Mateo 27
27
So Jesús qaỹauegueua'a so Pilato
(Marcos 15.1; Lucas 23.1-2; Juan 18.28-32)
1Qaq co'ollaq mashe yo'oxoñi, nache 'enauac som lataxala'pi nam ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som lataxala'pi na judiopi, mashe nmachigui da lataxac da yaqto' ỹalauat So Jesús. 2Nache qaicoñetta'a't naua lhua'q Somaye, ime nache qanqateeguesop so lma' so Caifás, nache qaỹauegueua'a so nta'a Poncio Pilato maye lta'a na Roma le'ecpi.
Da l-leuaxa so Judas
3Qaq so Judas co'ollaq ỹaỹaten da mashe qoỹaneguet da nalaataguec So Jesús, nache ỹataqta qauem da lhuennataxac qataq lta'araic da ntogotaxac souaxat da ỹaneuo So Jesús. Qaq ỹoqo'oye jec da nqo'oneua'a ca hueta'a so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq so nataxala'pi yi'iye 'alhua, nache ỹe'eguelaxateuo aso treinta anom lcat maye chegaqaigui na plata, 4nache 'eetega somayepi, 'eeta':
–Aỹem huo'o da ỹasouaxashet hueto'ot Ñim Lo'onatac 'Enauacna, cha'aye saneguet da nalaataguec So Jesús, qaq Somaye qaica ca ỹasouaxat.
Qalaxaye somayepi 'enapeco':
–Aque', ¡Damaye saishet da saqtegueua'a! ¡Damaye maiche 'arasouaxashet!
5Nache so Judas ỹasaxaigui aso no'onaxanaxaqui late'erai aso anompi. Ime, nache jec, nache maiche icoñerot na lqosot da nalaala't.
6Nache som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, ỹacona aso anom, nache 'enapeco': «Ana'ana anom anamaye qarsheetenaxanaqte da sesheetenaq da l-leuaxa so 'oonolec ỹale, qaq anamaye sa seshetaq da sachaqangui añi laỹe' ana nachetaqtaxanaqte, cha'aye na namaxasoxonaxacpi saishet da ỹashen.»
7Qaq ỹoqo'oye somayepi nasachigui da asa'aso anom qoỹangui da qaisheenaxana so 'alhua maye qaỹamata'ac «no'onaxa som 'alhua lo'o», da yaqto' qaỹauo'o nlaraqa' nam ỹaqa'a ca chegaqa'ague. 8Qaq ỹoqo'oye se'eso 'alhua nache le'enaxat qanqa'en da, «no'onaxa maye lasheue soua ntago'q.» 9Huaña, nache ỹataqta ipacchigui da la'aqtaxanaxac so la'aqtaxanaxanec Ñim Lo'onatac 'Enauacna le'enaxat Jeremías, co'ollaq 'eeta':
«Na shiỹaxauapi maye Israel le'ecpi ỹauo'o aso lasheue
da yaqto' desheenaxana da nachaalataxac se'eso ỹale:
¡Asomaye ivi' treinta ana anom
lcatpiole maye chegaqaigui na lcat plata!
10Nache somayepi ỹacona asa'aso anom,
nache desheenaxana
som no'onaxa, so 'alhua lo'o.
Qaq ipacchigui da aỹem ỹamaxalec
Ñim Lo'onatac 'Enauacna.»
So Jesús qaỹataxanot so Pilato
(Marcos 15.2-5; Lucas 23.3-5; Juan 18.33-38)
11So Jesús co'ollaq mashe datato'ot so Pilato, nache so Pilato inat Somaye, 'eeta':
–¿Ỹoqta 'eesa peta'a da 'am lta'a na judiopi?
Nache So Jesús 'enapeco':
–Aja', nachera dam qonapec.
