Mga Salmo 73
73
IKATULONG BASAHON
(Salmo 73–89)
Ang Hustisya sa Dios#ANG ULOHAN SA HEBREO: Salmo ni Asaph.
1Ang Dios maayo gayod sa Israel,
kanila nga putli ug kasingkasing!
2Apan ako hapit na kawad-i sa pagsalig;
hapit na gayod mawala ang akong pagtuo
3kay nasina man ako sa mga mapahitas-on,
sa pagkakita nako nga ang mga daotan nadato.
4Wala sila mag-antos sa kasakitan;
lig-on ug maayo silag lawas.#73:4 Dili klaro sa Hebreo.
5Wala sila mag-antos sama sa nahitabo sa ubang tawo;
wala silay kalisdanan sama sa nahiagoman sa uban.
6Ug busa gisul-ob nila ang garbo sama sa kuwintas
ug ang kabangis sama sa bisti.
7Ang ilang kasingkasing napuno sa kadaotan#73:7 Ang ilang…kadaotan: Sa Hebreo, Nagbudlat ang ilang mata sa katambok.
ug nag-awas ang ilang hunahuna sa daotang mga laraw.
8Nagbugalbugal sila sa uban ug nagsultig daotan;
mapagarbohon silang nanghulga nga daugdaogon nila ang uban.
9Nanamastamas sila sa Dios sa kalangitan
ug mapagarbohong nagmando sa mga tawo dinhi sa kalibotan.
10Tungod niini, bisan ang katawhan sa Dios nagtamod kanila
ug daling motuo sa ilang ipanulti.#73:10 daling…ipanulti: Sa Hebreo, ang katubigan gipahubas nila.
11Miingon sila, “Dili masayod ang Dios;
ang Labing Halangdon dili gayod mahibalo!”
12Ingon niini ang mga daotan.
Kanunay silang hamugaway
ug nagkadaghan pa ang ilang bahandi.
13Busa wala ba diay kapuslanan
ang pagputli ko sa akong kasingkasing,
ug ang pagpaningkamot ko nga dili kabulingan sa sala ang akong mga kamot?
14Gipaantos mo ako, O Dios, sa tibuok adlaw
ug gisilotan mo ako matag buntag.
15Kon nakasulti pa ako niining mga butanga,
nagluib unta ako sa imong katawhan.
16Busa bisan tuod ug lisod kaayo,
gipaninguha ko ang pagsabot niini,
17mao nga miadto ako sa imong Templo, O Dios,
unya nasabtan ra nako kon unsay mahitabo sa mga daotan.
18Imo gayod silang ibutang sa danglog nga mga dapit
ug itugyan mo sila sa hingpit nga kalaglagan!
19Kalit silang mangalaglag
ug modangat kanila ang makalilisang nga kataposan.
20Sama sila sa damgo, O Ginoo, nga mahanaw sa kabuntagon.
Inigmata nimo, malimot ka kon sa unsa sila nahisama.
21Sa dihang gisakitan ako pag-ayo ug nasilo ang akong pagbati,
22wala gayod ako makasabot;
sama ako sa hayop nga walay buot, O Ginoo.
23Apan sa gihapon uban ako kanimo
ug gikuptan mo ang akong tuong kamot.
24Gigiyahan mo ako pinaagi sa imong tambag,
ug sa kataposan dawaton mo ako uban sa kadungganan.
25Kinsa pa may saligan ko diha sa langit kondili ikaw!
Ug wala nay laing tinguhaon ko dinhi sa yuta gawas kanimo.
26Ang akong salabotan ug lawas maluya;
apan ikaw, O Dios mao ang akong kalig-on.
Ikaw lamang ang gikinahanglan ko!
27Kay kadtong mobiya kanimo mamatay gayod
ug laglagon mo sila nga wala magmatinumanon kanimo.
28Apan alang kanako, maayo gayod kaayo nga ako duol kanimo O Dios!
Diha kanimo, O Ginoong Dios, layo ako sa kadaotan.
Isangyaw ko ang tanan nimong nabuhat.
Currently Selected:
Mga Salmo 73: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society
