2. Mose 8

1Dan säd de Har to Moses: Saj Aaron: Strakj diene Haunt met dän Stock äwa de Riefasch un Kanols un Wotalajcha, un doa woaren en Ägipten Poggen opp daut Launt komen. 2Dan strakjt Aaron siene Haunt äwa de ägiptische Wota, un doa kjeemen Poggen opp, daut dee de Ieed bedakjten. 3Dan deeden de ägiptische Hakjsenmeistasch krakjt daut selwje met äare Hakjsenkonst. Dee brochten uk Poggen opp daut Launt nopp. #2Mo 7,11

4De Kjennich schekjt no Moses un Aaron un säd to an: Bät däm Harn, daut hee saul de Poggen wajchnämen von mie un mien Volkj. Dan woa ekj jun Volkj gonen loten, daut jie kjennen daut Opfa fa däm Harn moaken. #2Mo 8,24; 9,28; 10,17 5Moses säd to däm Kjennich: Bitscheen, saj to wanea ekj fa die un diene Rejierungs Mana un dien Volkj doafäa bäden saul, daut de Poggen von die un diene Hiesa wajch jenomen sellen, buta dee em Niel? 6Morjen, säd hee. Daut saul krakjt soo sennen aus du jesajcht hast, säd Moses, soo daut du weeten woascht, daut doa kjeena es, soo aus de Har ons Gott. #2Mo 9,14; 15,11; 5Mo 33,26; 2Sam 7,22; Jer 10,6 7De Poggen woaren von die un diene Hiesa veschwinjen un uk von ver diene Rejierungs Mana un dien Volkj. Bloos em Niel woaren Poggen bliewen. 8Dan jinjen Moses un Aaron vom Kjennich wajch. Un Moses roopt däm Harn aun wäajen de Ploag von Poggen, soo aus hee met däm Kjennich berät haud. 9Un de Har hieed Moses sien Jebäd, un de Poggen storwen enne Hiesa, enne Darpa un oppe Flekja. 10Dee worden eefach en Hupes toop jehiept, un daut Launt stunk doavon. 11Aus de Kjennich sach daut de Ploag noleet, stald hee sikj hoat jäajen an, un hee horcht nich no an, krakjt soo aus de Har jesajcht haud. #2Mo 4,21

De dredde Ploag

12De Har säd to Moses: Saj Aaron: Nemm dienen Stock un schlo de Ieed doamet. Un de Ieed woat äwa gaunz Ägipten Stäakjflieechkjes väabrinjen. 13Un soo deeden see daut. Aaron neem sien Stock un schluach doamet oppe Ieed. Un de Stoff oppe Ieed en daut gaunze Launt brocht Stäakjflieechkjes äwadäl. De Stäakjflieechkjes kjeemen aulawäajen oppe Menschen un opp daut Vee. Aul daut Stoff oppe Ieed wort to Stäakjflieechkjes. 14Doa wieren Stäakjflieechkjes oppe Menschen un opp daut Vee. Aus de Hakjsenmeistasch dit uk proowden to doonen, kunnen see daut nich, #2Mo 7,11 15un see säden to däm Kjennich: Dit es Gott sien Finja. Oba de Kjennich vehilt sikj hoat jäajen an un horcht nich, jrod soo aus de Har daut jesajcht haud. #Psa 64,10; 72,18; Luk 11,20

De vieede Ploag

16De Har säd to Moses: Go morjen tiedich ver däm Kjennich, wua hee woat nom Wota gonen, un saj am: De Har sajcht soo to die: Du saust mien Volkj gonen loten, daut see mie aunbäden kjennen. #2Mo 5,1 17Wan du an nich gonen latst, dan paus opp. Dan woa ekj Ojjezeffa komen loten opp die un diene Rejierungs Mana, dien Volkj un june Jebieda. De Hiesa en Ägipten woaren krakjt soo voll von Ojjezeffa sennen aus de Ieed, opp woone dee stonen. 18Aun dän Dach woa ekj en de Jäajent von Goschen eene Lienje trakjen, wiels mien Volkj doa es. Doa woat kjeen Ojjezeffa doa sennen, soo daut du seenen woascht, daut ekj de Har em Launt sie un medden mank. #2Mo 7,5 19Dien Volkj woat vom Ojjezeffa jeploacht sennen, un mien Volkj woat doavon frie bliewen. Morjen woat dit Tieekjen komen. 20Dän näakjsten Morjen leet de Har sea väl Ojjezeffa komen, bat see en däm Kjennich sien Hus un siene Rejierungs Mana äare Woninjen nenn drungen. Daut gaunze Launt wia von daut Ojjezeffa vedorwen.

21Dan leet de Kjennich Moses un Aaron komen un säd an: Moakt daut Opfa fa junen Gott hia em Launt. 22Oba Moses säd: Daut wudd nich schaufen. De Opfa, dee wie fa däm Harn onsen Gott moaken, wudden fa de Ägipta een Jelasta sennen. Wan wie een Opfa brinjen, daut fa de Ägipta een Jelasta es, wudden see ons bestemt steenjen. #1Mo 43,32; 46,34 23Wie motten eene dree doagsche Reis enne Wiltnis moaken, om ver däm Harn onsen Gott to opfren, soo aus hee daut velangt. #2Mo 3,18 24Un de Kjennich säd: Ekj woa junt nu gonen loten, daut jie däm Harn junen Gott kjennen enne Wiltnis Opfa brinjen. Oba got nich too wiet un bät fa mie. #2Mo 8,4 25Moses säd: Soo schwind aus ekj von hia go, woa ekj däm Harn aunbäden, daut hee die un diene Rejierungs Mana un dien Volkj saul Morjen von daut Ojjezeffa frie moaken. Oba sie nich wada hinjarigjsch, daut du daut Volkj nohäa nich rut latst, toom däm Harn daut Opfa moaken. 26Un Moses jinkj wajch von däm Kjennich, un roopt däm Harn aun. #2Mo 8,8 27Un de Har deed krakjt soo aus Moses bäd, un neem daut Ojjezeffa wajch vom Kjennich, siene Rejierungs Mana un sien Volkj. Un doa wia nich eene eensje Flieej jebläwen. 28Doch de Kjennich vehilt sikj ditmol noch wada hoat jäajen an un leet daut Volkj nich gonen. #2Mo 4,21

Currently Selected:

2. Mose 8: PB

Highlight

Copy