Jesaja 63
63
Woo Edom daut gonen woat
1Wäa kjemt hia, däm siene Kjleeda soo root jeworden sent?
Dee jeit steil, es stoakj, haft goode Kjleeda
un kjemt von de Staut Bozra en Edom.
“Daut sie ekj, dee wäa jerajcht es en waut hee rät;
ekj hab de Macht, daut ekj raden kaun.” #Jes 34,6
2Wuarom sent diene Kjleeda soo root,
aus wan du hast Wiendruwen utjeklunjt? #Opb 19,13
3“Ekj sie auleen biem Wiendruwen veklunjen jewast;
kjeena von mank de Velkja haft mie doabie jeholpen.
Ekj veklunjd an en mienen Oaja
un vetraumpeld an en Wutt;
un daut sprezt aun miene Kjleeda,
daut dee gaunz root worden. #Joel 4,13; Opb 14,20
4Ekj haud mie eenen Dach väajenomen,
aun däm ekj veräakjnen wull;
daut Joa wia jekomen,
wua miene sullen trigjestalt woaren. #Jes 13,9; 34,8; 61,2
5Ekj kjikjt, un doa wia kjeena toom mie halpen;
mie wundad daut, oba kjeena stunt mie bie.
Un soo holp mien Oarm mie,
un miene Wutt stunt mie bie.
6Ekj hab de Velkja en mienen Oaja vetraumpelt
un jeef dee mea aus jenuach von miene Veläajenheit;
ekj hab äa Läwens Bloot oppe Ieed utranen loten.” #Jes 51,17
De Har haft jeholpen
7Mie es daut groot, woo tru däm Harn siene Leew es,
ekj preis am fa de Wunda waut hee jedonen haft;
ekj low däm Harn fa daut waut hee fa ons jedonen haft,
fa väl goodet, waut hee fa Israel jedonen haft,
en sien grootet Metleet un siene truhoatje Leew.
8Hee säd: See sent doch mien Volkj;
miene Säns woaren doch nich hinjarigjsch sennen.
Un doawäajen rad hee an #5Mo 32,5.20
9en aul äare schwoare Tieden.
Hee schekjt nich een Enjel ooda sest wäm;
hee wia selfst doa un rad an,
wiels hee an goot wia un am daut äwa an jaumad.
Doawäajen koft hee an loos, un hoof an rut
un druach an de gaunze Tiet, aul von ieescht emma. #2Mo 33,14-15
10Oba see wieren jäajenaun,
un haben doamet sienen Heiljen Jeist jestat;
un soo wort hee an fientlich,
un hee kjamft jäajen an.
11Un dan dochten see wada, woo daut emol jewast wia,
un aun däm Harn sienen Kjnajcht Moses.
See fruagen: Wua es dee, wäa de Leidasch
von sien Volkj utem Wota trock;
wua es dee, wäa an sienen Heiljen Jeist jeef? #2Mo 2,5; 4Mo 11,17
12Wäa jinkj met siene stoakje Macht
aun Moses siene rajchte Sied?
Wäa es opp emma doafäa bekaunt,
woo hee daut Mäa ver an deeld #2Mo 14,29
13un an derch dän Boddem leid?
Soo aus Pieed sikj enne Wiltnis nich vestaupen,
14un soo aus Vee, daut sikj en een Tol loagat,
leet däm Harn sienen Jeist an reiwen.
Soo hast du dien Volkj jeleit,
un die eenen harlichen Nomen jemoakt.
Een Jebäd fa Help
15Kjikj emol vom Himmel, un see die daut aun
von dienen heiljen un harlichen Plauz.
Woo kaust du daut vedroagen?
Wua es diene Macht?
Dien Metleet un diene Jnod woaren von mie jehoolen. #5Mo 26,15
16Du best doch ons Voda.
Abraham weet nuscht von ons,
un Israel kjant ons nich.
Oba du, Har, best ons Voda;
von ieescht emma es dien Nomen “Ons Rada” jewast. #5Mo 32,6
17Wuarom latst du, Har, ons von dienen Wajch raufgonen?
Un wuarom latst du ons eendoontich woaren,
daut wie nich mea Forcht fa die haben?
Kjia die wada no ons, wäajen dee, dee die deenen,
wäajen de Stam, dee noch emma diene jewast sent. #Jes 57,17
18Een kortet stoot haben see daut Volkj,
daut die heilich es, enjenomen;
de Fiend haben dien heiljet Hus vetraumpelt. #Psa 79,1
19Un wie sent nu aus een Volkj,
woont du nienich rejieet hast;
un aus wan dien Nomen nienich äwa ons jewast es.
Muchst du doch emol dän Himmel opprieten un rauf komen,
soo daut de Boaj sikj ver die schudaden.
Currently Selected:
Jesaja 63: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
