1 KORINTO 11
11
1Mu amaka suriê, tagenana manga inê kê amaka suria o Kirisito.
Ga buhigi na bêta matena ga hagarahe
2Inê kê visigamu raha, suria igamu kamu takusiê tare, ma kamu râ surigi na hagesuringa, gê bani hagatarêngenigi tangamu. 3Inê kê obanigamu, vi gamu rongorongogirara maninga, vi o Kirisito ki araha tangara na ara ni mane, ma na mane ki araha tanga na gete iana, ma God ki araha tanga o Kirisito. 4Tahema, manga vi na mane, ma ki buhia na bêna, matena i hagarahe, se i ateate renia na tamasinga iana God, ngaia ki pe hanetasia o Kirisito. 5Manga vi na gete, ma ki pe buhia na bêna, matena i hagarahe, se i ateate renia na tamasinga iana God, ngaia ki pe hanetasia na mane iana. Na gete, i katokato vikana, ngaia ki tagenana ma manga na gete, ga goro bê huria, suria i gamogamo. 6Manga vi na gete, ma ki pe buhia na bêna, ngaia ki araria, ga tapurua. Ma suria na tarana, ga gorogoro bê huria, se ga tapuru, ki hagamakia na gete, tahema i tuguhia, vi buhia na bêna. 7Tanga na mane ki koro ma, manga vi pe buhia na bêna, renia ngaia ki na togatogana na nununa God ma na bâbâhana. Ma na gete ki na togatogana na bâbâhana na mane. 8Suria na mane ka pe hagavora tenia na gete, nga noga ma na gete ka hagavora hete tenia na mane. 9Nikâ ka pe hagavora na mane tanga na gete, nga noga ma na gete ka hagavora hete tanga na mane. 10Renira na angelo ki tuguhia na hehene, vi buhia na bêna, hanana i hagabângenia, vi ngaia ki oga i ruguhana na mane iana. 11Ma igê na mauriha iaka haku henia na Araha na gete ki gâga hagêguria na mane, ma na mane ki gâga hagêguria na gete. 12Renia na gete ka hagavora tenia na mane, i tagenana ma na mane i vora me tenia na gete. Ma na ara ni marâ hato ka râ me tenia God.
13Mu siruguhia: na gete ki araria ma vari, vi nunginungi tanga God igê na matena na hagarahenga, manga vi pe buhia na bêna? 14Na marâ, mu bâsigi, ma na takotako iata na enoni ka hagesurigamu nikâ, vi na varehu, ga gagahi, ki na marâ ni makiha tanga na mane. 15Ma tanga na gete na varehu, ga gagahi, ki na marâ, i ageage renia. Ma na gete ki gagahi na varehuna, hanana vi buhia renia na bêna, ma ki tukuia renia na maana. 16Manga ta na enoni, ma ki pe obania, inê kê visia ma, vi na tarana ngekê ki na tauhaka, ma na tauha i pasita na haku na enoni, ga tongesuria God, matena igia ka hagarahe.
Na Ngêra Mora iana na Araha
(Mt 26.26-29; Mk 14.22-25; Lk 22.14-20)
17Hoita, igê na hagesuringa ngegê inê kê ramonigamu, renia, matena mu haku tanga na hagarahenga, ka vora me rako na marâ era teharigi na marâ koro. 18Hagenago, inê kê bani rongoa, vi igamu kamu hevoavoa so maremi, matena igamu kamu haku tanga na hagarahenga. Ma inê kê takusia, vari vi i monari. 19(Igamu ki pe asa vigamu hevoavoa so maremi, hanana ga rikiriki râ mave na ani, ga koro.) 20Matena mu haku i na agua gi tage, ngaia ki pe manga, vi igamu kamu râ me, hanana vi gamu ngaua na Ngêra Mora iana na Araha. 21Suria na matena mu ngêa, na ara ni hitangimi ki banuhi bêna marena ma renigi na ngêra, i tora me. Tahema tani na enoni ka magê, ma tani ki ruguhira na tonoha. 22I hega, igamu kamu pe nahunigi vari na ruma iami maremi, hanana vi gamu ngêngê ma kamu totono igê? Se gamu pe hanetasia vari na haku na enoni, ga tongesuria God? Se gamu hagamakira vari na enoni, ga matareha? Igê na tarana ngekana na ta kanimu takusia, vi gê page visigamu renia? Mu takusia vari, vi gê page visigamu raha? Mareha vê! I asa ngavê!
23Na tamasinga, gê bani hagatarêgenia tangagamu, ka na tamasinga, gê torea tenia na Araha ngaia marena. Ngaia ki manga ikê: Igê na bungiana, ga hagavuringenia igê, na Araha o Jesu ki têa na bereti, 24ki visia koro God renia, ki pipia, ma ki vi, “Ikê na apeku, i tangagamu. Mu katoa na tarana ngekê, hanana mu takusiê renia.” 25I tagenana ma, matena ga ngê hato, ngaia ki têa na kâkâ, ma ki vi, “Na kâkâ ikê ki na suruheri haoru iana God. Na gapuku, i hagagatagatania na suruheri haoru ngekê. Na ara ni matena, mu tonomia, mu katoa igê na tarana, hanana mu takusiê renia.” 26Na ara ni matena, mu ngaua na bereti ngekê, ma kamu totono igê na kâkâ ngekê, mu tarohenia na mera iana na Araha, mataro me na aporoha me iana.
27Tahema, manga vi na enoni, ma ki ngaua na bereti iana na Araha, se i totono igê na kâkâ iana igê na tarana, i pe oto, ngaia ki tasi, suria ngaia ki pe hanetasia na apena ma na gapuna na Araha. 28Tahema, na ara ni enoni ki tuguhia, i garigari hagenago igê na aitangihana marena, ma hemuri ki kahu ngaua na bereti ma ki totono igê na kâkâ. 29Suria manga vi ngaia, ma ki pe rongogirara bâkoro na girarana na apena na Araha, matena i ngaua na bereti ma ki totono igê na kâkâ, ngaia ki erasia marena, matena i ngaua ma ki tonomia. 30Tahema rako era na hitangimi ga maeha, ka marumarusiga, ma ka kere rako na ani, ga bani me. 31Manga vi igia, ma ka garigari hagenago igê na aitangihaka, God ki mareha vige surigia ke hagaitangigia. 32Ma igê na tarani ngegana God ki surigia, ma ki hagaitangigia, hanana i asa, vi ge page surigia ke hagatangigia henira na ani getera i maveta.
33Hoita, goaku igê na tongesuriha, matena mu hakuhaku tanga mu ngaua na Ngêra iana na Araha, mu megamu tanu heri. 34Manga ta na enoni, ma ki magê, ki tuguhia, i ngêngê i ruma iana, hanana God ki pe surigamu ki hagaitangigamu matena mu hakuhaku. Ma na ani getigi na marâ inê kê page hagaotogi, matena gê arâ me.
Currently Selected:
1 KORINTO 11: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
