1 Tesalonicenses 4

Da achaalataxac maye ỹaỹamaxareeta Ñim Lo'onatac 'Enauacna

1Qaq ỹoqo'oye nagui qami' qarqaỹa't maye qoquiitague' So Cristo, qami' sapaxaguenaqtegueeque da qoquiitegue da ỹataqta ỹaỹamaxareeta Ñim Lo'onatac 'Enauacna. Qaq damaye mashe qauo'ocheetac. Qaq nagui qami' ñachoxonnaqtoiguilo qataq qami' sa'añaqchetaxaque da le'enaxat So Qarataxala' Jesús da qanquigaxachiitauec qome da qara'añaxaqui.

2Cha'aye qami' mashe qauaỹaañi na qarqataxacpi maye qami' sanaxama. Damaye sachegoxotaqo'ot So Qarataxala' Jesús. 3Qaq da 'eetapeguec Ñim Lo'onatac 'Enauacna, nshetaique da ỹataqta qami' qui'itte'. Qaq ỹoqo'oye saishet qome da huo'o ca lauatapiguiñi' aca sa lhua da qoñiita. 4Qaq ñi 'oonolec da qoñiita iuen da ỹaỹateeta da ỹauo'o aca ỹataqta lhua, qataq huo'o naq 'enec naqa'en acamaye. 5Saishet da choche ỹauectac da qauem lqopitaxanaqtaic da ỹe'enaxat na sa ỹa'amaqten Ñim Lo'onatac 'Enauacna. 6Saishet da huo'o ca ỹatenachet ca lqaỹa maiche la'amqaanataxanaxaua, qataq saishet da qopiilec camaye. Mashe sogote da qami' sevitaqteetagalo da So Qarataxala' Jesús ỹauo'o ca lta'araic nhuaxanaguec ca nache 'eetec de'era. 7Cha'aye Ñim Lo'onatac 'Enauacna saishet da qomi' iỹaxanalo da qolaqto'ot da qaye'etaxaloxo, nachaqrata da qomi' iỹaxanalo da qolaqtaigui da qui'itta achaalataxac. 8Qaq ỹoqo'oye ca no'otane' de'era napaxaguenataxanaxac, camaye saishet da nache qomi' da qomi' ỹo'ota'n, maye nacheñi Ñim Lo'onatac 'Enauacna ỹo'otan, Ñim qami' ỹanema So Saqcha'a Na'añaxac Qui'itta.

9Qaq da lataxac da qanauote' ca na'amqaanataxanaxaua, sa iuen da shiyiñi, cha'aye Ñim Lo'onatac 'Enauacna mashe qami' ỹapaxagueneque da 'eetec da qaỹauotec ca nỹa. 10Qataq nache 'eetai' da qami' nache qoñiita'ac 'enauac na qara'amqaanataxanaxauapi maye netaña ye 'alhua Macedonia. Qalaxaye qami' qarqaỹa't, qami' ñachoxorenaqtoto da qoquiito'ot damaye da qanquigaxachiitauec. 11Qanpogoxoiñiỹapegue' da saqca cara da qoñiita. Ñi 'oonolec maiche huapegue' ca maiche lalamaxat, qataq ỹacootapegue' ca maiche lo'onatac. 'Era da qami' samaxasoxoleguete co'ollaxa, 12yaqto' na saxanaxa da da'amqaanataxan 'onaxaic naqa'en da qana'aqtaguiqui, qataq yaqto' saishet da saqca ca lhuenec ñi 'oonolec da qoñiita.

Da lle'eguelaxasoxoc So Qarataxala' Jesús

13Qami' qarqaỹa't, sa saỹamaxarenaq da sa qauaỹaañi ca llecỹaxac na mashe qanmataxanaxanec, yaqto' saishet da huo'o ca daquicota da 'eeta'am ca saxanaxa da da'amqaanataxan maye saqca ca naquitaxac. 14Qomi' sa'amaqtenaq So Jesús da ileu co'ollaxa, qalaxaye qaltaq nca'alec, qaq nache 'eetec nataqa'en da Ñim Lo'onatac 'Enauacna nca'alaxateeguesop da nleuaxa nam ỹa'amaqteetac Somaye.

15Qaq ỹoqo'oye, sepagaqnaqchigui dam qomi' ỹapaxagueneque So Qarataxala' da qami' shenaqapegalo da qomi' maye ñaq ñeca'alaqtauec qom ñe'eguelaq Somaye, nache sataxaguet, qom ime da dataiguet na mashe qanmataxanaxanec. 16Cha'aye Ñim Lo'onatac 'Enauacna qom 'enapega so lataxala' na lamaxashecpi piguem le'ecpi, nache sa'axasoxoỹa aca nasheere da ỹa'axat So Qarataxala' da huenoteeguesop na piguem, nache na da'amqaanataxan co'ollaq saxanaxa da ileu, nachena na la'auaxanec da nca'alec. 17Ime, nache Ñim Lo'onatac 'Enauacna nataqa'en qomi' ỹaue'c maye ña ñeca'alaqtauec, nache salegaxaigui na laỹepi shiỹaxauapi, sonaqtalec ca lo'oc na piguem. Nache huaña da 'enauac da ñauanaxai' qataq chochaq tatec da sonaqta'aguet Somaye. 18Qaq ỹoqo'oye ñi 'oonolec da qoñiita ỹa'añaqchetec ca lỹa de'era napaxaguenataxanaxac.

Currently Selected:

1 Tesalonicenses 4: LÑLE13

Highlight

Copy