Lukas 23
23
Jesus ver Pilatus
(Mat 27,1-2.11-14; Mrk 15,1-5; Joh 18,28-38)
1Dan stunden see aula opp un brochten am no Pilatus. 2Doa fungen see aun am to beschuljen un säden: Wie troffen disem doabie, daut hee daut Volkj veleit un vebitt, dän Kjeisa dän Taks to tolen, un sajcht daut hee selfst Christus, een Kjennich es. #Luk 20,25; Apost 24,5 3Dan fruach Pilatus am direkjt: Best du de Juden äa Kjennich? Hee auntwuad am un säd: Daut es soo aus du sajchst. 4Dan säd Pilatus toom Huagenpriesta un toom Volkj: Ekj finj kjeene Schult aun disen Maun. 5Oba see worden bloos sooväl oaja un säden: Hee räacht daut Volkj opp un jeit met siene Lia derch gaunz Judäa, von Galiläa bat hia.
Jesus ver Herodes Antipas
6Aus Pilatus von Galiläa hieed, fruach hee auf dis Maun von Galiläa wia. 7Un sooboolt aus hee wist, daut Jesus unja Herodes siene Harschoft jehieed, schekjt hee am no Herodes, dee dan uk jrod en Jerusalem wia. #Luk 3,1 8Aus Herodes Jesus sach, wia hee sea froo, wiels hee haud aul lang een velangen jehaut am to seenen, wiels hee haud aul väl von am jehieet, un hee hopt to seenen, daut hee Wunda doonen wudd. #Luk 9,9 9Dan fruach hee am välet, oba Jesus jeef am kjeene Auntwuat. 10Un de Huagepriestasch un Schreftjelieede stunden un vekloagden am sea hoat. 11Oba Herodes un siene Soldoten veachten un vespotten am, trocken am een wittet Kjleet äwa un schekjten am trigj no Pilatus. 12Krakjt aun dän Dach worden Pilatus un Herodes Frind met eenaunda, wiels soowiet wieren see sikj fientlich jäajenäwa.
Pilatus behaupt daut Jesus oschuldich es
(Mat 27,15-26; Mrk 15,6-15; Joh 18,39—19,16)
13Dan roopt Pilatus de Huagapriesta un väaschte un uk daut Volkj toop un säd to an: 14Jie haben disen Maun no mie jebrocht aus eena, dee daut Volkj veleiden deit; un ekj hab am en june Jäajenwuat, jrintlich em Vehia jenomen, un ekj hab am aun nuscht schuldich jefungen, wuafäa jie am aunkloagen; 15un Herodes uk nich, wiels hee schekjt am trigj no ons. Seet doch, hee haft werkjlich nuscht jedonen, daut dän Doot vedeent haft. 16Doawäajen woa ekj am strofen un loosloten. 17(Wiels hee must an opp däm Fast eenen faustjenomnen rut jäwen.) #23,17 Eenje oole Schreften haben disen Varsch nich.
Daut Doodesuadeel
(Mat 27,15-26; Mrk 15,6-15; Joh 18,39—19,16)
18Un see schrieejen aula tojlikj: Wajch met disen Maun un jeff ons Barabas loos! 19Dee wia doawäajen enjestopt, wiels hee een Opprua en de Staut aunjestalt un een Mort begonen haud. 20Un Pilatus, wiels hee Jesus jieren frieloten wull, räd noch eemol to an. 21See oba schrieejen: Kjriezicht am! Kjriezicht am! 22Hee säd to an toom dredden mol: Wuarom? Waut haft hee fa een vebräakjen begonen? Ekj finj aun am kjeene Uasoak toom Doot. Ekj woa am strofen un dan gonen loten. 23Oba see hilden aun lud to schrieen, daut see velangden am to kjriezjen. Un äa Jeschrech neem äwahaunt. 24Dan spruak Pilatus daut Uadeel, soo aus see sikj daut wenschten, 25un hee jeef an dän loos, dän see velangden, dee wäajen een Opprua un een Mort wia enjestopt worden; un jeef an Jesus, met am to doonen waut see wullen.
Jesus oppem Wajch hanjerecht to woaren
(Mat 27,32-44; Mrk 15,21-32; Joh 19,17-27)
26Un aus see am wajch leiden, kjrieejen see Simon, een Maun von Kiereen to hoolen, dee von Launt kjeem. Opp dän läden see daut Kjriez, daut hee Jesus daut hinjaraun droagen sull.