12Nache som lataxala'pi nam ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som lataxala'pi na shiỹaxauapi yem qanayeuta'a 'alhua ỹauo'o na ỹasaxalec lasouaxashetpi So Jesús co'ollaq datato'ot so Pilato, qalaxaye So Jesús saishet da ỹasat. 13Nache so Pilato inattaco' Somaye, 'eeta':
–¿Saishet peta'a da 'aua'axaỹa nam na'aqtacpi maye 'am qaỹasaqteguelec?
14Qalaxaye So Jesús ye saishet da ỹasat. Nache se'eso nta'a ỹataqta huo'o da la'aalaxa, nache ỹataqta sa ỹaỹaten ca 'eetec.
So Jesús qoỹaneguet da nalaataguec
(Marcos 15.6-20; Lucas 23.13-25; Juan 18.38–19.16)
15Qaq huo'o da lataxac naxa so nta'a da ivita so naponaxac maye le'enaxat Lapascua, nache somaye ishet da isouec ca camachaqca ncoñeteguishec cam maiche iỹaxanaua'a na shiỹaxauapi. 16Qaq se'eso na'a'q huo'o so ncoñeteguishec ỹataqta qauemaic qataq cachaxaic, qataq ỹo'oxoraic, le'enaxat Jesús Barrabás. 17Nache so Pilato inat so shiỹaxauapi maye hueta'a yi'iye, 'eeta': «¿Negue't cam qauỹaxañiiua'a, da yaqto' aỹem sesouec: ñi Jesús Barrabás, huo'otaq da Jesús maye qoỹeetega Lca'aguishec Ñim Lo'onatac 'Enauacna?»
18So Pilato ỹauo'o de'era lnataxanaxac, cha'aye somaye ỹaỹaten da som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som nataxala'pi yi'iye 'alhua, huo'o na ỹasaqteguelec 'eetega lasouaxashet So Jesús, cha'aye souaxat da lquiỹaxa.
19Qaq so Pilato co'ollaq ñaq nmittac de'era, nache aso lhua namaxai' da la'aqtac, 'eeta': «Saishet qome da 'aỹapegueua'a que'eca ỹale maye no'on da lataxac, cha'aye so pe ỹataqta qaica ca 'ena'am da lchec so ichoxonaxac, souaxat camaye.»
20Qalaxaye som lataxala'pi nam ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som lataxala'pi na shiỹaxauapi, somayepi ỹañoxot da ỹayen so hueta'a yi'iye, da yaqto' iỹaxanaua'a da qaisouec so Barrabás, qataq da yaqto' qaỹalauat So Jesús.
21Nache so nta'a qaltaq ỹe'eguelaxalec da denataxan, 'eeta':
–¿Chaq negue't cam 'oonolec ne'enaua dos ca qansheetaique da sesouec?
Nache 'enauac somayepi 'enapeco':
–¡Qomye Barrabás!
22Nache so Pilato denataxano', 'eeta':
–Qaq ¿hua'ague ca sheetec dam Jesús maye qoỹeetega Lca'aguishec Ñim Lo'onatac 'Enauacna?
Nache 'enauac somayepi 'enapeco':
–¡Qomye damaye qaỹalauat qataq qaiuaxaneuo! Somayepi nmasheguem 'eeta'am na do'onaxaatac.
23Nache so Pilato inat somayepi, 'eeta':
–Ñaq aỹem qaua'aqtaxañim ¿negue'to' cam ỹo'ot saỹaỹamaxañi de'era ỹale?
Qalaxaye somayepi qaltaq nquigaxattec da la'alaxac, 'eeta':
–¡Qaỹalauat damaye qaiuaxaneguet ca npe'enaxaqui!
24Qaq so Pilato co'ollaq ila'a da saishet da ỹañoxot so shiỹaxauapi, nachaqrata da nquictasheguem somayepi da lliỹa't. Nache damaxasoxonaique so 'etaxat da qandoua'a, nache somaye ỹauaachigui naqa'en so shiỹaxauapi da iỹoi' naua lhua'q, nache 'enapeco':
–Aỹem saishet da ỹasouaxashet da l-leuaxa de'era ỹale. Qami' maye qarasouaxashechi de'era.
