Lukas 4

Jesus woat vesocht

(Mat 4,1-11; Mrk 1,12-13)

1Dan kjeem Jesus, voll vom Heiljen Jeist, vom Jordan trigj, un wort vom Jeist en de Wiltnis jefieet, 2wua hee 40 Doag vom beesen Fient vesocht wort. Hee eet en dee Doag nuscht, un aus dee äwa wieren, hungad am. 3De beesa Fient säd to am: Wan du Gott sien Sän best, dan jebeed disen Steen, Broot to woaren. 4Jesus säd: “Daut steit jeschräwen, Een Mensch läft nich bloos von Broot, oba von aules waut Gott jerät haft.” #5Mo 8,3

5Dan neem de beesa Fient am opp een huagen Boajch nopp un leet am, en een Uagenblekj, aule Kjennichsrikjs en de Welt seenen 6un säd to am: Dee woa ekj die aula met Macht un Harlichkjeit toop jäwen; wiels dee sent mie jejäft worden, un ekj kaun dee däm jäwen, wäm ekj well. 7Un wan du mie aunbäden woascht, es daut aula dient. 8Jesus säd: Daut steit jeschräwen: “Du saust sest kjeenem aus Gott, dienen Harn, aunbäden un eensich am saust du deenen.” #5Mo 6,13

9Dan brocht de beesa Fient am no Jerusalem un stald am opp de hechste Tempelspetz un säd: Wan du Gott sien Sän best, dan sprinj von hia rauf; 10wiels doa steit jeschräwen: “Hee woat siene Enjel befälen, die to bewoaren. #Psa 91,11-12 11Dee woaren die opp de Henj droagen, daut du die de Feet nich aun de Steena steeten woascht.” 12Jesus säd: Doa es jesajcht: “Du saust Gott, dienen Harn, nich vesieekjen.” #5Mo 6,16 13Aus de beesa Fient met aul siene Vesieekjungen derch wia, veleet hee am bat de näakjste Jeläajenheit. #Heb 4,15

De Aunfank von Jesus sien Woakj en Galiläa

(Mat 4,12-17; Mrk 1,14-15)

14Jesus kjeem en dän Heiljen Jeist siene Krauft trigj no Galiläa, un daut Nies spreed sea schwind derch de gaunze Jäajent. 15Hee lieed en äare Schoolen, un aulemaun lowd am.

Jesus en Nazaret vestat

(Mat 13,53-58; Mrk 6,1-6)

16Dan jinkj hee no Nazaret, wua hee oppjewossen wia.Un aum Sabat jinkj hee en de Judenschool nenn, soo aus hee daut jewant wia, un stunt opp, om waut to läsen. 17Un am wort dän Profeeten Jesaja siene Schreft jejäft. Un aus hee daut Buak opmuak, funk hee de Städ, wua soo jeschräwen steit: #Jes 61,1-2

18“Dän Harn sien Jeist rut opp mie,

wiels hee haft mie jewält, de oame daut Evangelium to prädjen.

Hee haft mie jeschekjt, dee met een jebroaknet Hoat to heelen,

de faustjenomne to prädjen daut see frie un loos sent,

un de blinje, daut see seenen kjennen,

un dee, dee unjadrekjt sent, frie to stalen, #Jes 42,7

19un to sajen, daut Gott sien Jnodenjoa jekomen es.” #3Mo 25,10

20Dan muak hee daut Buak too un jeef dän Deena daut trigj un sad sikj dol, un aulemaun en de School kjikjt no am. 21Un hee säd to an: Vondoag es dise Schreft erfelt, soo aus jie jehieet haben.

