2. Mose 7
7
Gott wiest siene Krauft
1Doatoo säd de Har: Kjikj emol! Ekj woa daut soo rombrinjen, daut du woascht aus een Gott fa däm Kjennich sennen, un Aaron, dee fa die räden woat, woat dien Profeet sennen. #2Mo 4,16 2Du saust aules sajen, waut ekj die oppjäwen woa, un Aaron dien Brooda saul to däm Kjennich sajen, daut hee saul de Israeliten ut sien Launt rutloten. 3Doch ekj woa däm Kjennich hoat jäajen junt moaken, daut ekj mea un mea Tieekjens un Wunda en Ägipten woa uteewen kjennen. #2Mo 4,21 4Un wan de Kjennich dan noch nich horchen woat, dan woat hee miene Haunt to feelen kjrieen. Dan woa ekj aul de Stam von mien Volkj, de Israeliten, väabrinjen un derch een schwoaret Jerecht äwa Ägipten, de Israeliten ut Ägipten rut leiden. 5De Ägipta woaren dan weeten, daut ekj de Har sie, wan ekj miene Haunt opp an lajen woa, un de Israeliten von mank an rut leiden woa. #2Mo 7,17; 8,18; 9,29; 1Sam 17,46; 1Kjen 20,28; 2Kjen 19,19; Hes 29,6 6Moses un Aaron deeden daut, soo aus de Har daut von an velangd. 7Moses wia 80 Joa un Aaron 83, aus see met däm Kjennich räden.
8De Har säd to Moses un Aaron: 9Wan de Kjennich junt sajcht: Wiest jun Wundawoakj, dan saj to Aaron: Nemm dien Stock, un schmiet däm ver däm Kjennich han. Dan woat dee, eene Schlang sennen. #2Mo 4,3 10Dan jinjen Moses un Aaron no däm Kjennich, un deeden aules, soo aus de Har an daut oppjejäft haud. Aaron schmeet sien Stock oppe Ieed ver däm Kjennich un siene Rejierungs Mana, un dan wia daut eene Schlang. 11Doaropp roopt de Kjennich siene kluake Rotjäwa un Hakjsenmeistasch. Un de ägiptische Hakjsenmeistasch deeden krakjt soone Tieekjens met äare Hakjsenkonst. #2Mo 7,22; 8,3; 1Mo 41,8; 2Tim 3,8 12Een jiedra schmeet sienen Stock han, un daut wia eene Schlang. Oba Aaron sien Stock freet aul de aundre äare opp. 13Doch wia de Kjennich hoat jäajen an enjestalt un hee leet an nich gonen, krakjt soo aus de Har jesajcht haud. #2Mo 4,21
De ieeschte Ploag
14De Har säd to Moses: De Kjennich haft sikj hoat jäajen junt enjestalt un lat daut Volkj nich gonen. 15Go zemorjes nom Kjennich, wan hee nom Niel Riefa jeit, un nemm dienen Stock met, dee to eene Schlang wort, 16un saj to am: De Har, de Hebräa äa Gott, haft mie jeschekjt, daut ekj die sajen saul: Lot mien Volkj gonen, daut dee mie enne Wiltnis aunbäden kjennen. Bat nu hast du doa nich no jehorcht. #2Mo 5,1 17Soo sajcht de Har: Nu saust du daut enwoaren, daut ekj de Har sie. Met disen Stock dän ekj en miene Haunt hab, woa ekj daut Wota em Niel schlonen, un daut woat Bloot woaren. #2Mo 4,9 18De Fesch em Niel woaren doot gonen, un daut Wota woat soo sea stinkjen, daut de Ägipta daut nich woaren drinkjen kjennen.
19Un de Har säd to Moses: Saj Aaron, hee saul dän Stock en siene Haunt utstrakjen äwa aul daut ägiptische Wota, äwa däm Riefa, un de Kanols, äwa de Wotalajcha un Puddels, un daut Wota woat Bloot woaren. Aul daut Wota en daut gaunze Launt woat Bloot woaren, soogoa daut Wota enne heltane Tonnen un enne Steenjefässa. #Opb 11,6 20Un Moses un Aaron deeden krakjt soo aus de Har an jesajcht haud. Aaron hoof dän Stock opp un schluach daut Wota em Niel doa ver däm Kjennich un siene Rejierungs Mana. Un aul daut Wota em Riefa wort Bloot. 21Dan jinjen de Fesch en däm Niel doot, un dee funk aun to stinkjen, daut see daut goanich drinkjen kunnen. Aul daut Wota em Launt wia Bloot. 22Doch de ägiptische Hakjsenmeistasch deeden krakjt soont met äare Hakjsarie. De Kjennich stald sikj bloos hoat jäajen an un horcht nich no Moses un Aaron, jrod soo aus de Har jesajcht haud. #2Mo 7,11 23De Kjennich dreid sikj wajch un jinkj en sien Hus nenn, un leet sikj daut goanich wichtich woaren. 24Un aule Ägipta growden no Drinkjeswota dicht biem Niel, wäajen daut Riefawota nich to brucken wia. 25Säwen Doag vejinjen no däm, daut de Har daut Wota jeschloagen haud.
De tweede Ploag
26De Har säd to Moses: Go no däm Kjennich un saj am: De Har sajcht soo to die: Lot mien Volkj gonen, daut see mie aunbäden kjennen. #2Mo 5,1 27Un wan du an nich loten woascht, dan paus opp, ekj woa dien gaunzet Launt met Poggen ploagen. 28De Niel woat met Poggen schwoarmen, un dee woaren oppkomen un en dien Paulaust un en diene Schlopstow un en dien Bad nenn komen, un dee woaren en diene Rejierungs Mana äare Hiesa, opp diene Menschen un bat enne Owes un Bak Kommen komen. 29De Poggen woaren opp die komen, opp diene Menschen un aul diene Rejierungs Mana.
Currently Selected:
2. Mose 7: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
