1 Tesalonicenses 3
3
1Qaq ỹoqo'oye co'ollaq sa yaloxoguet da qaryaxa da sauoqtaique da saỹatenaq da qoñiita, nache huo'o da qarhuennataxac da souaqa'a ye nỹecpi ye Atenas. 2Nache qami' samaxasaxalo so qarqaỹa Timoteo. Cha'aye somaye lamaxashec Ñim Lo'onatac 'Enauacna qataq qaro'onataxanaxaua da sa'axataq da no'on qara'axaỹaxac maye na'aqtaguec So Cristo. Somaye taỹalo qami' da qami' nauaxaỹaxaayeshegue'm qataq ỹa'añaqchet da qarpi'iỹaxaqui So Jesucristo; 3yaqto' qaica ca 'oonolec da qoñiita da nañaxanapiguiñi da lpi'iỹaxac souaxat da que'eenaxac. Cha'aye qami' mashe qauaỹaañita da, nache qoyecỹaxac da ñeque'etaxanaxagui ne'ena que'eenaxaguesat. 4Cha'aye co'ollaq ñaq qami' souaqta'agueta, qalaq qami' sa'axataqtapeguema da saxaigui na qalota qanque'eenaxaguesat. Qaq ipacchigui da seviraxaguet. Qaq de'era mashe qauaỹaañita. 5Ỹoqo'oye aỹem co'ollaq sa yalo'oguet da iuennataxa da qoñiita, nache samaq ñi Timoteo da ichemaxata da huo'otaq ñaq huo'o da qarpi'iỹaxaqui Ñim Lo'onatac 'Enauacna. Cha'aye huo'o da itelaxa da huo'otaq qami' ỹatenache't so pa'aguenataxanaxaic, nache qaica ca naigui naqa'en da qaro'onataxanaxac.
6Qaq can nvi' ñi Timoteo da chegaqa'a na Tesalónica, nache qomi' da'aqtaxaateguema da qami' ỹataqta qanauochiỹa't qataq saq qaỹa'axañiiuec da qarpi'iỹaxaqui Ñim Lo'onatac 'Enauacna. Nataqa'en qomi' da'aqtaxaateguema da qomi' qauennachetrapigui souaxat da qarauotaxanaqtaiqui da shenaqta, qataq huo'o da qaryaqai da qomi' qanauañito, 'ena'ama qomi' da huo'o da qaryaxa da qami' ñauanaxato. 7Ỹoqo'oye qami' qarqaỹa't, na'aictaxa da qomi' souaqtangui 'enauac na lqalaiguesat qataq na qanque'eenaxaguesat, qalaxaye selagaqchiguiñi can saỹaanaq da qoñiita da ñaq qoquiito'ot da qarpi'iỹaxaqui. 8Nagui da saỹatenaq de'era, nache ñanomaqteguet da dalaxaic da qara'añaxac. 9Qaq ỹoqo'oye qomi' sa saỹaanaq ca shenaqtec da sanaqot da qana'achecỹaxac Ñim Lo'onatac 'Enauacna souaxat da qoñiita. 10Ye na'a'q qataq ye pe seỹaxanaqtacot Ñim Lo'onatac 'Enauacna da qomi' ỹanema da qaltaq ishet da qami' ñauanaxato, da yaqto' qami' setauana'q da ỹataqta qaumachiỹo'ot da qarpi'iỹaxaqui Ñimaye.
Da nqouagaxaunaxac so Pablo qataq soua lỹa't
11Seỹaxanaqtacot Ñim Lo'onatac 'Enauacna maye Qarta'a qataq So Qarataxala' Jesús, da qomi' ỹanema da ishet da qami' ñamaxasoqtegalo. 12Nataqa'en seỹaxanaqtacot Som Qarataxala' Jesús da qami' ỹo'oteque da qanauochiỹa't qataq nataqa'en qauauochec 'enauac na laỹepi shiỹaxauapi. 'Eeta'ama qomi' da ỹataqta qami' sauotaxaque. 13Nataqa'en seỹaxanaqtacot Somaye da qami' ỹanema ca qara'añaxaqui da qaumachiỹo'ot da qarpi'iỹaxaqui Ñim Lo'onatac 'Enauacna, qataq qami' ỹanema da ỹataqta qui'itta da qarquiyaqteỹaxaqui qataq qaica ca qarasouaxashechi. Yaqto' qom ñe'eguelaq Somaye da nnaictague' na qui'itta lamaxashecpi, nache qaica ca ỹauo'o ca qarasouaxashechi da qanachaachiỹot Ñim Lo'onatac 'Enauacna. Aja', nache 'eetec.
Currently Selected:
1 Tesalonicenses 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
