1 Juan 4
4
Nam ỹoqta 'eesa llalaqpi Ñim Lo'onatac 'Enauacna
1Qami' ñauochaxau' ỹaqaỹa't, saisheto' da qaua'amaqchiñi 'enauac nam 'eetega da netanguit So Saqcha'a La'añaxac Ñim Lo'onatac 'Enauacna. Nachaqrato' da qavi'iguiñi, yaqto' qauaỹaañi da ỹoqta 'eesa camaye huo'otaq saishet. Cha'aye ana 'alhua ỹataqta nlaqchigui na tenataxanaxaicpi 'eetega da la'aqtaxanaxanecpi Ñim Lo'onatac 'Enauacna. 2Qami' ishet da qauauattoñi ca shiỹaxaua da netanguit So Saqcha'a La'añaxac Ñim Lo'onatac 'Enauacna, da camaye ỹa'amaqten da So Jesucristo naỹa ana 'alhua qataq da ỹoqta 'eesa ỹale. 3Qaq da huo'o ca 'eetega da saq 'en de'era, nache camaye saishet da netanguit So Saqcha'a La'añaxac Ñim Lo'onatac 'Enauacna. Nachaqrata da hueto'ot som saqcha'a la'añaxac som npa'aguenaxaua So Cristo. Qaq qami' mashe qaua'aqaitapeguelec da se'eso saqcha'a na'añaxac iuen da anac, qaq aỹem sauotaique da qami' sa'aqtaxanema da somaye mashe hueta'a ana 'alhua.
4Qami' ỹalqolqa, qami' lalamaqa'ate Ñim Lo'onatac 'Enauacna qaq mashe sogote da qoroxoñiqui ne'ena tenataxanaxaicpi maye 'eetega da la'aqtaxanaxanecpi Ñim Lo'onatac 'Enauacna, cha'aye Ñimaye nache 'eetai' da qami' hueta'agueta, qataq ỹactec da la'añaxac, napacalec da la'añaxac so npa'aguenaxaua. 5Namayepi ỹataqta 'etaxaloxoicpi. Qaq nam maiche laỹepi 'etaxaloxoicpi maye huetalec ana 'alhua ỹalaqta'aguet namayepi, cha'aye 'eeta'am da ltaxaỹaxac. 6Qalaxaye qomi' mashe qomi' lalamaqa'ate Ñim Lo'onatac 'Enauacna qataq ishet da sauattonaq ca netanguit So Saqcha'a Na'añaxac maye ỹoqta 'eesa, qataq cam hueto'ot so saqcha'a na'añaxac maye tenataxanaxaic: qaq nam lalamaxatpi Ñim Lo'onatac 'Enauacna qomi' na'axaỹaxanalo qaq nam saishet da lalamaxatpi Ñimaye, qalaq saishet da qomi' qochetegalo.
Iuen da ñauotaxa't
7Qami' ỹauotaqa'ate ỹalqolqa, iuen da ñi 'oonolec da shenaqta ỹataqta ỹauotec ca lỹa, cha'aye de'era nauotaxanaqtaic chegoqo'ot Ñim Lo'onatac 'Enauacna. Qaq 'enauac nam huo'o da lauotaxanaqtaic, namayepi llalaqpi Ñim Lo'onatac 'Enauacna, qataq ỹauatton Ñimaye. 8Qaq cam saishet da dauotaxanaqta, camaye saishet da ỹauatton Ñim Lo'onatac 'Enauacna, cha'aye Ñimaye huotaxanaqtaqaic.
9Ñim Lo'onatac 'Enauacna qomi' ỹachaxanalo da lauotaxanaqtaic co'ollaq namaxalec ana 'alhua So Jesucristo, som 'oonolec Llalec, yaqto' chegoqchigui Somaye da 'enauac da shenaqta huo'o da qarca'alaxa chochaq tatec. 10Da ỹoqta 'eesa nauotaxanaqtaic saishet da chegoqchiguilo qomi' da sauotaxac Ñim Lo'onatac 'Enauacna, nachaqrata da Ñimaye qomi' ỹauoteque. Ỹoqo'oye namaxa ana 'alhua So Llalec, da yaqto' ỹapalaxat na qarasouaxashetpi chegoqchigui da l-leuaxa.
