Rechta 10
10
De Rechta Tola un Jair
1No Abimelech sienen Doot kjeem wada een Maun opp, om Israel to raden. Daut wia Tola, Puwa sien Sän, un Dodo sien Grootsän ut däm Staum Isachar. Hee wond en Schamir opp daut Boajlaunt en Efraim. #1Mo 46,13; 4Mo 26,23 2Hee wia 23 Joa Rechta en Israel. Dan storf hee un wort en Schamir begroft.
3No am kjeem Jair ut de Launtschoft Gilead opp un wort fa 22 Joa Rechta en Israel. #4Mo 32,41 4Hee haud 30 Säns, dee opp 30 Äsels reeden un 30 Städa hauden. Dise Städa ligjen en Gilead un heeten bat dän vondoagschen Dach “Jair Darpa”. #5Mo 3,14 5Un Jair storf un wort en Kamon begroft.
Onjehuarsom brinjt de Israeliten en schwoare Noot
6Oba de Israeliten deeden wada, waut däm Harn schlajcht jefoll, un deenden de Baal Jetta un de Astarten, un uk de Jetta von Aram, de Jetta von Sidon, de Jetta von de Moabita un Amonita, un de Jetta von de Filista. Däm Harn oba dreiden see dän Rigjen un deenden am nich. 7Dan brend däm Harn sien Oaja äwa Israel opp, un hee jeef an en de Filista un de Amonita äare Jewault. 8Un 18 Joa worden aule Israeliten, waut aun jantsied Jordan en Gilead, en daut frieejoasche Amorita Launt, wonden, von de Amonita furchtboa unjadrekjt. 9Un de Amonita kjeemen uk äwa dän Jordan un jreepen de Stam Juda, Benjamin un Efraim aun. Soo jerod Israel en eene groote Unjadrekjunk.
10Dan schrieejen de Israeliten nom Harn om Help un säden: Wie haben ons jäajen die vesindicht, wiels wie onsen Gott veloten un de Baal Jetta jedeent haben. #1Sam 12,10 11Oba de Har säd to de Israeliten: Haben junt nich uk de Ägipta, de Amorita, de Amonita, de Filista, 12de Sidonia, de Amalekita un de Maonita unjadrekjt? Oba ekj holp junt ut äare Jewault rut, aus jie no mie om Help schrieejen. 13Un dan hab jie mie doch wada veloten un aundre Jetta jedeent. Doawäajen well ekj junt nich mea raden. 14Got doch to de Jetta schrieen, waut jie junt utjesocht haben! Lot dee junt en june Noot halpen! #5Mo 32,37-38; Jer 2,28 15Oba de Israeliten säden toom Harn: Wie haben jesindicht, doo met ons, soo aus die daut jefelt, oba lot ons nich unjagonen; rad ons doch vondoag! 16Un see schauften de Bilda von de framde Jetta wajch un deenden wada däm Harn. Dan wort am daut to groff, daut de Israeliten soo jeploacht worden. #Jos 24,23; Rech 2,18
Jefta woat de Israeliten äa Leida
17De Amonita vesaumelden sikj toom Kjrich un stalden äa Loaga en Gilead opp; de Israeliten oba vesaumelden sikj bie Mizpa. #Rech 11,29 18Un de väaschte Mana ut de Launtschoft Gilead fruagen sikj besorcht: Wäa es de Maun, dee dän Aunfank moakt, met de Amonita to kjamfen? Wäa daut äwanemt, saul Gowernia äwa aule Enwona en Gilead woaren.
Currently Selected:
Rechta 10: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