25Nache so shiỹaxauapi nmasheguem da ỹasat, 'eeta':
–¡Qomi' qataq na qoyalaqpi ñachoxola't qome da qarasouaxashet da l-leuaxa de'era ỹale!
26Nache so Pilato isouec so Barrabás. Ime, nache damaxasoxoolec So Jesús da qairolec so nhuaxanaxanaxat da qaiuaxan na l-laq, qataq ỹanec da yaqto' qaiuaxaneuo.
'Enauac so shiỹaxauapi ỹe'eetac So Jesús
27Ime, nache so nalleppi se'eso Pilato ỹauec So Jesús da ỹauega ca lma' lta'araic so nta'a. Huaña, nache qalapona't 'enauac so alleppi da yaqto' qaicoleesop Somaye. 28Ime, nache qanqa't soua alogo So Jesús, nache qanapoxonaxanaxaaña so npo' togaxaraic, 29qataq qoỹanaxanaxangui na lqaic aso no'onata ỹaxat, qataq qaỹachaigui na aloiguishec lhuaq aso coqta. Ime, nache qaỹa'aroto naua nllecte Somaye, nache qaỹe'eetac, qoỹeeta': «¡La', 'am maye 'am lta'a na judiopi!»
30Qataq nataqa'en qanqaigoqto'ot, qataq qaỹacona aso coqta maye nasoqta'a, nache qaiuaxaatapigui na lqaic. 31Qaq co'ollaq qanasamiisop da qaỹe'eetac somaye, nache qanqat so lapo' maye togaxaraic, nache qoỹanaxanaxanguilo soua maiche alogo. Ime, nache qaỹauec da yaqto' qaiuaxaneuo.
Qaiuaxaneuo So Jesús
(Marcos 15.21-32; Lucas 23.26-43; Juan 19.17-27)
32Qaq co'ollaq mashe qanayecot So Jesús. Nache co'ollaq huangui so nqa'aic, nache qanatena'aguet so ỹale maye le'enaxat Simón somaye lma' ye nỹecpiolec le'enaxat Cirene. Nache qoỹenapega somaye da ỹache so npe'enaxaqui So Jesús.
33Qaq co'ollaq qaivita so 'alhua maye le'enaxat Gólgota, de'era na'aqtac naigui da «nqaic lpi'inec lma'.» 34Huaña yemaye, nache qanỹomaxangui So Jesús so lataxa maye qaỹalecneguet ana huoue chemaxarai maye lata' da yaqto' saishet da nomeguet da nqui'ic ca shiỹaxaua. Qalaxaye co'ollaq ỹe'eguen So Jesús somaye, nache saishet da nỹomgui.
35-38Nache so alleppi maye iuaxaneuo So Jesús co'ollaq ime da iuaxaneuo, nache somayepi nallera't da yaqto' qaỹaỹaten chaq negue't ca taleguete soua alogo So Jesús. Nataqa'en qaỹauo'o so nerec, nache qoỹanaña na nalotcheguemec na lqaic So Jesús da ỹa'axat da huo'omshe qaiuaxaneguet so npe'enaxaqui Somaye. Qaq se'eso nerec, 'eeta': «'Ena na Jesús maye lta'a na judiopi.»
–Nataqa'en huo'oi soua lỹa't maye qaiuaxaareuo dos 'etaxaloxoiqa, nache so 'oonolec soomaye qoỹana'ague da aloic So Jesús, qaq so lỹa qoỹana'ague da ne'emaq. Ime nache so alleppi nso'ooñi da yaqto' nauanaleguete soomaye.
