1. Mose 20

Abraham un Sara bie Abimelech

1Abraham trock von wua hee wond no daut Launt em Sieden Kanaan, un wond tweschen Kadesch un Schur. Hee wond doa eene Tiet en Gerar. #1Mo 12,9; 26,1 2Abraham säd von Sara, siene Fru, daut see siene Sesta wia. Dan schekjt Abimelech, de Kjennich en Gerar un leet Sara no am komen. 3Dan leet Gott sikj Abimelech en eenen Droom enne Nacht seenen un säd to am: Du motst stoawen wiels du dise Fru jenomen hast. See es een Maun siene Fru. 4Abimelech wia nich dicht bie ar jewast un hee säd: Har woascht du een oschuldjet Volkj ombrinjen? 5Säd hee nich selfst to mie, daut dit siene Sesta wia? Un see säd selfst, daut hee äa Brooda wia. Soo wiet aus ekj wist, deed ekj kjeen orrajcht un hab uk noch nich. 6Dan säd Gott en eenen Droom to am: Jo, ekj weet, daut du soo goot deetst aus du kust. Un daut wia ekj, dee die hilt von eene Sind begonen. Doawäajen hab ekj daut nich jeloten, daut du ar aunschieezhd. 7Nu jeff däm Maun siene Fru trigj. De Maun es een Profeet un dee woat fa die bäden un du woascht läwen. Wan du ar oba nich trigj jefst, dan lot die daut jesajcht sennen, daut du un aul dee waut die aunjehieren stoawen woaren. #1Kjen 13,6

8Dan jinkj Abimelech tiedich zemorjes un roopt aul siene Deena. Hee vetald an dise gaunze Erfoarunk, un siene Mana enjsten sikj sea. 9Un Abimelech leet Abraham no am komen un säd to am: Waut hast du ons aunjedonen? Waut hab ekj die orrajcht jedonen, daut du dise groote Schult opp mie un mien Kjennichrikj brinjst? Waut du mie jedonen hast sull nich väakomen. 10Un Abimelech säd to Abraham: Waut meensd du doamet aus du dit deetst? 11Abraham säd: Ekj deed dit wiels ekj docht, hia wia kjeena dee Gott ferchten deed, un daut see mie wudden ombrinjen un miene Fru nämen, wiels ar soo schmock lat. 12Un daut es rajcht daut see miene Sesta es! See es mien Voda siene Dochta, wan uk nich miene Mutta äare Dochta. Un see es miene Fru. #3Mo 18,9 13Un aus Gott mie säd ekj sull mien Voda sien Tus veloten, säd ekj ar: Doo mie dän Jefaulen, daut opp jieda Städ, wua wie hankomen, du dee sajchst, daut ekj dien Brooda sie.

14Dan neem Abimelech Schop un Rinda, un Deena, beides Maunsmenschen un Frumenschen, un jeef Abraham dee un jeef am uk siene Fru Sara. 15Un Abimelech säd: Kjikj emol. Mien Launt steit ver die. Du kaust krakjt doa wonen wua du west. 16Un to Sara säd hee: Horch emol. Ekj hab dienen Brooda 1.000 Selwastekja jejäft. Dit es Bewies, daut du nuscht orrajchtet jedonen hast. Kjeena doaf die met irjent waut beschuljen. 17Dan bäd Abraham Gott aun, un Gott heeld Abimelech un siene Fru un siene Deenstfrues, daut dee kunnen Kjinja haben. 18De Har haud daut soo jemoakt daut kjeene Fru en Abimelech siene Zelten kunn een Kjint haben, wiels Abimelech Abraham siene Fru Sara jenomen haud.

Currently Selected:

1. Mose 20: PB

Highlight

Copy