1 KORINTO 10

Siana kamu hagarapera na ataro

1Goaku igê na tongesuriha, inê kê obanigamu, vi gamu takusigi tare na marâ, ga tarahura na êvarika, ga râ suria o Moise. Na vaha ki buhira ma ki anumasira, ma ngaira ka tarê igê na Asi Memera, ma ka tahi. 2Igê na vaha ma igê na asi ngaira hato ka batesimo, ma ka vora re na kariana o Moise. 3God ki vatera ngaira tagenata na tonoha mora, 4suria ngaira ka tono tenia na hê mora, i râ henira. Ma na hê mora ngekana ngaia ki no Kirisito marena. 5He naka i manga ngekana, ma God ki pe obakoro renira rako era na hitangita. Tahema na gahuata ka tâ totoko igê na bagamasusu raha.

6Hoi, na ara ni marâ ngegana ka hagesurigia, ma ka manimanigia, vi siana ka tenigi na marâ era manga ngaira; 7ma nikâ vi siana ka vogasira na ataro mangara tani na hitangita. Suria na Buka Apuna ki vi, “Na enoni, ga oga, ka ngêngê ma ka totono, ma ka aharaga ka mâmâ.” 8Siana igia ka gamogamo mangara tani na hitangita, ga kato vikana, ma igê na tangiana gi tage ngaira ka me na tangahuru gi rua matara gi oru na rehagaro. 9Siana igia ka uhungia na Araha mangara tani na hitangita, ga kato vikana, ma ngaira ka me, suria na ma ka garera. 10Siana igamu kamu hagagege mangara tani na hitangita, ga kato vikana, ma na Angelo na Mera ki hagamesira. 11Na ara ni marâ ngegana ka tarahura, hanana vi na hagesuringa tangara na ani getera, ma ngaira ka bani segegi so, hanana ga hagamagusigia renigi, suria igia i ngekê ka oga igê na matena, i sugia ma igê na hagahatongina.

12Na enoni, i takusia, vi ngaia ki rêra gatagata, ki tuguhia, i bâbâ maninga, i era ma ki vota. 13Na ara ni heuhungiha, ga bani tarahugamu, ka bani tarahura hagarako na enoni. Renia God ki hagamonaria tare na suruha iana, ma ki pe hagamarumungenigi, ke tarahugamu na heuhungiha, ga ramo teharigamu. Mu girara mu rêra pusigi. Igê na matena i tarahugamu igê na heuhungiha, God ki page hagaramonigamu, hanana mu rêra pusia, ma kamu tahitahi tenia.

14Hoita, goaku igê na tongesuriha, mu naka nga vê na vogasiha ni ataro. 15Inê kê tamasi tangagamu, manga vi igamu ka na enoni mu takotako. Mu siruguhigi na marâ ve visigi. 16Na kâkâ na visiha raha, igia ka visia koro igê God, ki hega, igia ka pe tongani vari na gapuna o Kirisito, matena igia ka totono igê? Ma na bereti igia ka pipia, ki hega, igia ka pe tongani vari na apena o Kirisito? 17Suria na bereti ki gi tage togo ma, igia hato, henaka viga rako, ma igia ka vora gi tage togo ma, suria igia hato tagenaka ka tongani na bereti gi tage togo ma.

18Mu takusira na Siu. Na ani ga ngêngê na ngêra na vogasiha, ngaira ka haku henia God. 19Na ta kani gê visia? Gê vi, vi na ataro, se na ngêra, ga vogasia na ataro renia, ki na marâ raha vari? 20Mareha! Inê kê visia ma, vi na ahuroto ka vogasi tangara na ataro, mareha vi God. Ma inê kê manimanigamu, siana kamu hakuhaku henira na ataro. 21I asa iami, vi gamu tono igê na kâkâ iana na Araha, ma nikâ vi gamu totono igê na kâkâ iata na ataro. I asa iami, vi gamu ngê igê na bea iana na Araha, ma nikâ igê na bea iata na ataro. 22Igia ka obania vari, vi ga katoa na Araha, ki hengari? Mu takusia vari, vi igia ka ramo teharia ngaia?

23Tani ka vi ngaira, “Igia ki ararigia ma, vi ga katogi na ani mavê na marâ.” Ua, ma ki mareha vi na ara ni marâ ke koro. “Igia ki ararigia ma, viga katogi na ani mavê na marâ.” Ua, ma na ara ni marâ ka pe tamanigia. 24Siana ta na enoni ki takusigi ma na marâ, ga koro tanga ngaia marena. Ma ki tuguhia, i takusigi hete na marâ, ga koro tangara na enoni getera.

25I ararigamu ma, vigamu ngaugi na ani mavê na ganiani, ga hagavuri igê na maketi. Siana kamu hagategi noga, suria vi gamu hinarugi. 26Suria na Buka Apuna ki vi, “Na maveta ma na ara ni marâ hato igê ka na anina na Araha.” 27Manga vi na enoni, i pe tongesuri, ma ki guhigo tanga na ngêra, ma igo ko agana ko arâ, i ararigo ma, go ngêngê na marâ, ga vatego. Siana ko hagategi noga, suria vi go hinarugi. 28Manga ta na enoni, ma ki vi tangago, ki vivi, “Na ngêra ikê ka bani vogasira na ataro renia,” hoi, i ngekana, siana ko ngaua, suria go hagatogo suria na enoni, i hagarongogo, ma na takotako iana. 29Mareha vi na animu maremu na takotako, ma suria hete na takotako iana na enoni getea.

Ta na enoni ki vivi vari, “Na takotako iana na enoni getea ki pe koro, vi ge hagabarasiê tenia na marâ, i arariê, vi gê tanua. 30Manga vi inê, ma kê visia koro God renia na ngêra iaku, ngekana ki pe koro tanga ta na enoni, vi ge visiê renia na ngêra, gê visia koro God renia!”

31Hoita, i tuguhigamu, vigamu visia raha God igê na ara ni marâ, mu tanugi, vari mu ngêngê se mu totono. 32Siana kamu hagavotaria ta na enoni, henaka vi ngaia ka na Siu, se vi na ani ga pe Siu, se vi na haku na enoni ga tongesuria God. 33Mu katokato manga inê: igê na ara ni marâ, gê tanugi, inê kê uhungia, hanana vi gê hagakoro obata na enoni hato. Inê kê pe takusigi na marâ, ga koro tangê ma inê, ma na marâ hete, ga koro tangara na enoni hato, hanana vi ngaira ka tahitahi.

Currently Selected:

1 KORINTO 10: KCB

Highlight

Copy