39Nache so shiỹaxauapi maye nlectrecot soomaye isheueetac So Jesús qataq ỹe'eetac, ỹataqta iconnaxaatac na lqaic. 40Nache qoỹeetega qoỹeeta': «'Am maye qonetega co'ollaxa da ishet da 'aulaxachigui añi no'onaxanaxaqui late'erai, qaq da 'ano'oxoosheguem, nache tres na'axa'te, nache qaltaq 'aumat. ¡Qaq nagui da 'eesa da lta'araic da 'ara'añaxac, nache maiche 'anca'alaxaala't! ¡Qataq da ỹoqta 'eesa da 'am Llalec Ñim Lo'onatac 'Enauacna, qaq 'aunoteeguesop qome na 'am qaiuaxaata'aguet!»
41Nataqa'en som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq so dapaxaguenataxaatapeguec na nqataxacpi qataq so lataxala'pi so shiỹaxauapi ỹe'eetac Somaye, nache 'eeta': 42«Nca'alaxatec naxa ca lỹa, qalaq Ñimaye saishet da maiche nca'alaxaala't. Qataq 'eetega da nacheñi ñi lta'a na Israel le'ecpi. ¡Qaq Ñimaye iuen da huenoteeguesop ñi npe'enaxaqui, yaqto' ishet da sa'amaqtenaq Ñimaye! 43Ñimaye 'eetega naxa da huo'o da lpi'iỹaxac Ñim Lo'onatac 'Enauacna, qataq 'eetega lta'a Ñimaye. ¡Qaq Ñim Lo'onatac 'Enauacna da ỹoqta 'eesa da lauotaxat Ñimaye, nache nca'alaxatec nagui!»
44Qataq ivira'alo nataqa'en soua 'etaxaloxoiqa maye npe'enaxau' So Jesús, soomaye nataqa'en isheueetrac So Jesús.
Da l-leuaxa So Jesús
(Marcos 15.33-41; Lucas 23.44-49; Juan 19.28-30)
45Nache 'enauac ana 'alhua ỹataqta napalñi, chegoqchiguiña so na'a'q laiñi, choche ivitta'a so dashiguiñi añi nala' se'eso avit. 46Qaq so mashe dasheuec aso nala', nache So Jesús ỹataqta na'axannec da ỹa'alaq, 'eeta': «¡Elí, Elí!, ¿lemá sabactani?»
–De'era na'aqtac da naigui 'eeta': «'Am maye 'Aro'onatac 'Enauacna. 'Am maye 'Am ỹauotaxat, ¿ta'ainco' da Aỹem 'aualat?»
47Qaq huo'o na hueta'a yemaye na hua'aqchigui de'era la'aqtac, nache namayepi 'enapeco': «Ñi'iñi ỹale, ñimaye iỹaxaataique so na'aqtaxanaxanec Elías.»
48Nache huo'o so 'oonolec somayepi so nqalgoqtaique aso auol, nache dapapiaqtaxana na lataxa 'euaxaic, ime nache ỹana'aguet na lsheenec so logoraic 'epaq, nache ỹaasheguemec So Jesús da yaqto' nỹomaxan. 49Qaq so laỹepi maye choche demeenaxatac somayepi, 'eeta': «Ña 'aua'aqta'a ñimaye, ña semetenaq qom huo'otaq anac ca Elías da nca'alaxatec.»
50Nache qaltaq ỹe'eguelaxalec So Jesús da na'axannec da la'alaxac. Ime, nache ileu. 51Huaña, nache nataqa'en so lapoxot hualoxolaỹi maye pa'auo aso no'onaxanaxaqui late'erai, som nacchiguingui na laiñi, somaye colaqchiguingui na laiñi ỹataqta ivirañi so lcolaxa, qaq ana 'alhua qalaq cholaxan qataq na coma'pi qalaq depoqogui, 52qataq ana huachiquipi qalaq nauangui, nache ỹataqta qalota nam ỹa'amaqteetac Ñim Lo'onatac 'Enauacna nam mashe ileu co'ollaxa, qalaq ỹe'eguelaxa da nca'alec. 53Qaq co'ollaq mashe nca'alec So Jesús, nache se'eso shiỹaxauapi taua'a so nỹecpi ye Jerusalén, nache ỹataqta qalota na shiỹaxauapi na ỹauaachigui somayepi.