11Qami' ỹalqolqa, Ñim Lo'onatac 'Enauacna da nache 'eetec da lauotaxanaqtaic da shenaqta, nache nataqa'en qomi' iuen da ñi 'oonolec ỹataqta ỹauotec ca lỹa. 12Qaica ca nma'ai' da ỹauatton Ñim Lo'onatac 'Enauacna, qalaxaye da ñi 'oonolec da shenaqta da ỹataqta ỹauotec ca lỹa, nache 'eesa da Ñim Lo'onatac 'Enauacna qomi' netaiguilo, qataq nataqa'en da lauotaxanaqtaic Ñimaye qomi' do'onataxaatapoiguilo.
13Saỹatenaqta da qomi' ỹataqta 'eesa da ña'araqtaua'a Ñim Lo'onatac 'Enauacna, cha'aye Ñimaye qomi' ỹanema So Saqcha'a La'añaxac. 14Qomi' ỹataqta sauanaqchigui da Ñim Nta'a namaxalec ana 'alhua So Llalec, da yaqto' nca'alaxatec 'enauac nam huetalec anamaye, qaq damaye sa'axataqtac saishet da huo'o ca sho'oqtaique. 15Da huo'o ca shiỹaxaua da ỹa'amaqten So Jesucristo da Llalec Ñim Lo'onatac 'Enauacna, qaq que'eca shiỹaxaua qataq Ñim Lo'onatac 'Enauacna ỹataqta na'atta'a't, 'eeta'am da 'oonolec.
16Qaq ỹoqo'oye saỹatenaq qataq sa'amaqtenaq da Ñim Lo'onatac 'Enauacna qomi' lauotaqa'ate. Ñimaye ỹataqta huotaxanaqtaqaic, ỹoqo'oye camachaqca ca ỹauotec ca lqaỹa, nache camaye ỹataqta 'itchiguiñi da na'attaua'a Ñim Lo'onatac 'Enauacna. 17Qaq da ỹoqta 'eesa da sauotaxac na qarqaỹañicpi qataq shenaqta'am da 'eetec So Jesucristo co'ollaq huetalec ana 'alhua, nache saishet qone' da qomi' icolanaqche't que'eca na'a'q qom ñe'eguelaq So Jesús da nmit 'enauac na shiỹaxauapi. 18Ca shiỹaxaua maye huo'o da lauotaxanaqtaic, camaye saishet huo'o ca ñe'etaique. Cha'aye cam hueta'a da nsoxoyec, nache qaica ca ncolanaxa. Nachaqrata da que'eca 'eesa nsoxoyec, camaye ỹo'orauec da ncolanaxa. Da huo'o ca huo'o da lcolanaxa da Ñim Lo'onatac 'Enauacna ỹauo'o ca nhuaxanaguec, qaq camaye saxanaxa da ỹaỹaten da dauotaxanaqta.
19Qomi' ỹataqta sauotaxac na qarqaỹañicpi, cha'aye Ñim Lo'onatac 'Enauacna hua'auñi da qomi' ỹauoteque. 20Qaq da shenaqtega da sauotaxac Ñim Lo'onatac 'Enauacna, qalaxaye ñequiỹaqta'a't, nache qomi' tenataxanaxaiqa. Cha'aye da saishet da sauotaxac ca qarqaỹa maye seloqta'a, nache hua'aguectoxo' da ishet da sauotaxac Ñim Lo'onatac 'Enauacna maye saishet da selaqa'a. 21Qaq So Jesucristo qomi' ỹanema de'era lamaxasoxonaxac, 'eeta': «¡Qauauochec Ñim Lo'onatac 'Enauacna, qataq ñi 'oonolec ỹauotec ca lqaỹa!»
Currently Selected:
1 Juan 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
