2. Mose 10

De achte Ploag

1Un nochmol säd de Har to Moses: Go no däm Kjennich. Ekj hab am un siene Rejierungs Mana soo hoat jäajenaun jemoakt, daut ekj werkjlich mank an kaun aul dise miene Tieekjens uteewen. 2Dan woa jie june Kjinja un Grootkjinja daut sajen kjennen, woo ekj de Ägipta han un häa tekjt, un an miene Macht wees, soo daut jie secha weeten kunnen, daut ekj de Har sie. #2Mo 6,2-8 3Un Moses un Aaron jinjen nom Kjennich un säden: De Har, de Hebräa äa Gott, sajcht soo to die: Woo lang woascht du die nich deemootjen ver mie? Lot mien Volkj gonen, daut see mie aunbäden kjennen? #2Mo 5,3 4Wan du mien Volkj nich gonen latst, dan paus opp. Morjen schekj ekj Graushoppa en dien Launt, 5soo daut de Ieed woat soo bedakjt sennen, daut dee noanich to seenen woat sennen. Daut waut nom Hoagel noch oppe Stap un aun de Beem äwajebläwen es, woaren see aules oppfräten. 6Dien Hus woat voll von dee sennen, un uk diene Rejierungs Mana äare Hiesa, un aulawäajen wua june Menschen wonen. Kjeene von june Vodasch un Staumvodasch haben jeemols soont jeseenen, von dee Tiet aus see no dit Launt kjeemen, bat opp däm vondoagschen Dach. Dan dreid Moses sikj wajch von däm Kjennich un jinkj wieda.

7Dan kjeemen däm Kjennich siene Rejierungs Mana no am un säden: Woo lang woat disa ons enne Kjlam hoolen? Lot an gonen däm Harn, äaren Gott, aunbäden. Sitst du daut noch nich, daut ons Launt vedorwen es? 8Dan leet de Kjennich wada Moses un Aaron ver sikj komen un säd an: Got un bät däm Harn, junen Gott aun. Oba wäa jeit aula met? 9Von junk bat oolt go wie, säd Moses. Wie gonen met onse Junges un Mejales, met onse Schop un ons Vee. Soo hab wie daut, wan wie däm Harn een Fast moaken. #2Mo 5,1 10Daut sull jie jrod! säd de Kjennich, Ekj wudd junt nienich aula tojlikj gonen loten! Jie haben secha sest waut em Senn! 11Nä bitscheen, bloos de Mana derwen gonen däm Harn aunbäden. Daut es je, no waut jie bat nu jeiewat haben. Un doamet musten see vom Kjennich wajch.

12Dan säd de Har to Moses: Strakj diene Haunt äwa daut Launt, daut de Graushoppa opp gaunz Ägipten komen, un aul daut Jreens oppfräten, waut de Hoagel jeloten haft. #2Mo 9,32 13Un Moses strakjt sienen Stock äwa daut ägiptische Launt, un de Har muak een Oostwint äwa daut Launt komen, dän gaunzen Dach un de gaunze Nacht. Aus daut Morjen wort, brocht de Wint de Graushoppa. #Joel 1,2-12; 2,1-11 14Doa wieren aulawäajen Graushoppa en Ägipten. Daut wia dicht voll bat opp aule Jrensen. Noch niemols wieren doa soo väl Graushoppa jewast, un doa woaren uk nienich wada sennen. 15Dee bedakjten daut Launt, daut et aunfunk diesta to woaren, un dee eeten aul daut Jreens un aul de Frucht aun de Beem, aules waut de Hoagel jeloten haud. En gaunz Ägipten wia kjeen Jreens aun de Beem, ooda aun daut, waut oppe Stap woss, jebläwen. 16De Kjennich leet schwind Moses un Aaron komen un säd: Ekj hab jesindicht ver däm Harn, junen Gott, un ver junt. #2Mo 9,27 17Ekj pracha junt nu, daut jie mie noch dit eene mol vejäwen wudden. Bät däm Harn, junen Gott, daut hee mucht dise Ploag, un äaren Doot von ons nämen. #2Mo 8,4 18Moses jinkj wajch vom Kjennich un bäd däm Harn aun. 19Un de Har leet dän Wint dreien, daut dee stoakj vom Wasten blosd. Un dee neem aule Graushoppa, un druach dee em Schelpmäa nenn. Doa bleef nich een Graushoppa en Ägipten. 20Un de Har muak däm Kjennich hoat enjestalt, un hee leet de Israeliten nich gonen. #2Mo 4,21

De näajende Ploag

21Un de Har räd noch wada to Moses: Strakj diene Haunt enne Hecht nom Himmel, soo daut et woat diesta woaren en Ägipten, soon diestret, waut doa to feelen es. 22Un Moses strakjt siene Haunt nom Himmel, un daut gaunze Launt wort stock diesta, fa dree Doag. 23Eena kunn dän näakjsten nich seenen, un kjeena veleet siene Städ fa dree Doag. Oba aulawäajen wua de Israeliten wonden, doa wia daut dach. 24Dan roopt de Kjennich Moses un säd: Got un bät däm Harn aun! Bloos june Schop un jun Vee lot hia, oba de Kjinja lot metgonen. #2Mo 10,10 25Oba Moses säd: Du motst ons loten onse Schop un ons Vee metnämen, daut wie däm Harn onsen Gott kjennen de Opfa un daut Brauntopfa brinjen. 26Ons Vee mott aula met daut Volkj metgonen. Nich een Hooft saul trigj bliewen. Wie motten dee metnämen, fa daut Opfa fa däm Harn onsen Gott, wiels ea wie gonen, weet wie nich, waut wie fa daut Opfa brucken woaren. 27Oba de Har muak däm Kjennich hoat enjestalt, un hee leet an nich gonen. #2Mo 4,21 28De Kjennich säd to am: Go hia wajch! Lot mie die nich wada seenen. Dän Dach wan ekj die wada ver mie see, woascht du stoawen. 29Doatoo säd Moses: Lot daut sennen soo aus du jesajcht hast! Du woascht mie niemols wada seenen.

Currently Selected:

2. Mose 10: PB

Highlight

Copy