22See jeewen am aula rajcht un wundaden sikj, äwa dee seelichmoakende Wieed, dee hee räd, un säden: Es dit nich Josef sien Sän? #Luk 3,23 23Un hee säd to an: Jie woaren mie bestemt noch dit Sprechwuat väahoolen: Dokta, halp die selfst! Wie haben jehieet, waut du en Kapernaum fa groote Dinja jedonen hast! Nu doo daut hia tus en diene Staut uk. 24Hee säd wieda: Ekj saj junt de Woarheit: Een Profeet woat tus en siene Staut kjeenmol oppjenomen. #Joh 4,44 25Ekj saj junt dit: Doa wieren to Elia siene Tiet väl Wätfrues en Israel, aus de Himmel dree Joa un sas Moonat veschloten wia, un äwa daut gaunze Launt, eene groote Hungaschnoot kjeem, #(25 un 26) 1Kjen 17,1.9-24 26un doch wort Elia no kjeene Wätfru jeschekjt buta eene en Sarepta en Sidon. 27Un doa wieren en Israel to Elisa dän Profeet siene Tiet väl Lepra, un von dee wort kjeena jereinicht buta Naaman von Sierien. #2Kjen 5,1-14 28Un dee, dee doa en de School wieren, worden aula flaument doll, aus see daut hieeden. 29See stunden opp un juagen am ut de Staut rut un neemen am no een steilen Aufgrunt opp däm Boaj, opp dän dee Staut stunt, om am doa rauftoschmieten. 30Oba hee jinkj meddenderch an un jinkj sienen Wajch.

Jesus drift eenen beesen Jeist rut

(Mrk 1,21-28)

31Un hee jinkj no Kapernaum, eene Staut en Galiläa, un lieed an doa aum Sabat. #Mat 4,13; Joh 2,12 32See wundaden sikj äwa siene Lia, wiels doa wia eene Krauft doarhinja. #Mat 7,28-29; Joh 7,46 33En de Judenschool wia een Maun, dee von eenem orreinen Jeist besäten wia; dee schrieech met eene lude Stemm 34un säd: Lot ons toch! Waut hab wie met die to doonen, Jesus von Nazaret? Best du jekomen ons en de Grunt to brinjen? Ekj weet wäa du best: du best Gott sien Heilja. 35Jesus befool am strenj, stell to sennen un ut dän Maun rut to komen. De Soton schmeet dän dol ver aule Menschen un fua rut, onen am Schoden to doonen. 36An äwakjeem aula eene Forcht un säden eena toom aundren: Waut es en disen Mensch siene Wieed fa eene Krauft? Met Macht un Jewault jebitt hee de orreine Jeista, un dee foaren rut. 37Un waut hee jedonen haud, wort en de gaunze Jäajent runtjerät.

Jesus heelt Petrus siene Schwieemutta un väl aundre Menschen

(Mat 8,14-17; Mrk 1,29-34)

38Jesus veleet de School un jinkj bie Simon em Hus nenn. Simon siene Schwieemutta leet met sea huaget Feeba, un see prachaden Jesus ar to halpen. 39Hee jinkj un bekjt sikj äwa ar, un derch sien jebeedendet Wuat veleet ar daut Feeba. Un see stunt fuaz opp un bedeend an. 40Aus de Sonn unjajinkj, brochten de Menschen aulahaunt kranke no Jesus. Hee läd een jiedrem de Henj opp un heeld an. 41Un doa kjeemen ut väl Menschen beese Jeista rut un schrieejen: Du best Gott sien Sän! Hee oba beschwicht dee un jeef dee nich de Jeläajenheit to räden; dee wisten daut hee Christus wia. #Mat 8,29; Mrk 3,11-12

Jesus prädicht de Goode Norecht äwaraul em judischen Launt

(Mrk 1,35-39)

42Jäajen Morjen jinkj Jesus no eene eensome Städ. De Menschen oba sochten sikj am, un aus see doahan kjeemen, wua hee wia, vesochten see am doa to hoolen un nich loten wajchgonen. 43Hee oba säd: Ekj mott uk noch no aundre Städa gonen, daut Evangelium von Gott sien Rikj doa uk to prädjen; wiels daut es wuatoo ekj jeschekjt sie. 44Un hee hilt aun en de Schoolen en Judäa #4,44 Eenje oole Schreften sajen Galiläa. to prädjen. #Mat 4,23

Currently Selected:

Lukas 4: PB

Highlight

Copy