Rechta 9

Abimelech well Kjennich woaren

1Gideon sien Sän Abimelech, jinkj no Sichem no siene Mutta äa Frintschoft un räd met an un met de gaunze Volkjsgrupp von siene Mutta äa Frintschoft un säd: #Rech 8,31 2Froacht doch emol aule Mana von Sichem, waut an leewa es: Sellen aul de 70 Säns von Gideon toop äwa junt rejieren, ooda saul een Maun äwa junt Kjennich sennen? Un denkjt uk doaraun, daut ekj von jun Fleesch un Bloot sie! #Rech 9,18 3Dan stunt daut Frintschoft von siene Mutta fa am en un brocht dise Sach ver aule Birja en Sichem. Un dee leeten sikj fa Abimelech jewennen, wiels see dochten: Hee jehieet to ons, hee es ons Brooda! 4Un see jeewen am 70 Selwastekja ut däm Tempel von äaren Gott, waut dän Nomen Baal Berit druach. Un met dit Jelt deed Abimelech eene Grupp Mana aunnämen, soone waut nuscht to velieren hauden, un uk fa nuscht trigjschrakjten; un dee foljden am. #Rech 8,33 5Met dee kjeem hee no Ofra no sienen Voda sien Hus, un äwafoll siene Breeda, Jerubaal siene Säns, un muak 70 Mana opp eenen Steen doot. Bloos Gideon sien jinjsta Sän Jotam kjeem met däm Läwen doavon, wiels hee sikj vekropen haud. 6Un dan vesaumelden sikj aule Mana von Sichem un aul de Enwona von äaren Schutzplauz, un jinjen ver de Staut un muaken Abimelech toom Kjennich, bie däm Ieekjenboom met daut Denkjmol von Sichem. #1Mo 35,4; Jos 24,26

Jotam sien Jlikjnis

7Aus Jotam daut jesajcht wort, jinkj hee un stald sikj opp de Spetz von däm Boajch Garizim un roopt an met lude Stemm von doa rauf: Horcht no mie, jie Mana von Sichem, wan jie wellen, daut Gott junt uk hieet!

8De Beem jinjen emol han, om sikj eenen Kjennich to saulwen, un säden toom Oliewenboom: Sie Kjennich äwa ons! 9Oba de Oliewenboom auntwuad an: Saul ekj opphieren, goode Eelj to leewren, waut Jetta un Menschen aun mie lowen, un hangonen, om äwa de Beem to stonen un rejieren? 10Dan säden de Beem toom Fiejenboom: Sie du ons Kjennich! 11Oba de Fiejenboom säd to an: Saul ekj opphieren seete Fiejen to droagen un hangonen, om äwa de Beem to schwäwen un rejieren? 12Dan säden see toom Wienstock: Sie du Kjennich äwa ons! 13Oba de Wienstock säd to an: Saul ekj opphieren, Wien to leewren, waut Jetta un Menschen froo moakt, un hangonen, om äwa de Beem to schwäwen? 14Un dan säden de Beem aula to daut Spekjastruck: Komm du un sie Kjennich äwa ons! #2Kjen 14,9 15Un daut Spekjastruck säd to de Beem: Wan jie mie werkjlich toom Kjennich äwa junt saulwen wellen, dan bekjt junt un sieekjt Schutz en mienen Schauten; wan nich, dan woat soon Fia von miene Spekjasch oppkomen, waut soogoa de Zeedabeem vom Libanon vebrent!

16Aus Jotam dise Jeschicht vetalt haud, säd hee wieda: Jleew jie werkjlich, daut daut von junt rajcht wia, Abimelech to junen Kjennich to moaken? Un hab jie aun Jerubaal un siene Famielje rajcht jehaundelt, soo aus hee daut bie junt vedeent haft? 17Mien Voda haft fa junt jekjamft un sien Läwen opp Spell jesat, om junt ut de Midianita äare Jewault to raden. 18Oba jie haben junt vondoag jäajen mienen Voda siene Famielje erhowen un siene Säns dootjemoakt, 70 Mana opp eenen Steen, un haben Abimelech, dän Sän von siene Sklowenfru, toom Kjennich äwa Sichem jemoakt, wiels hee jun Staumbrooda es. 19Wan jie vondoag rajcht un ierlich jehaundelt haben aun Jerubaal un siene Famielje, dan siet jlekjlich met Abimelech, un hee met junt. 20Wan daut oba orrajcht es, dan saul von Abimelech een Fia oppbrennen un aule Mana von Sichem un de Enwona von dän Schutzplauz vebrennen! Un von de Mana von Sichem un de Enwona von dän Schutzplauz saul een Fia oppbrennen, waut Abimelech vebrent! #Rech 9,57 21Un aus Jotam to Enj jerät haud, brocht hee sikj fa sienen Brooda Abimelech wajch un jinkj no Beer un wond dort.

