1 Juan 3

1¡Ña qauloỹa! Ñim Lo'onatac 'Enauacna maye Nta'a ỹataqta lta'araic da lauotaxanaqtaic da shenaqta, ỹoqo'oye na shiỹaxauapi da qomi' iỹaxanalo, nache qomi' llalqa Ñimaye, qaq damaye ỹoqta 'eesa. Qaq ỹoqo'oye na 'etaxaloxoicpi maye netalec ana 'alhua saishet da qomi' ỹauatto'n, cha'aye nataqa'en saishet da ỹauatton Ñim Lo'onatac 'Enauacna. 2Qami' ñauochaxau' ỹaqaỹa't, ¡qomi' mashe qomi' llalqa Ñim Lo'onatac 'Enauacna! Qaq na'aictaxa da saxanaxa da saỹatenaqta cam 'eeteque qomi' cam ñaq natauo na'a'q, nachaqrata da saỹatenaq da So Jesucristo qom ỹoltaq nachaxan, nache shenaqta'am Somaye, cha'aye ỹataqta ñimaqa'ai' da seloqto'ot qome. 3'Enauac nam iuattaique qataq huo'o da lpi'iỹaxac da 'enauac ipacchigui de'era, nache ỹataqta ỹauo'o da na'añaxataxac da ỹo'ot ca ỹaỹamaqchiguiñi, 'eeta'am da 'eetec co'ollaxa So Jesús.

4'Enauac nam ỹo'ot ca lasouaxashet, namayepi sa ỹalaxalec na lamaxasoxonaxacpi Ñim Lo'onatac 'Enauacna, cha'aye da nasouaxashet chegoqchigui da sa qaỹalaxaguet Ñim Lo'onatac 'Enauacna. 5Qaq qami' mashe qauaỹachiñi da So Jesucristo naỹa co'ollaxa ana 'alhua, da yaqto' ỹapalaxat 'enauac na lasouaxashetpi na shiỹaxauapi. Qaq Somaye qaica ca lasouaxashet qataq saishet da ishet da huo'o ca lasouaxashet. 6Qaq ỹoqo'oye camachaqca ca huotaique da nauochaxaua So Jesucristo qataq huotaique da nache 'eetai' da na'attaua'a Somaye, nache saishet da queto'ot da ỹo'ottac na lasouaxashetpi. Qalaxaye ca huo'o ca lasouaxashet, nache sa ỹauatton So Jesucristo qataq sa ila'a Somaye.

7Qami' ỹalqolqa, ¡qaica qome ca qami' ỹatenache't! 'Enauac nam ỹalaxaguet Ñim Lo'onatac 'Enauacna, nache ỹataqta no'on shiỹaxaua, 'eeta'am So Cristo Jesús. 8Qalaxaye ca saq ỹet da ỹo'ot ca qauem, nache camaye nauochaxaua so pa'aguenataxanaxaic, cha'aye so pa'aguenataxanaxaic, nache 'eetai' da lle'etaxaloxo, chegoqchiguiña co'ollaq Ñim Lo'onatac 'Enauacna ñaq cheta'ague da ỹo'ot ana 'alhua. Qaq nachera da huo'omshe anaỹa ana 'alhua som Llalec Ñim Lo'onatac 'Enauacna: da yaqto' ilaxachigui 'enauac nam ỹo'ottac so pa'aguenataxanaxaic.

9Qaica ca llalec Ñim Lo'onatac 'Enauacna da queto'ot da ỹo'ottac na lasouaxashetpi, cha'aye dam achaalataxac maye hueto'ot, chegoqo'ot Ñimaye. Qaq ỹoqo'oye que'eca shiỹaxaua saishet da queto'ot da ỹo'ottac da lle'etaxaloxo, cha'aye ỹataqta llalec Ñim Lo'onatac 'Enauacna.

10Qaq qomi' ishet da sauattonaq negue't ca llalec Ñim Lo'onatac 'Enauacna, qataq negue't ca llalec so pa'aguenataxanaxaic: nam llalaqpi so pa'aguenataxanaxaic, nachena nam saishet da ỹaỹamaxaren da ỹo'ot ca ỹaỹamaqchiguiñi qataq saishet da ỹauotec ca lỹa.