27Un am kjeemen een grootet Schoof Menschen hinjaraun un uk Frues, dee am bejaumaden un hielden. 28Oba Jesus dreid sikj om un säd to an: Jie Dajchta von Jerusalem, hielt nich äwa mie, oba hielt äwa junt selfst un äwa june Kjinja. 29Wiels dee Tiet woat bestemt komen, en dee see sajen woaren: Jesäajent sent de onfruchtboare, dee kjeen Kjint to Welt jebrocht haben; un de Brosten, dee nie sent jesoagen worden. #Luk 21,23 30Dan woaren see aunfangen to de groote Boaj to sajen: Fault opp ons nopp! un to de kjliene Boaj: Bedakjt ons! #Hos 10,8; Opb 6,16; 9,6 31Wiels wan see dit aum jreenen Holt doonen, waut woat dan passieren, wan daut ieescht drieech es? #1Pet 4,17
32Doa wieren uk noch twee Vebräakja, dee met am tojlikj jekjriezicht worden.
Jesus aum Kjriez
(Mat 27,33-44; Mrk 15,22-32; Joh 19,17-27)
33Un aus see bat de Schädelplauz kjeemen, kjriezijden see am doa, un uk de twee Vebräakja, eenem aun de rajchte un eenem aun de linkje Sied. 34Dan säd Jesus: Voda, vejeff an, wiels see weeten nich waut see doonen! #23,34 Eenje oole Schreften haben nich Dan säd Jesus: Voda, vejeff an, wiels see weeten nich waut see doonen. Un see trocken Lessa, om sikj siene Kjleeda entodeelen. #Psa 22,19; Jes 53,12; Apost 7,60; 3,17 35Un de Menschen stunden un kjikjten too. Un soogoa de Volkjsleida, met de aundre toop, dreewen äaren Spott äwa am un säden: Hee haft aundre jeholpen; un wan hee Christus, Gott sien Utjewälda es, dan lot am sikj nu selfst halpen. 36De Soldoten dreewen uk äaren Spott met am un kjeemen un booden am suaren Wien aun 37un säden: Wan du de Judenkjennich best, dan halp die selfst! 38Un äwa am wia en griechisch, latiensch, un hebräisch #23,38 Eenje oole Schreften sajen nich en griechisch, latiensch, un hebräisch. jeschräwen: Dit es de Kjennich von de Juden.
39Dan lastad eena von de Merda aum Kjriez äwa am un säd: Wan du de Christus best, dan halp die selfst, un uk ons! 40Oba de aundra beschwicht am un säd: ferchst du nich emol Gott? Wiels du best unja de selwje Vedaumnis. 41Un wie kjrieen met rajcht dän Loon dän wie vedeent haben; oba dis Maun haft nuscht ojjeschekjtet jedonen. 42Dan säd hee to Jesus: Har, denkj aun mie, wan du en dien Rikj nenn kjemst! #Mat 20,21 43Jesus säd to am: Ekj saj die de Woarheit: Du woascht vondoag met mie em Paradies sennen. #2Kor 12,4
Jesus stoaft
(Mat 27,45-56; Mrk 15,33-41; Joh 19,28-30)
44Daut wia nu Klock 12 opp Meddach. Dan wort daut bat Klock dree no Meddach äwa de gaunze Welt diesta, 45un de Sonn vedunkeld, un de Gardien em Tempel reet en de Medd uteneen. #2Mo 26,31-33; 2Chr 3,14 46Un Jesus schrieech lud: Voda, ekj befäl mienen Jeist en diene Henj! Un aus hee dit jesajcht haud, storf hee. #Psa 31,6; Apost 7,59
47Aus de Offizia sach, waut doa passieed, lowd hee Gott un säd: Dit es woarhauftich een fromma Maun jewast! 48Un aus daut Volkj, daut doa romstunt un tookjikjt, sach waut doa passieed, schluagen dee sikj opp de Brost un jinjen wada trigj. 49Oba aul siene bekaunde, un de Frues dee von Galiläa metjekomen wieren, stunden wieda auf un kjikjten too. #Luk 8,2-3
Jesus woat em Grauf jelajcht
(Mat 27,57-61; Mrk 15,42-47; Joh 19,38-42)
50Nu wia Josef, een Rotshar, een gooda, opprechtja Maun jrod doa, 51un haud en äaren Rot un Haundlen nich met enjewellicht. Hee wia von de judsche Staut Arimatäa, un luad uk no daut Gottesrikj. #Luk 2,25.38 52Dis Maun jinkj no Pilatus un fruach no Jesus sienen Kjarpa. 53Un hee neem dän rauf un wekjeld dän en Lienzeich un läd dän en een nieet Grauf, daut ut een Steen utjehakt wia, un noch niemols wäa bennen jeläajen haud. 54Daut wia aun dän Dach aus see toom Sabat reedmuaken, un de Sabat funk aun. #23,54 Eenje oole Schreften sajen funk aun to doagen. 55Un de Frues, dee von Galiläa metjekomen wieren, kjeemen hinjaraun un besagen sikj daut Grauf, un wua sien Kjarpa hanjelajcht wort. 56Dan jinjen see trigj un muaken Kjriedarie un scheenrikjende Eelj reed. Oba aum Sabat ruden see, soo aus daut Jesaz velangd. #2Mo 20,10
Currently Selected:
Lukas 23: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
