Johanes 8

1Jesus oba jinkj nom Oliewen Boajch. 2Un tiedich zemorjes kjeem hee wada em Tempel nenn un aulet Volkj kjeem no am. Hee sad sikj dol un funk aun, an to lieren.

Jesus un de Ehebräakjarin

3Dan brochten de Schreftjelieede un Farisäa eene Fru no am, dee see biem Ehebruch betroffen hauden. Un aus see ar doa en de Medd hanjestalt hauden, 4säden see to am: Liera, dise Fru wort biem Ehebruch jejräpen. 5Moses haft ons em Jesaz daut Jeboot jejäft, soone Frues to steenjen. Waut sajchst du doatoo? #3Mo 20,10 6Dit säden see, om am to vesieekjen, daut see eene Uasoak hauden, am to vekloagen. Oba Jesus bekjt sikj bloos dol un schreef metem Finja opp de Ieed. 7Oba aus see aunhilden, am to froagen, recht hee sikj opp un säd to an: Däm, wäa von junt onen Sind es, lot dän ieeschten Steen opp ar schmieten. #Reema 2,1 8Un dan bekjt hee sikj wada dol un schreef opp de Ieed. 9Aus see daut hieeden, fungen see biem elsten aun un jinjen eena nom aundren wajch, un leeten Jesus doa auleen met de Fru, dee doa noch emma stunt. 10Jesus recht sikj opp un säd to ar: Fru, wua sent diene Vekjläaja? Haft die kjeena vedaumt? 11See säd: Har, nich eena. Un Jesus säd to ar: Ekj vedaum die uk nich. Go, un sindj nich mea. #8,11 De elste oole Schreften haben nich de Varsch von 7,53 bat 8,11. #Joh 5,14

Jesus es daut Licht fa dise Welt

12Dan räd Jesus wada to an un säd: Ekj sie daut Licht fa dise Welt. Wäa met mie jeit, jeit nich em diestren, oba woat daut läwenbrinjende Licht haben. #Jes 49,6; 60,20; Mat 5,14-16; Joh 1,5.9 13Doaropp säden de Farisäa to am: Du jefst een Zeichnis von die selfst, un daut jelt dan nich aus Woarheit. 14Jesus säd to an: Waut ekj von mie saj es de Woarheit, soogoa wan ekj daut selfst von mie saj. Wiels ekj weet, von wua ekj kom, un weet uk, wua ekj hango. Oba jie weeten nich, von wua ekj kom, un uk nich, wua ekj hango. #Joh 5,31; 7,28 15Jie rechten no Menschen äa gootdenkjen. Ekj recht kjeenen. #Joh 3,17 16Oba wan ekj rechten doo, es mien Uadeel rajcht, wiels ekj doo daut nich auleen, ekj un de Voda, #8,16 Eenje oole Schreften sajen ekj un dee. dee mie jeschekjt haft, sent beid doabie. 17En jun Jesaz steit uk jeschräwen, wan twee Menschen von waut zeijen, es daut Woarheit. 18Ekj sie eena, dee von sikj selfst zeicht, un de Voda, dee mie jeschekjt haft, zeicht uk fa mie. 19Dan fruagen see am: Wua es dien Voda? Jesus säd: Jie kjanen nich mie, uk nich mienen Voda. Wan jie mie kjanen wudden, wudd jie uk mienen Voda kjanen. #Joh 14,7

20Dise Wieed räd Jesus em Tempel aus hee doa lieed, dicht bie däm Kausten, dee doa fa de Jeltkollakjten wia. Oba kjeena läd de Henj aun am, wiels siene Tiet wia noch nich jekomen. #Joh 7,30

Wua ekj hango, kjenn jie nich hankomen

21Dan säd Jesus wada to an: Ekj go wajch, un jie woaren no mie sieekjen un woaren en june Sinden stoawen. Wua ekj hango, kjenn jie nich hankomen. #(21 un 22) Joh 7,34-35; 13,33 22Doaropp säden de Juden: Well hee sikj selfst doot moaken, wiels hee sajcht: Wua ekj hango, kjenn jie nich hankomen? 23Hee säd to an: Jie staumen vonne Welt hia unjen. Ekj staum von de Welt doa bowen. Jie sent von dise Welt. Ekj sie nich von dise Welt. #Joh 3,31 24Doawäajen säd ekj to junt, daut jie en june Sinden stoawen wudden. Wiels wan jie nich jleewen, daut ekj dee sie, dee ekj väajäw to sennen, woa jie en june Sinden stoawen. #Jes 43,10 25Dan fruagen see am: Wäa best du? Un Jesus säd to an: Krakjt waut ekj junt von Aunfank aun jesajcht hab. 26Ekj hab väl von junt to räden un to rechten. Oba dee, dee mie jeschekjt haft, es woarhauftich, un ekj saj de Welt daut waut ekj von am jehieet hab. 27See veneemen nich, daut hee to an vom Voda räd. 28Jesus säd to an: Wan jie dän Menschensän ieescht woaren doot jemoakt haben, dan woa jie seenen, daut ekj dee sie, un daut ekj nuscht ut mie selfst doo, oba daut ekj dit soo räd, aus de Voda mie jelieet haft. #Joh 3,14; 12,32 29Un dee wäa mie jeschekjt haft, es met mie. De Voda haft mie nich auleen jeloten, un ekj doo emma daut, waut am jefelt.

