2. Mose 9

De fefte Ploag

1Noch eemol säd de Har to Moses: Go nom Kjennich un saj am: De Har, de Hebräa äa Gott, sajcht soo to die: Lot mien Volkj gonen, daut see mie aunbäden kjennen. #2Mo 5,1 2Wan du an nich woascht gonen loten, un an noch lenja fausthelst, #Jes 1,20 3dan lot die daut jesajcht sennen: De Har woat eene sea schwoare Krankheit opp daut Vee komen loten, waut opp diene Stapen es. De Krankheit woat opp Pieed un Äsels un Kameelen un Kjieej un Schop komen. #2Mo 3,20 4Oba de Har woat een Unjascheet moaken tweschen de Israeliten äa Vee un de Ägipta äat. Doa woat mank de Israeliten äa Vee nich eent doot gonen. #2Mo 8,18 5De Har sad eene Tiet un säd: Morjen woat de Har dit em Launt doonen. 6Un dän näakjsten Dach wort daut uk aul. Aul de Ägipta äa Vee storf, oba von de Israeliten äa Vee wia nich eent doot. 7Un de Kjennich schekjt Mana notoseenen, un see fungen nich een doodjet Tia mank de Israeliten äa Vee. Oba de Kjennich stald sikj hoat jäajen an un leet daut Volkj nich gonen. #2Mo 4,21

De saste Ploag

8Noch een aundatmol säd de Har to Moses un Aaron: Nämt june Henj voll Room von eenen Owen. Moses saul daut ver däm Kjennich enne Loft schmieten. 9Un de Room woat äwa gaunz Ägipten vesteewen, un Menschen un Tieren en daut gaunze Launt woaren Schlemsen kjrieen un met Schwäaren utbräakjen. #5Mo 28,27 10See neemen Room von eenen Owen met, un aus see ver däm Kjennich stunden, schmeet Moses daut enne Loft. Un de Room jeef de Menschen Schwäaren, daut see opne Schlemsen kjrieejen, beides de Menschen un uk daut Vee. #Opb 16,2 11De Hakjsenmeistasch kunnen nich ver Moses komen, wiels see uk aula de Schwäaren hauden, soo aus aule Ägipta. 12Un de Har muak däm Kjennich, daut hee hoat jäajen an enjestalt wia, un hee leet an nich gonen, krakjt soo aus de Har to Moses jesajcht haud. #2Mo 4,21

De säwende Ploag

13Un nochmol säd de Har to Moses: Go morjen tiedich zemorjes, soo daut du däm Kjennich trafen woascht, un saj am: De Har, de Hebräa äa Gott, sajcht: Lot mien Volkj gonen, daut see mie aunbäden kjennen. #2Mo 5,1 14Wiels dit mol woa ekj soo groff opp die un diene Rejierungs Mana un dien Volkj rauf komen, daut junt daut endrinjen woat, daut doa kjeena oppe gaunze Ieed met mie to vejlikjen es. #2Mo 8,6 15Ekj haud junt aul kunt met eene Krankheit schlonen, daut jie doavon storwen, soo daut du un dien Volkj gaunz veschwinjen wudden von de Ieed, 16oba ekj hab die noch läwen jeloten, daut du met miene Macht räakjnen lieescht, soo daut mien Nomen oppe gaunze Ieed woat bekaunt woaren. #2Mo 14,4; Reema 9,17 17Du satst die noch eegol jäajen mien Volkj, un latst dee nich gonen. 18Nu kjikj! Morjen om dise Tiet, woa ekj een sea hunjschen Hoagel schekjen, soo aus daut noch niemols en Ägipten jehoagelt haft to irjent eene Tiet. 19Schekj fuaz eene Norecht no dien Vee un aules waut du oppe Stap hast, daut see daut unja Dak brinjen. Aule Menschen un aulet Vee, waut du nich kaust unja Dak brinjen, woaren von däm Hoagel jetroffen woaren, un dee woaren omkomen. 20Däm Kjennich siene Mana, dee Forcht fa däm Harn sien Wuat hauden, spooden sikj äare Oabeida un Häaden unja Dak to brinjen. 21Dee oba, dee däm Harn sien Wuat nich to Hoat neemen, leeten äare Deena un Häaden oppe Stap.

22Dan säd de Har to Moses: Strakj diene Haunt nom Himmel opptoo, soo daut de Hoagel äwa gaunz Ägipten komen woat, opp Menschen un Tieren un opp aules, waut oppe Stapen en Ägipten waust. 23Un Moses strakjt met sienen Stock enne Hecht, un de Har leet daut rumlen un hoaglen en Ägipten. De Blitz strold bat oppe Ieed, aus de Har dän Hoagel opp Ägipten schekjt. 24De Hoagel foll, un de Blitz dacht mank däm sea dichten Hoagel opp. Kjeena kunn sikj soont von verhäa denkjen, von soo lang aus doa Menschen en Ägipten wonden. 25Derch daut gaunze Launt veschluach de Hoagel aules, waut oppe Stap wia, Menschen un Tieren, un veschluach aules, waut doa jewossen wia von de kjlanste Plaunten bat groote Beem. 26De Schoden wia aulawäajen, buta en Goschen wua de Israeliten wonden. Doa hoageld daut nich. #2Mo 8,18; 9,4

27Dan schekjt de Kjennich no Moses un Aaron un leet an sajen: Ekj hab ditmol jesindicht. De Har haft rajcht! Un ekj un mien Volkj haben ons veschulcht. 28Bät däm Harn aun. Wie haben jenuach Hoagel un Blitz jehaut. Nu woa ekj junt gonen loten. Jie brucken nich lenja bliewen. #2Mo 8,4 29Un Moses säd am: Wan ekj bat buta de Staut jegonen sie, woa ekj miene Henj opphäwen no däm Harn opptoo, un am aunbäden. Daut Jewitta woat opphieren un daut woat nich mea hoaglen. Dan saust du weeten, daut de Ieed däm Harn jehieet. #2Mo 7,5 30Doch weet ekj daut du un diene Rejierungs Mana däm Harn Gott noch nich ferchten. 31Dit wia dee Tiet em Joa aus de Joascht aul jeschost haud, un de Flaus jrod jeblieecht haud, un dee wieren aulebeid gaunz vedorwen. 32Oba de Weit un daut Spelz wia nuscht jeworden, wiels dee lota sent. 33Moses veleet däm Kjennich un jinkj bat buta de Staut. Doa spreed hee siene Henj ut nom Harn, un daut Jewitta un de Hoagel hieeden opp un de Räajen goot nich lenja. 34Aus de Kjennich sach, daut de Räajen un Hoagel opphieeden, sindijd hee noch wada, un hee un siene Rejierungs Mana stalden sikj hoat jäajen däm Harn. 35De Kjennich stald sikj soo hoat jäajen an daut hee de Israeliten nich gonen leet. Daut wort aula soo aus de Har en sien Wuat to Moses jesajcht haud. #2Mo 4,21

Currently Selected:

2. Mose 9: PB

Highlight

Copy