Éxodo 3

Chiga Moisésma ttu'se'cho

1Moisésja tise quitsa ccashe'ye Jetro ovejandeccuma coira'je. Nane Jetro tsu Madián'su Chigama afa'su (tise faesu inise Reuel). Tsa'caen coira'jepa biani a'i menia angapa fae a'ta tsu Horeb ccotta'cconga nepi. Tsa ccotta'cco tsu Chiga can'jen'cho ccotta'cco. 2Tse'ttinga tsu Chigama sefacconi'su shondo'suja quini'si si'ngeve anchandasi Moisésnga attian. Moisésja tsama ñotsse camba in'jan quini'sija si'ngeve anchanda'ma ñoa'me ju'rumbi. 3Tsa'cansi attepa in'jan: “¿Jongoesupa tsu ccaninga'o? Japa gi caña micomba tsu quini'sija ju'rumbi.”

4Na'su Chigaja tsa'caen Moisés cañe in'jamba catse ji'choma attepa tsa quini'si'ye afapa su:

—¡Moisés! ¡Moisés!

Pañamba Moisésja su:

—Va'tti gi can'jen.

5Tsa'caen susi Chigaja su:

—Vani catsejama. Que sapatoma shichhaja. Va'tti que ccutsu'ttija Chiga ande tsu.

6Toya'caen tsu su:

—Ña gi que coenzandeccu'yembe Chiga, nane Abraham, Isaac toya'caen Jacobmbe Chiga.

Tsa'caen susi Moisésja camba'juma picco Chigama cañe dyojopa. 7Tsa'ma Na'su Chigaja ti'tsse afapa su:

—A'tatsse gi atte ña aindeccu Egiptoni vana'jen'fa'choma. Toya'caen gi paña tise'pa ñombi'yepa fundo'je'choma semoesundeccu tise'pama vanae'jen'fasi. Ñoa'metsse gi atesu tise'pa ñombi'ye'je'choma. 8Tsa'camba gi vani ande egiptondeccu tson'jen'choma itsapa ccushaeñe. Nane tsa ande'ye gi israendeccuma somboemba ñotssia rande andenga angaya. Tseni tsu chocho toya'caen tuño cuñajun'cho'qque shacaya'bi. Tsa ande tsu cananeo, hitita, amorreo, ferezeo, heveo toya'caen jubuseondeccu canse'cho ande. 9Que canjan, paña gi israendeccu ñombi'yepa fundo'je'choma. Toya'caen gi atte egiptondeccu tise'pama tsain'bitsse egae tson'jen'choma. 10Tsa'cansi, que jaja. Quema gi moeña faraónga japa Egipto ande'ye ña aindeccuma, tsa israendeccuma somboeñe.

11Tsa'caen susi Moisésja Chiganga su:

—¿Majaña gi ña faraónga japa Egipto ande'ye israendeccuma somboeñe?

12Tsa'caen susi Chigaja su:

—Ña gi quei'ccu can'jeña. Toya'caen va canjen'chota tsu ñoa'me ñotsse canjaemba quema manda'cho: Maqui a'ta queja, ña aindeccuma Egipto'ye somboen'da qui que'i poiyi'cco va'ttinga jipa ñama iñajan'faya.

13Tsa'ma Moisésja ccase afapa su:

—Ña israendeccunga japa: ‘Tsa que'i coenzandeccumbe Chiga tsu ñama que'ini moe’ qquen ña susi tsendeccu: ‘¿Jongoesu inise tsu?’ qquen iñajampaña'ninda ¿jongoesu qquen gi suya?

14Iñajampañasi Chigaja su:

—ña gi ñoa'me ña. Toya'caen israendeccungata qui suya: ‘Tsa ña gi qquen su'cho tsu que'ini ñama moe.’

15Toya'caen Chigaja Moisésnga su:

—Toya'caen israendeccungaja qquen suja: ‘Na'su Chiga Quitsa que'i tayopi'su coenzandeccumbe Chiga, nane Abraham, Isaac toya'caen Jacobmbe Chiga tsu que'ini ñama moe.’ Tsangae tsu tsa ña iniseja jinchoya. Nane tsangae tsu a'ija tsesu qquen ñama injan'jen'faya. 16Japa israe'su coenzandeccuma boñamba qquen condaja: ‘Na'su Chiga Quitsa que'i tayopi'su coenzandeccumbe Chiga, nane Abraham, Isaac, toya'caen Jacobmbe Chiga tsu ñanga attiamba qquen su: Que'ima injan'jemba gi egiptondeccu que'ima ma'caen tson'jen'choma atte. 17Toya'caen tsu su: Egiptondeccu vanae'jen'cho'ye gi somboemba cananeo, hitita, amorreo, ferezeo, heveo toya'caen jebuseondeccu can'jen'cho andeni angaya. Tsa andeni tsu chocho toya'caen tuño cuñajun'cho'qque shacaya'mbi.’ 18Tsa'caen susi tsu coenzandeccu quema pañamba quei'ccu fae'ngae egipto'su na'sunga ja'faya. Tsa'caen japa qui na'sunga qquen suya: ‘Na'su Chiga Quitsa, tsa hebreondeccumbe Chiga tsu inginga cachian. Tsa'caen cachiansi gi in'jan'fa ingima antteja tres a'ta pa'cco a'i menia japa oque oraemba ingi Na'su Chiga Quitsanga afeye.’ 19Tsa'ma tsa'caen su'ni'qque egipto'su na'suja tisema mingae dyoñambi'ninda que'i somboye antteya'bi'choa've qquen gi in'jan. 20Tsane'da gi ña oshacho'choma canjaemba egiptosundeccuma dyoñaña osha'cho egave daqque'sui'ccu tise'pama iña'ccaemba. Tsa'caen tsonsi tsu faraónjan que'ima somboeña. 21Toya'caen gi egiptondeccunga tsoña cuintsu israendeccu sombo'je'ninda ñotsse camba moe'faye. Tsa'caen camba moesi tsu me'cco jambe'yi osha'choma anga'faya. 22Nane poi pushesundeccu tsu tise'pai'ccu pporotsse canjen'su toya'caen tise'pai'ccu fae'ngae canjen'suma'qque osha'chove iñajan'faya: corima ñoña'cho, totoacorima ñoña'cho toya'caen ondiccuqque'su sarupave'qque. Tsai'ccu qui que'i dushundeccuma ondiqquian'faya. Tsa'caen tsomba qui egiptondeccuma me'ccoe cati ja'faya.

Currently Selected:

Éxodo 3: con

Highlight

Copy