Genesis 35

Gipanalanginan sa Dios si Jacob didto sa Betel

1Ang#Gen. 28:11-17. Dios miingon kang Jacob, “Pangandam sa pag-adto sa Betel ug adto didto puyo. Paghimog halaran didto alang sa Dios nga mipakita kanimo sa dihang mikagiw ka gikan kang Esau nga imong igsoon.”

2Busa giingnan ni Jacob ang iyang panimalay ug ang tanang kauban niya, “Isalikway ninyo ang inyong dala nga mga diosdios nga langyaw. Hinloi ninyo ang inyong kaugalingon ug pagsul-ob kamog limpyong mga bisti. 3Mamalhin kita ngadto sa Betel ug maghimo ako didtog halaran alang sa Dios nga mitabang kanako sa dihang nagkalisodlisod ako ug nag-uban kanako bisan diin ako.” 4Busa gihatag nila kang Jacob ang tanan nilang mga diosdios lakip ang ilang mga ariyos ug gilubong kini ni Jacob ilalom sa punoan sa usa ka kahoyng tugas duol sa Siquem.

5Sa dihang migikan si Jacob ug ang iyang mga anak, giabot ug dakong kahadlok ang mga molupyo sa mga silingang lungsod busa wala nila gukda sila si Jacob. 6Nahiabot si Jacob ug ang tanan niyang kauban sa Luz o Betel sa yuta sa Canaan. 7Ug didto nagbuhat siyag halaran ug iyang ginganlag El-Betel#35:7 EL-BETEL: nga ang buot ipasabot, Dios sa Betel. ang maong dapit kay didto mipakita man kaniya ang Dios sa pagkagiw niya gikan sa iyang igsoon. 8Unya namatay si Deborah nga yaya ni Rebecca ug gilubong siya ilalom sa tugas ubos sa Betel. Busa ginganlan ang maong dapit ug “Tugas sa Paghilak.”

9Sa paghiuli ni Jacob gikan sa Mesopotamia, ang Dios nagpakita kaniya pag-usab ug gipanalanginan niya si Jacob. 10Miingon#Gen. 32:28. ang Dios kaniya, “Jacob ang imong ngalan apan sukad karon tawgon ka nag Israel.” Busa ginganlan siyag Israel. 11Ug#Gen. 17:4-8. miingon ang Dios kaniya, “Ako ang Dios nga Labing Gamhanan.#35:11 Labing Gamhanan: Sa Hebreo, El Shaddai. Panganak ug daghan. Makabaton kag daghang mga kaliwat ug ang uban kanila mahimong hari. Modaghan sila pag-ayo ug mahimo silang mga nasod. 12Ihatag ko kanimo ang yuta nga gihatag ko kang Abraham ug kang Isaac ug ihatag ko usab kini sa mga kaliwat mo kon patay ka na.” 13Unya mibiya ang Dios kang Jacob sa dapit diin siya nakigsulti kaniya. 14Nag-ugbok#Gen. 28:18-19. si Jacob ug handomanan nga bato didto ug gibuboan niya kinig bino ug lana ingon nga halad. 15Ginganlan niyag Betel ang maong dapit.

Ang Pagkamatay ni Raquel

16Unya mibiya sila sa Betel ug sa layulayo pa sila sa Efrata, nagbati si Raquel ug naglisod sa iyang pagpanganak. 17Sa dihang naglisod na gyod pag-ayo si Raquel sa iyang pagpanganak, miingon kaniya ang mananabang, “Ayaw kahadlok! Lalaki gihapon ang imong anak.” 18Himatyon na si Raquel ug sa dayon nang kabugto sa iyang kinabuhi, ginganlan niyag Ben-oni#35:18 BEN-ONI: Sa Hebreo, nagkahulogan kini ug anak sa akong kasakit. ang bata apan Benjamin#35:18 BENJAMIN: Sa Hebreo, kining ngalana nagkahulogan ug anak nga mahimong palaran. ang gingalan ni Jacob kaniya.

19Namatay si Raquel ug gilubong siya sa dapit paingon sa Efrata nga karon Betlehem na. 20Nag-ugbok si Jacob ug usa ka batong handomanan sa iyang lubong ug kini anaa pa hangtod karon. 21Unya mibalhin si Jacob ug nagkampo siya sa pikas nga bahin sa tore sa Eder.

Ang mga Anak nga Lalaki ni Jacob

(1 Cron. 2:1-2)

22Samtang#Gen. 49:4. nagpuyo si Jacob sa maong dapit, nakighilawas si Ruben kang Bilha, usa sa mga puyopuyo sa iyang amahan. Nakabalita si Jacob niini.#35:22 Ang usa ka karaang sinulat may sumpay nga, ug nasuko siya pag-ayo.

Kini ang 12 ka anak ni Jacob. 23Ang iyang mga anak kang Lea mao sila si Ruben, ang kamagulangan, Simeon, Levi, Juda, Isacar ug si Zabulon. 24Si Jose ug Benjamin mao ang mga anak ni Jacob kang Raquel. 25Ang iyang mga anak kang Bilha nga ulipon ni Raquel mao si Dan ug si Neftali. 26Ug sa kang Zilfa nga ulipon ni Lea mao si Gad ug si Aser. Kini ang mga anak ni Jacob sa didto pa siya sa Mesopotamia.

Ang Pagkamatay ni Isaac

27Miadto#Gen. 13:18. si Jacob sa iyang amahan nga si Isaac didto sa Mamre duol sa Hebron, diin nagpuyo si Abraham ug si Isaac kaniadto. 28Si Isaac nag-edad na ug 180 ka tuig. 29Ug namatay siya nga tigulang na kaayo ug gilubong siya tipon sa iyang katawhan. Ang naglubong kaniya mao ang duha niya ka anak nga si Esau ug si Jacob.

Currently Selected:

Genesis 35: RCPV

Highlight

Copy