Jesaja 64
64
1Sie du soo aus wan Fia em Struck nenn fot,
ooda Wota opp een Fia aunfangt to rollen,
soo daut dien Nomen mank de Fiend bekaunt wort,
un de Velkja sikj ver die schudren musten.
2Komm soo aus to de Tieden,
aus wie ons enjsten musten,
un du daut deetst waut wie nich jedocht hauden.
Dan kjeemst du rauf,
un de Boaj schudaden sikj ver die;
3soont haud kjeena ea jeseenen.
Kjeen Ua haft mol jehieet,
un kjeen Uag haft jeseenen,
daut doa een Gott wia buta du,
dee soont deit fa dee, dee sikj no am kjieren. #1Kor 2,9
4Du kjemst dee wellich entjäajen,
waut daut rajchte doonen,
un waut doaräwa bedocht sent,
woo du haben west, daut wie läwen.
Du worscht veläajen aus wie orrajcht deeden;
un wie haben von jee häa soo jeläft.
Kaust du ons noch raden? #2Mo 32,8-10
5Wie sent aula soo aus dee,
dee jesazlich orrein sent.
Dee dee ons sull rajcht bewiesen,
es aus een schwienschet Kodda.
Wie sent aus vedrieejde Bläda,
un onse Sinden fäajen ons tosied
soo aus een Wint.
6Un doch bät kjeena die aun,
kjeena bemieecht sikj, sikj aun die to hoolen;
du hast dien Jesecht von ons wajch jedreit,
un latst ons unja onse Schult veschmachten.
7Oba Har, du best doch ons Voda.
Wie sent daut Leem un du best de Toppstrikja;
wie sent daut, waut du von ons moakst. #Jes 63,16; 45,9; Kloag 4,2; Reema 9,21
8 Har, sie nich gaunz veläajen,
un droag ons onse Sinden nich opp emma no.
Horch doch, wie prachren die,
denkjt doaraun, daut wie aula dien Volkj sent,
9un diene heilje Städa eene Wiltnis jeworden es.
Zion es enne Grunt jebrocht,
un Jerusalem es en Ruinen.
10Ons heiljet un harlichet Hus es vebrent.
De Städ wua onse Vodasch die lowden,
un aul daut, waut wie fa Straums hauden,
es nu vedorwen. #Psa 74,7
11 Har, woascht du die en aul dit
bloos trigjhoolen un stell bliewen,
un ons loten soo schlemm bestroft woaren?
Currently Selected:
Jesaja 64: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