11Cha'aye dam chegoqta'ague da qami' qaỹapaxagueetegueque da ñi 'oonolec da shenaqta, iuen da ỹataqta ỹauotec ca lỹa. 12Saishet da shenaqta'am so Caín maye 'eeta'am ca llalec so pa'aguenataxanaxaic, nache ỹalauat so lqaỹa. Qaq ¿ta'ainco' ye ỹalauat? Qomye da ỹo'ottac so Caín co'ollaxa ỹataqta qauem, qaq dam ỹo'ottac som lqaỹa co'ollaxa qalaq ỹataqta 'onaxaic.

13Qami' ñauochaxauapi, saishet qome da qarhualliỹa'a da nam 'etaxaloxoicpi maye huetalec ana 'alhua da qami' nquiỹalo. 14Cha'aye de'era nsoxoyec maye qomi' hueto'oto ỹachaxan da mashe saishet da qomi' leuaxaiqa, nachaqrata da nagui ñeca'alaqtauec. Qalaxaye ñi 'oonolec da qoñiita da saishet da ỹauotec ca lỹa, nache damaye naigui da ñaq qoviitaigui da la'añaxac da nleuaxa. 15Da qami' qanquiỹaita'a't, nache qami' laataxanaxaiqa. Qaq mashe qauaỹachiñi da qaica ca laataxanaxaic da inoxoneua'a da nca'alaxa maye chochaq tatec. 16Qalaxaye qomi' mashe saỹatenaq da naigui da nsoxoyec, cha'aye So Jesucristo ỹaaleguete qomi' da nachaalataxac. Qaq ỹoqo'oye nataqa'en qomi' iuen da sanaq da qanachaalataxac da ñañanaxalec na qara'amqaanataxanaxauapi. 17Da huo'o ca sallaxanec da ilota'a ca 'oonolec nam la'amqaanataxanaxauapi da huo'o da lhuenaxanaxa, qalaxaye saishet da itauan, nache que'eca sallaxanec saishet da dauotaxanaqta da 'eeta'am Ñim Lo'onatac 'Enauacna da lauotaxanaqtaic.

18Qami' ỹalqolqa, saisheto' qome da ndotre'c naua qara'aqtaqa da shenaqtega da huo'o da qarsoxoyec, nachaqrato' qome da iuen da sachaxanaq da qarsoxoyec chegoqchigui ca so'otaq.

19-20Qomi' saỹatenaq da qomi' lalamaqa'ate Ñim Lo'onatac 'Enauacna, cha'aye sauotaxac na qaraỹepi. Qaq ỹoqo'oye da ñanomaqta da huo'o ca qarasouaxashet, qalaxaye nache 'ena'am saỹaanaqta da Ñim Lo'onatac 'Enauacna saishet da qomi' nmaxaleguete camaye, cha'aye Ñimaye nataỹaña 'enauac nam nvilỹaxacpi qataq 'enauac ỹaỹaten.

21Qami' ỹaqaỹarolqa, da ñanomaqta da qarvilỹaxac da saishet da huo'o ca qarasouaxashet, nache saỹaanaqta da Ñim Lo'onatac 'Enauacna da saishet da ỹo'ot ca qarasouaxashet. 22Nache qomi' ỹanema cam seỹaxanaqaique, cha'aye salaxasoxoguet nam lamaxasoxonaxacpi, qataq so'otaq cam ỹaỹamaxareeta Ñimaye. 23Qaq dam lamaxasoxonaxac Ñimaye qomi' 'enapegalo da sa'amaqtenaq So Llalec Jesucristo, qataq ñi 'oonolec da shenaqta ỹataqta ỹauotec ca lỹa, ipagaqchiichigui dam qomi' ỹamaxaleguete So Jesús. 24Da salaxasoxoguet Ñim Lo'onatac 'Enauacna, nache ỹataqta ña'araqtaua'a Ñimaye, qaq Ñimaye qomi' hueta'agueta. Qaq de'era saỹatenaq chegoqchigui So Saqcha'a Na'añaxac Qui'itta maye qomi' ỹanema.

Currently Selected:

1 Juan 3: LÑLE13

Highlight

Copy