariaku ngegê:
Inê be tamasi i harata na enoni,
ga tamasi igê na tamasinga, ga rongo hegitigi,
ma igê na harata na enoni, ga mahuara.
Ma ki henaka gê kato vikana,
ma na kariaku ka pe tê viteaku.”
22Ngekana na ringeni na tamasinga, ga rongo hegitigi, ki tangara na enoni, ga pe tongesuri, ma ki mareha vi tangara na enoni, ga tongesuri. Ma na taroheniana na tamasinga iana God ki tangara na enoni, ga tongesuri, ma ki mareha vi tangara na enoni, ga pe tongesuri.
23Manga vi na haku hagenani na enoni, ga tongesuri, ma ka hakuhaku, ma na ara ni hitangita ki haganega ki tamasi igê na ringeni, ga rongo hegitigi, ma tani na enoni purua, se na enoni, ga pe tongesuri ka banu me henira, ki hega, ga pe visigamu vari, vi igamu kamu bekabeka? 24Ma ki manga vi igamu hato, ma kamu tarohenia na tamasinga iana God, matena na enoni purua, se na enoni, i pe tongesuri, ki banu me henigamu, ma ki rongogi na marâ, mu visigi, ngaia ki page tahetara, vi ngaia ki na enoni tasi. Na ara ni marâ, i rongogi, ka hagatako obana. 25Ka page vaga mave na takotako pinihi iana, ma ngaia ki page tu bê so, ma ki bêtuhia God, matena i vivi, “I monari, God ki gâga ikê henigamu!”
Hagaotora na enoni igê na hagarahenga
26Goaku igê na tongesuriha, inê kê vi vikê. Matena mu hakuhaku me tanga na hagarahenga, na ara ni hitangimi ki tuguhia akê me henia ta na marâ: tani henia na ki, ma tani henia na hagesuringa, ma tani henia na taroha iana God, ma tani henia na tamasinga igê na ringeni, ga rongo hegitigi, ma tani nikâ ki hagararingenigi na girarani na ringeni ngegana. Mu hagaotogi na marâ hato, hanana ga tamania nga na haku na enoni, ga tongesuri. 27Manga vi ga gâga tani na enoni, ga tamasi igê na ringeni, ga rongo hegitigi, na vererua, se na vera oru ma ka tamasi hesurisuri, ma ki tuguhia ta na enoni getea, i hagararingenigi na marâ, ga visigi. 28Ma ki manga vi i pe gâga ta na enoni, hanana vi ge hagararingenigi, ngekana siana ta na enoni ki tamasi mave i maata na enoni, ma tanga so ngaia marena ma God hete. 29Na vererua, se na vera oru ki koro viga tarohenia na tamasinga iana God, matena na enoni getera ga hagakitagi na marâ, ga visigi. 30Matena mu hakuhaku, ma ki manga ta na enoni, ma ki gâga so mênga, ma God ki hagagirara renia ta na taroha, vikana na ani, i tamasi igê na matena ngekana, ki tuguhia, i munimuni. 31I ararigamu hato, vigamu tarohenia tatage na tamasinga iana God, hanana na ara ni hitangimi ki hagagirarara ma ki hagaramonira na enoni getera. 32Na poropete, matena ga tarohenia na tamasinga iana God, ki tuguhira ga hagaotora so mareta, 33suria God ki pe obanigia, vi ge hetoratora, ma ki obanigia hete, vi ga marape.
Igê nikâ na ara ni haku na enoni, ga tongesuria God, 34na gete ki tuguhira, viga munimuni, matena na haku na enoni, ga tongesuri, ga hakuhaku igê na hagarahenga. I apu tangara, vi ge tamasi, suria na ramata iata na Siu ki vi, ki tuguhira, vi siana ka araha. 35Manga vi ngaira, ma ka obania, vi ga girara ta na marâ, i koro, ka hagatera na mane iata i ruma iata. Suria manga vi na gete, ma ki tamasi, matena na enoni, ga tongesuri, ga hakuhaku igê na hagarahenga, ki era ngavê.
36Igamu kamu takusia vari, vi na tamasinga iana God ki râ me tenigamu? Se vi na tamasinga iana God ki râ me tangagamu ma igamu vari? 37Manga vi ta na enoni ma ki vi, vi ngaia ki na poropete iana God, se i vi, vi God kani vatea renia tani na votovoto, ngaia ki araria i girara maninga vi na marâ, gê segea tangagamu, ki na ramata iana na Araha. 38Manga vi ngaia, ma ki usitenia na marâ ngekana, igamu nogami kamu usisitenia bê râ nogana.
39Hoita, goaku igê na tongesuriha, mu tangasia, hanana mu tarohenia na tamasinga iana God, ma siana kamu hagabarasira na enoni, ga tamasi igê na ringeni, ga rongo hegitigi. 40I tuguhigamu, vigamu tanugi tatage maninga na ara ni marâ hato.
Currently Selected:
1 KORINTO 14: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