54Nache so huataxanaq lta'a maye Roma le'ec qataq som nalleppi maye nauaatalec So Jesús co'ollaq ỹauaachigui so nacholaxanaxa qataq nam laỹepi maye yo'oq, nache ỹataqta iviloxolaqchet da lcolanaxa. Nache somayepi 'enapeco': «¡Ñi'iñi ỹale ỹoqta 'eesa da Llalec Ñim Lo'onatac 'Enauacna!»
55Nataqa'en qalota so 'alpi qaỹoqteuga da demeenaxatac, asomayepi ca'attague' co'ollaxa So Jesús, qataq itauaatac Somaye co'ollaq chegoqta'ague da Galilea. 56Qaq se'eso 'alpi ỹalectauo aso María maye lma' ye Magdala, qataq aso María maye late'e so Santiago qataq so José, qataq aso lhua so Zebedeo.
So Jesús mashe qailareñi
(Marcos 15.42-47; Lucas 23.50-56; Juan 19.38-42)
57Qaq co'ollaq mashe napaltapiguiñi, nache nvi' so ỹale sallaxanec le'enaxat José. Somaye lma' ye Arimatea. Somaye nataqa'en ỹa'amaqteetac So Jesús. 58Nache se'eso José nqo'oneua'a so Pilato da iỹaxanaua'a da ishet da qoỹami' so lo'ocỹaxac So Jesús da ỹache da yaqto' ilayiñi. Nache so Pilato damaxasoxoolec da qoỹami' somaye.
59Nache so José nqaañi so lo'ocỹaxac So Jesús, nache lpataxangui so hualoxolaỹi maye qui'itta, 60nache ỹachangui aso huachiqui. Asomaye ỹataqta ñaq dalaxaale, cha'aye cheta'ague co'ollaxa da damaxasoxoolec somaye da qaỹo'ot qoỹanaigui so coma'. Nache so José ỹapogui asomaye dapoxona so coma' lta'araic, ime, nache jec. 61Qaq aso María maye lma' ye Magdala, qataq aso lỹa María, nso'ootrañi, netraña so naloteuga aso huachiqui.
62Qaq so lỹa na'a'q maye nmataxaqui na judiopi, nache so lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq so fariseopi nqo'oneua'a so Pilato. 63Nache qoỹeetega, qoỹeeta':
–'Am Qarataxala', qomi' tachigui qarhuel se'eso tenataxanaxaic da la'aqtac co'ollaq ña nca'altauec, nache 'eetega da qom inoxoore'c caua tres na'axa'te, nache qaltaq nca'aleeguesop da nleuaxa. 64Qaq ỹoqo'oye nagui na lapaxaguenatacpi ishet da decachiỹa ye lo'ocỹaxac, ime, nache da'aqtaxanem na shiỹaxauapi da 'eetega da nca'alec So Jesús. Qaq ỹoqta ỹactec qome de'era natenataxanaxac napacalec da 'enapec co'ollaxa yemaye, da 'eetega Lca'aguishec Ñim Lo'onatac 'Enauacna. Qaq da yaqto' saishet da 'eetec de'era, nache 'auauo'o ca 'analleppi da yaqto' nauaatalec añi huachiqui, choche ivitta'a da inoxoore'c caua tres na'axa'te.
65Nache so Pilato 'enapeco':
–'Era da huataxanaqpi, qauesomiỹa, qanqo'oñiuga aca huachiqui, nache ỹataqta qanaỹamaxacheetelec da qanauañiỹalec.
66Nache somayepi jec da nqo'oneuga aso huachiqui, nache icoñerañi so coma' maye lapoxot so ñegueuo asomaye da yaqto' saishet da deraỹapigui'. Nataqa'en qano'onaxatrañi soua huataxanaq lashe', da yaqto' nauaatralec asomaye.
Currently Selected:
Mateo 27: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