Oneenichkjeit tweschen Abimelech un de Birja von Sichem

22Aus Abimelech dree Joa äwa Israel rejieet haud, 23leet Gott tweschen Abimelech un de Mana von Sichem Fientschoft utbräakjen. Un de Mana von Sichem worden Abimelech ontru, #1Sam 16,14; 18,10; 19,9 24om daut de grausome Mort aun Jerubaal siene 70 Säns opp am trigjkjeem un äa Bloot opp äaren Brooda Abimelech jelajcht wort, dee an omjebrocht haud. Un uk de Birja von Sichem sullen doafäa bestroft woaren, daut see am jeholpen hauden, siene Breeda omtobrinjen. #1Mo 9,6 25Om Abimelech Schoden auntodoonen, läden sikj de Mana von Sichem manke Boaj runt om äare Staut oppe Lua un bestoolen dee aula, waut opp de Gaussen bie an vebiereisden. Un daut wort Abimelech jemalt.

26En dee Tiet kjeem Gaal, Ebed sien Sän, met siene Breeda no Sichem un jewonn daut vetruen von de Birja. 27Un aus see de Wiendruwen jearnt un nieen Wien jemoakt hauden, fieeden see een grootet Freidenfast en däm Tempel von äaren Gott. See eeten un drunken un schempten äwa Abimelech. 28Un Gaal, Ebed sien Sän, säd: Wäa es Abimelech un wäa sent wie, de Birja von Sichem, daut wie am deenen sellen? Es hee nich Jerubaal sien Sän un haft Sebul aus Oppsechta äwa ons enjesat? Deent doch leewa Hamor siene Nokomen, dee dise Staut aunjelajcht haft! Wuarom sell wie Abimelech deenen? #1Mo 34,2 29Wan de Lied von Sichem mie bloos foljden, dan wudd ekj Abimelech vedriewen un am sajen: Vejrata doch dien Häa un go toom Kaumf!

30Aus Sebul, de väaschta von de Staut, de Wieed von Gaal, Ebed sienen Sän, hieed, wort hee wuttich, 31un schekjt jeheem Norecht no Abimelech un leet am sajen: Kjikj emol, Gaal, Ebed sien Sän, un siene Breeda sent no Sichem jekomen un hetten de Staut jäajen die opp! 32Doawäajen komm de Nacht bie diesta met dien Volkj, waut bie die es, un hool die oppe Stapen rom de Staut em Vestäakj opp. 33Un aum Morjen, wan de Sonn oppjeit, doo de Staut äwafaulen. Un wan Gaal met sien Volkj die entjäajen kjemt, kaust du met am aufräakjnen.

34Abimelech muak sikj de Nacht opp met sien Volkj, waut bie am wia, un see vestuaken sikj en vea Aufdeelungen runt om de Staut. 35Un aus Gaal aum Morjen bat ver daut Stautspuat jinkj, kjeem Abimelech met daut Volkj, waut bie am wia, ut äaren Vestäakj äwadäl. 36Aus Gaal daut Volkj sach, säd hee to Sebul: Kjikj, doa kjemt Kjrichsvolkj von de Boaj rauf! Sebul säd to am: Du sitst de Schautes von de Boaj fa Menschen aun. 37Gaal säd: Kjikj, doa kjemt Kjrichsvolkj von däm Ieed Nowel rauf, un eene Grupp kjemt opp dän Wajch bie de Zaubaieekjen vebie. #Hes 38,12 38Dan säd Sebul to am: Wua blift nu dien grootet Mul? Waut doa säd: Wäa es Abimelech, daut wie am deenen sellen? Es daut nich daut Kjrichsvolkj, waut du veacht hast? Go nu han un kjamf met am! 39Gaal jinkj loos ver de Mana von Sichem un kjamft met Abimelech. 40Abimelech dreef am oba trigj, soo daut Gaal flichten must, un väle von siene Mana bleewen opp dän Wajch bat aun daut Stautspuat dootjeschloagen ligjen. 41Un Abimelech jinkj trigj no Aruma un bleef doa. Sebul oba juach Gaal un siene Breeda ut Sichem rut.

