Lukas 21

De Wätfru äa Opfa

(Mrk 12,41-44)

1Aus Jesus oppkjikjt, sach hee de rikje äare Gowen en de Tempelkaus nenn lajen. 2Hee sach uk woo eene oame Wätfru twee Koppasch nenn läd. 3Hee säd: Ekj saj junt de Woarheit: Dise oame Wätfru haft mea nenn jelajcht aus de aundre aula toop, 4wiels dee haben aula ut äaren Äwafluss em Gotteskausten jelajcht. Dise oba haft en äare Oamoot aules jejäft, waut see toom Läwen haud. #2Kor 8,12

Jesus sajcht de Tempel woat doljebroaken woaren

(Mat 24,1-2; Mrk 13,1-2)

5Wiels, aus eenje am doaropp oppmoakjsom muaken, woo de Tempel met feine Steena un gottjeweide Gowen jezieet wia, säd hee: 6Waut daut aunbelangt, waut jie hia seenen, doa woat eene Tiet komen, daut hia nich een Steen opp däm aundren bliewen woat. Dee woaren aula doljebroaken woaren. #Luk 19,44

Trubbel un Vefoljunk

(Mat 24,3-14; Mrk 13,3-13)

7See fruagen am: Liera, saj ons, wanea daut passieren saul, un waut woat doa fa een Tieekjen sennen, wuaraun wie seenen kjennen, daut de Tiet hia es? 8Un hee säd: Paust opp, daut jie nich veleit woaren. Doa woaren väl en mienen Nomen komen un sajen: Ekj sie daut. Dan es de Tiet dicht bie, oba lot junt nich metrieten. 9Un wan jie von Kjrich un Opprua hieren, fercht junt nich. Dit mott aula ieescht passieren; oba daut Enj kjemt noch nich fuaz.

Tieekjen, dee opp daut Weltenj hanwiesen woaren

(Mat 24,7-8; Mrk 13,8)

10Een Volkj woat jäajen daut aundre oppstonen, un een Rikj jäajen daut aundre. 11Un doa woat opp veschiedne Städen grootet Ieedbäben un Hungaschnoot un Pestilenz sennen; un aum Himmel woat schrakjeljet un groote Tieekjens to seenen sennen.

12Oba ea dit aula passieren woat, woaren see sikj aun junt vejriepen un junt nostonen, junt ver daut Schoolenjerecht brinjen un faustnämen, un woaren junt om mienen Nomen sient haulwen ver Kjennichs un aunjestalde stalen. #(12-18) Mat 10,18-22.30 13Oba daut woat fa junt eene Jeläajenheit sennen, jun Zeichnis to jäwen. 14Sorcht nich em verut doaräwa, woo jie junt veauntwuaten woaren, #Luk 12,11 15wiels ekj woa junt met Wieed un Weisheit vesorjen, wuajäajen june Jäajna nich woaren räden ooda stonen kjennen. #Apost 6,10 16Jie woaren von june Elren, Breeda, Frind un Frintschoft verot woaren, un dee woaren uk eenje von junt doot moaken. 17Un jie woaren om mienen Nomen sient haulwen von aule Menschen vestat woaren. 18Oba junt saul nich een Hoa vom Kopp faulen. #Luk 12,7 19Wan jie staunthauft bliewen, woa jie june Seelen jewennen. #Heb 10,36

Jerusalem woat en de Grunt jebrocht woaren

(Mat 24,15-21; Mrk 13,14-19)

20Wan jie Jerusalem woaren von Armeeen beloagat seenen, dan sell jie weeten, daut daut boolt woat en de Grunt jebrocht woaren. 21Dan lot dee, dee en Judäa sent, en de Boaj nenn flichten; un lot dee, dee medden en de Staut sent, rut gonen; un lot dee, dee opp daut Launt sent, nich en de Staut nenn komen. 22Wiels en dise Doag woat Rach jeeeft, daut aules soo romkjemt aus jeschräwen steit. #5Mo 32,35 23Oba wee fa dee, dee en dee Tiet schwanga sent; un fa dee, dee een Kjint aun de Brost haben! Wiels doa woat en dee Tiet groote Noot oppe Ieed sennen, un een Strofjerecht äwa daut Volkj komen, 24un dee woaren derch däm Schwieet faulen, un von aule Velkja faustjenomen un wajch jefieet woaren; un de Velkja woaren Jerusalem unja de Feet haben, bat äare Tiet woat aufjerant sennen. #Jes 63,18; Reema 11,25; Opb 11,2

De Menschensän woat aus Weltrechta komen

(Mat 24,29-31; Mrk 13,24-27)

25Un aun de Sonn, Mon un Stierns woaren Tieekjens sennen. Un oppe Ieed woaren de Menschen ut Angst fa daut ruzhende Mäa un de toobende Walen zoagen. #Opb 6,12-13 26Un wan de Himmelskjraften sikj schedren woaren, woat de Menschen en äare Angst daut Hoat vesajen, wan see doaraun denkjen, waut äwa dise Welt komen saul. 27Un dan woaren see dän Menschensän opp eene Wolkj, en groote Krauft un Harlichkjeit, komen seenen. #Dan 7,13 28Wan dit aula aunfangt to passieren, dan häft de Kjap opp un kjikjt, wiels sikj june Radunk nodat. #Flp 4,4-5

Daut Jlikjnis vom Fiejenboom

(Mat 24,32-35; Mrk 13,28-31)

29Un hee vetald an een Jlikjnis: Kjikjt nom Fiejenboom un no aule aundre Beem; 30sooboolt aus dee Bläda kjrieen, weet jie fa junt selfst, daut dan de Somma dicht bie es. 31Un jrod soo uk, wan jie dit aula passieren seenen, räakjent doamet, daut daut Gottesrikj dicht bie es.

32Ekj saj junt de Woarheit: Dise Jennerazion woat nich utstoawen, bat dit aula jeworden es. 33Himmel un Ieed woaren vegonen, oba miene Wieed woaren nich vegonen.

Waka bliewen es wichtich

34Siet väasechtich, daut jie junt nich derch fräten un supen un sorjen äwa dit Läwen, daut Hoat beloden, un daut dee Dach dan onverhofs äwa junt kjemt; #Mrk 4,19; 1Tess 5,3 35wiels dee woat soo aus eene Schlenj äwa aulem komen, dee oppe Ieed wonen. 36Oba siet waka un bät, daut jie aul daut utem Wäaj komen muchten, waut doa passieren saul, un ver dän Menschensän stonen kjennen.

37Äwadach lieed hee em Tempel, oba zeowes jinkj hee opp däm Oliewen Boajch un brocht doa de Nacht too. 38Un aulemaun wudd tiedich zemorjes oppstonen un nom Tempel gonen, om doa no am to horchen.

Currently Selected:

Lukas 21: PB

Highlight

Copy