30Aus hee dit säd, jleewden väle aun am.

De Woarheit woat junt friemoaken

31Jesus säd to de Juden, dee aun am jleewden: Wan jie bie dee Wieed bliewen, waut ekj junt jelieet hab, sent jie woarhauftich miene Jinja. #Joh 15,7 32Dan woa jie weeten waut Woarheit es, un de Woarheit woat junt frie moaken. 33See säden to am: Wie staumen von Abraham häa, un sent niemols aun wäm veskloft jewast. Woo kaust du sajen: Jie sellen frie jemoakt woaren? #Mat 3,9 34Jesus säd to an: Ekj saj junt de Woarheit: Wäa doa sindicht, es aun de Sind veskloft. 35Een Sklow blift nich eewich em Hus. De Sän oba blift eewich. 36Doawäajen, wan de Sän junt frie moakt, sent jie werkjlich frie. #Reema 6,16.18.22

37Ekj weet, daut jie von Abraham aufstaumen. Oba jie vesieekjen mie doot to moaken, wiels miene Wieed bie junt nich Rum haben. 38Ekj räd von daut, waut ekj von mienen Voda jeseenen hab. Jie oba doonen, waut jie von junen Voda jeseenen haben. 39See säden to am: Abraham es ons Voda. Jesus säd to an: Wan jie Abraham siene Kjinja wieren, wudd jie uk Abraham siene Woakjen doonen. 40Oba nu vesieekj jie mie doot to moaken, eenen Maun dee junt de Woarheit jesajcht haft, soo aus ekj dee von Gott jehieet hab. Daut haft Abraham nich jedonen. 41Jie doonen junem Voda siene Woakjen. Dan säden see to am: Wie sent nich Huarenkjinja. Wie haben eenen Voda, un daut es Gott. 42Jesus säd to an: Wan Gott jun Voda wia, wudd jie mie goot sennen, wiels ekj sie von Gott jekomen. Ekj sie nu hia, un ekj sie nich ut mie selfst jekomen. Hee schekjt mie. 43Wuarom vesto jie nich waut ekj saj? Daut es, wiels jie miene Wieed nich vedroagen kjennen! #1Kor 2,14 44Jie staumen von junem Voda, däm beesen Fient, un muchten doonen, waut hee velangt. Hee es von Aunfank aun een Merda jewast un blift nich bie de Woarheit. En am es kjeene Woarheit. Wan hee lieejen deit, rät hee siene Sproak, wiels hee een Lieeja es un de Voda äwa aule Läajes es. #1Mo 3,4.19; 1Joh 3,8-10 45Oba wiels ekj de Woarheit räd, jleew jie mie nich.

46Wäa von junt kaun mie eene Sind nowiesen? Un wan ekj de Woarheit räd, wuarom jleew jie mie dan nich? #2Kor 5,21; Heb 4,15; 1Pet 2,22; 1Joh 3,5 47Wäa von Gott es, hieet uk Gott siene Wieed. Oba jie hieren dee nich, wiels jie nich von Gott sent. #Joh 18,37

Jesus un Abraham

48Dan säden de Juden to am: Saj wie nich met rajcht, daut du een Samarita best un eenen beesen Jeist hast? #Joh 7,20 49Jesus säd: Ekj hab kjeenen beesen Jeist. Ekj iea mienen Voda, oba jie räden schlajcht von mie. 50Ekj sieekj nich miene ieejne Iea. Oba doa es eena, dee dee sieekjt, un hee es uk de Rechta. 51Ekj saj junt de Woarheit: Wäa miene Wieed helt, woat eewich nich dän Doot seenen. #Joh 6,40.47 52Dan säden de Juden to am: Nu see wie, daut du eenen beesen Jeist hast. Abraham un de Profeeten sent jestorwen, un du sajchst: Wäa mien Wuat helt, woat dän Doot niemols schmakjen. 53Best du jrata aus ons Voda Abraham wia? Dee storf. Un de Profeeten sent jestorwen. Waut moakst du ut die selfst? 54Jesus säd: Wan ekj mie selfst iea, es miene Iea nuscht. Oba daut es mien Voda, dee mie ieet, von däm jie sajen, daut hee jun Gott es. #Jes 63,16 55Un jie kjanen am nich. Ekj oba kjan am. Un wan ekj sajen wudd, daut ekj am nich kjan, dan wudd ekj lieejen, soo aus jie. Oba ekj kjan am un hool sien Wuat. #Joh 7,28-29 56Jun Voda Abraham freid sikj doatoo, daut hee mienen Dach seenen sull, un hee sach dän un wia froo. 57Dan säden de Juden to am: Du best noch nich emol 50 Joa oolt, un hast Abraham jeseenen? #8,57 Eenje oole Schreften sajen un Abraham haft die jeseenen? 58Jesus säd to an: Ekj saj junt de Woarheit: Ea Abraham wia, sie ekj. #Joh 1,1-2 59Dan hoowen de Juden Steena opp, no am to schmieten. Jesus oba vestuak sikj un veleet dän Tempel un jinkj wajch. #Joh 10,31

Currently Selected:

Johanes 8: PB

Highlight

Copy