Abimelech nemt Sichem en un vestieet de Staut

42Aum näakjsten Dach jinjen de Mana von Sichem wada rut oppe Stapen. Un aus Abimelech daut jemalt wort, 43neem hee daut Kjrichsvolkj, deeld daut en dree Gruppen un läd jieda Grupp em Vestäakj oppe Stapen rom de Staut. Un aus hee de Mana von Sichem ut de Staut komen sach, kjeem hee met siene Mana äwadäl un schluach dee doot. 44Abimelech un de Grupp, waut bie am wia, randen schwind un stalden sikj aum Stautspuat opp. De aundre beid Gruppen kjamften met de Mana von Sichem un schluagen dee aula doot. 45Un dan jreep Abimelech de Staut aun. Hee kjamft dän gaunzen Dach jäajen de Staut. Un aus hee dee enjenomen haud, muak hee aule Enwona doot, waut doa bennen wieren. Hee vestieed de Staut un streid doa Solt nopp.

46Aus de Mana ut däm Schutzplauz von Sichem daut hieeden, daut de Staut enjenomen wia, vekroopen see sikj em Kjala von Baal Berit sienen Tempel. #Rech 8,33 47Un aus Abimelech daut hieed, daut de Mana ut däm Schutzplauz von Sichem sikj dort aula vesaumelt hauden, 48jinkj hee met sien gaunzet Kjrichsvolkj, waut bie am wia, opp dän Boajch Zalmon, un hakt sikj met de Akjs eenen Aust vom Boom un läd sikj däm oppe Schulla. Un hee säd to aul daut Volkj, waut bie am wia: Waut jie jeseenen haben waut ekj deed, daut doot schwind uk soo, aus ekj daut deed. 49Dan hakt daut gaunze Volkj sikj jieda eenen Aust auf, un druagen Abimelech dee hinjaraun no dän Schutzplauz. See flieden de Asta opp de Zista nopp un stekjten dee aun. Soo kjeemen uk aul dee, dee sikj en de Zista bie Sichem vekropen hauden, to dood, ojjefäa 1.000 Mana un Frues.

Abimelech sien Enj

50No dit jinkj Abimelech no Tebez, beloagad daut un neem daut en. 51Doa wia oba een stoakja Schutzplauz medden en de Staut. Un doa flichten aule Enwona, Mana un Frues von de Staut nenn. See veräajelden daut Puat un stieejen opp daut jlikje Dak nopp. 52Dan kjeem Abimelech no dän Schutzplauz un kjamft jäajen däm un nodad sikj daut Puat, om daut auntostekjen. 53Oba eene Fru schmeet Abimelech eenen Molsteen, von eene Hauntmäl, opp sienen Kopp un schluach am dän Koppknoaken entwei. 54Dan roopt Abimelech schwind sienen Schiltdroaga un säd to am: Nemm dien Schwieet un moak mie doot! Daut nich von mie jesajcht woat: Eene Fru haft am omjebrocht! Dan spekjt sien Schiltdroaga am sien Schwieet derch un hee storf. #1Sam 31,4; 2Sam 11,21 55Aus de Israeliten, waut bie am wieren, daut sagen, daut Abimelech doot wia, jinjen see aula trigj no Hus. 56Soo leet Gott daut beese, waut Abimelech sienen Voda met däm Mort aun siene Breeda aunjedonen haud, opp am selfst trigjkomen. #Rech 9,5 57Uk de Mana von Sichem haud Gott de Foljen von äare beese Doten späaren loten. De Fluch jinkj en Erfellunk, waut Gideon sien Sän Jotam, äwa an utjesproaken haud. #Rech 9,20

Currently Selected:

Rechta 9: PB

Highlight

Copy