1. Mose 19

Loot un siene Jast

1Bie Owent kjeemen de twee Enjel no Sodom. Loot saut biem Stautspuat aus hee an komen sach, un hee stunt fuaz opp un jinkj an entjäajen. Hee kjneed sikj bat oppe Ieed ver an #1Mo 18,22 2un säd: Miene Haren, komt bitscheen no mien Hus. Ekj woa junt bedeenen. Komt wauscht june Feet un blieft to Nacht. Morjen kjenn jie tiedich oppstonen un opp junen Wajch sennen. Oba dee säden: Nä, wie wellen sest wua enne Staut to Nacht bliewen. 3Dan kroagd hee an noch dolla un see kjeemen no sien Hus. Doa muak hee eene Moltiet un bakt waut Schnetje fa an un see eeten.

4Dan oba ea see sikj to Nacht dol läden, kjeemen de Mana von Sodom, junge un oole aula, un stalden sikj rom daut Hus rom. 5See roopten Loot un säden: Wua sent de Mana dee vondoag zeowes no die kjeemen. Brinj dee emol äwadäl daut wie met dee ligjen kjennen. #(5-8) 3Mo 18,22-25; Rech 19,22-24; Reema 1,27 6Loot jinkj dan rut no an, un muak de Däa hinja sikj too 7un säd: Ekj pracha junt, Breeda, doot nich soon beeset. 8Weet jie, ekj hab twee Dajchta dee noch kjeen Maun jehaut haben. Lot mie dee rut brinjen un doot met dee waut jie wellen. Oba doot dise Mana nuscht aun dee to Nacht no mie jekomen sent. 9Oba see säden: Ut däm Stich! Aus een framda kjemst du mank ons, un nu west ons Rechta sennen! Dit woat die schlemma gonen aus jane. Un see drenjden sikj aun am naun un wullen siene Däa tweibräakjen. #2Pet 2,7-8 10Oba de Mana waut bennen wieren langden no am un trocken am em Hus nenn un muaken de Däa too. 11See muaken de Mana rom daut Hus blint, de junge en de oole, soo daut see sikj meed muaken met de Däa sieekjen. #2Kjen 6,18

12Aus see dan bennen wieren säden de Mana to Loot: Hab jie hia noch sest wäm, soo aus Schwieesäns, Säns, Dajchta, ooda sest noch wäm en dise Staut? Brinjt dee ut de Staut rut! 13Wie sent reed dise Städ to venichten. Doa es een schwoaret kloagen jäajen de Menschen en dise Staut no däm Harn jekomen, un hee haft ons jeschekjt dee to venichten. #1Mo 18,20 14Dan jinkj Loot rut no siene Schwieesäns, de Mana dee sikj met siene Dajchta befrieen wullen. Hee säd to an: Nu opp un velot dise Städ, wiels de Har es gaunz reed dise Staut to venichten. Oba de Schwieesäns dochten hee spost met an. #4Mo 16,21

15Aus daut dän näakjsten Dach aunfunk to doagen, porden de Enjel Loot un säden: Nu opp. Nemm diene Fru un twee Dajchta, dee hia sent, daut jie nich omkomen wan dise Staut bestroft woat. 16Aus hee oba noch een bät schluad, neemen de Mana am, un siene Fru, un siene twee Dajchta bie de Haunt, un see brochten an met heele Hut bat buta de Staut. See deeden dit wiels de Har an jenstich wia.

17Un aus see dee bat buta de Staut jebrocht hauden, säden see: Nu rant, daut jie jun Läwen raden. Kjikjt nich emol trigj, un hoolt junt noanich opp em Tol. Rant enne Boaj nenn, daut jie nich uk venicht woaren. #Mat 24,16 18Loot oba säd: Oba nä miene Haren! 19Jun Deena es jenstich aunjeseenen, un jie sent sea goot to mie jewast, daut jie mien Läwen raden, oba ekj kaun nich enne Boaj nenn ranen. Daut Onheil kunn doa äwa mie komen, daut ekj doa storf. 20Seet emol dort, de Staut es dicht bie jenuach, daut ekj doa kunn han ranen, un daut es eene kjliene Staut. Lot mie doahan ranen mien Läwen to raden. Daut es doch eene nate Staut. 21Un dee säd: Jo, ekj kom die uk doamet entjäajen, un vespräakj daut ekj de Staut, von woone du rätst, nich venichten woa. 22Spood die! Ran doahan! Ekj kaun nuscht doonen bat du doa aunkjemst. Nu heet de Staut Zoar.

23De Sonn wia oppjegonen aus Loot bat Zoar kjeem. 24Dan leet de Har Schwäwelblitt un Fia opp Sodom un Gomorra faulen vom Harn em Himmel, #5Mo 29,22; Psa 11,6; Jes 1,9-10; 13,19; Amos 4,11; Luk 17,29; 2Pet 2,6; Opb 14,10 25un hee venicht de Städa un daut gaunze Tol, un hee venicht aule Menschen doa un uk aules waut doa sest woss. 26Loot siene Fru, oba, dee hinja am kjeem kjikjt trigj un see wort een Soltsteen. #Luk 17,32

27Abraham jinkj tiedich zemorjes no dee Städ, wua hee met däm Harn jestonen haud. 28Un hee kjikjt rauf no Sodom un Gomorra opptoo un no daut gaunze Tol. Un denkj die nenn, aus hee doa kjikjt, sach hee een Ruak von daut Launt loos häwen. Daut leet soo aus een Ruak von eenen grooten Owen. 29Un soo wia daut, daut aus Gott de Städa em Tol venichten deed, vegaut hee daut nich no waut Abraham jefroacht haud. Hee rad Loot von medden em vedoawen, aus de Städa, en woone hee wond, venicht worden.

30Un Loot un siene twee Dajchta trocken von Zoar wajch, un wonden doa enne Boaj, wiels see Angst hauden en Zoar to wonen. Un Loot wond met siene twee Dajchta en eene Heel. 31De elre Dochta säd to äare Sesta: Ons Voda es oolt, un doa es kjeen Maun oppe Ieed, dee no ons kjemt ons to frieen. 32Well wie onsen Voda emol Wien jäwen un ons met am dol lajen, soo daut wie fa am kjennen Nokomen haben. #3Mo 18,7 33Dän Owent jeewen see am Wien, un de elre Dochta läd sikj met am dol. De Voda wist nich daut see jekomen wia un nich daut see wieda jegonen wia. 34Dän näakjsten Dach säd de elre to de jinjre: Horch emol! Ekj lach latste Nacht met mien Voda. Well wie am vondoag wada Wien jäwen un dan jeist du met am ligjen, daut wie soo fa onsen Voda Nokomen kjrieen. 35Un soo muaken see äaren Voda dee Nacht uk Wien drinkjen. Un de jinjre Dochta jinkj un lach met am. Hee selfst wort daut nich en aus see sikj dol läd ooda aus see oppstunt.

36Soo kjeem daut, daut beid von siene Dajchta schwanga wieren von äaren Voda. 37De elre haud eenen Sän un see nand am Moab. Dee vondoagsche Moabita haben am aus äaren Staumvoda. #5Mo 2,9 38De jinjre haud uk eenen Sän un see nand am Ben Ami. Dee vondoagsche Amonita haben am aus äaren Staumvoda. #5Mo 2,19; 23,4

Currently Selected:

1. Mose 19: PB

Highlight

Copy