Ap 9

1Xitq'ajtza'n tjwe'yi'n anjl tchun, ex wile' jun che'w ku'tz tz'aq twitz kya'j tzmax twitz tx'otx', ex xiq'o'n talja te tu'n tjqetju' jul jaloja t-xelo. 2Jawtjqo'n jul jaloja t-xelo, ex jawtz sib' toj naku'j t-sb'el nin chuj; ex jpet twitzju' q'ij ex kyq'iq' tu'n. 3Tojtzu'n sib' b'je'tza' txqan ẍt'ikt'u'l ex eb'ajx puqli twitz tx'otx'; xiq'o'n kyipumal kse'n kyipumal lakran. 4Xiq'ma'n kye tu'n lalun che yajun ti'j jun cha'x k'ul, mo awal mo jun tze twitz tx'otx', o'kx tu'n kyyajuna' kyi'ju' xjal min tok t-sey Dyos kyplaj. 5Ex min xiq'o'n kye tu'n kykub' kyb'yo'n xjal, naq o'kx tu'n kyok jwe' xjaw toj k'ixk'oj; ex aju' k'ixk'oj tu'n kyoka' kse'n tchib'en lakran.

6Tojtzu'n tq'ijlalil lu kkyqani' xjal kykamik, laytzun che kyim; kyajb'il tu'n kykyim, k'elel oqju' kamik kyi'j.

7Ikyqe'toq ẍt'ikt'u'l kse'n b'anchej b'incha'n kyten te q'oj; tojx jun naku'j q'anpwaq koron toj kywi', naku'j xjal che ka'yin. 8Ati t-xya'mal kywi' kse'n twi' qya, atzu'n kywitzte naku'j twitzte b'alun. 9Ktxu'n kyi'j tu'n jun k'uxb'il q'ojb'il, ikytq'ojq'ojel kyxik'ju' kse'n kyq'ojq'ojel txqan karwaj jwo'n kyu'n chej ajq'ojil. 10Q'i'n kyq'ojb'il te b'iyb'il ti'j kyje, naku'j tje lakran, tu'ntzunju' ati kyipumal tu'n kyk'ixb'san kye xjal toj jwe' xjaw. 11Atzu'n kynejelju' ẍt'ikt'u'l, aju' tajaw jul jaloja t-xelo, Ab'adon tb'i toj eb'rey, atzu'n toj kryek Apolyon.

12Ik'ju' tnejel k'ixk'oj; atixtzun kab'e'tl tu'n tik'.

13Xitq'ajtza'n tqaqi'n anjl tchun, ex nb'iye' etz yolin jun kyxolju' kyaje' tuk'a q'anpwaq q'olb'eb'l atitoq twitz Dyos. 14Atzunju' etz yolin tma teju' tqaqi'n anjl kjalu: Tzaqpinqe'mila kyaje' anjl xwaku'nqe' ttzi nin a' Ewprates, chij. 15Eb'je'ltzun tzaqpi'n kyaje' anjl, b'incha'ntl kyib' tu'n kykub' kyb'yo'n jun toxi'n aq'punju' xjal, toju' kmoj, q'ij, xjaw ex ab'q'i. 16Ex nb'iye' kyajlalju' xjal te q'oj ate'kx kyi'j chej, (200,000,000) kyajlal.

17Ikytzu'n wila'ye' txqan b'anchej toju' tzaj yek'u'n, ex ktxu'ntoq ttzikyk'u'ju' ate'kx kyi'j tu'n jun q'ojb'il kyaq kse'n q'aq', ẍkul kse'n jasint ex q'an kse'n ta'lq'ol. Ex iky kywi' chej kse'n twi' b'alun, ex intoq etz q'aq' toj kytzi kse'n ta'lq'ol. 18E'kyimu' jun toxi'n aq'pun xjal kyu'n oxe' k'ixb'sab'l intoq che etz toj kytziju' b'anchej: aju' q'aq', sib', ex ta'l q'ol. 19Qu'n xi' ta'ya' kyipumalju' b'anchej toj kytzi ex ti'j kyje; iky kyjeju' kse'n kan, ex nche k'ixb'san tu'n kywi'. 20Aye'tzu'n txqantl xjal min e'kyim tu'n k'ixb'sab'l lu, kukx kyb'inchante taq'wixju' kse'n tnejel, ex kukx kyk'ulunju' kye tajaw il ex kye witzleb' q'anpwaq, saqpwaq, q'ank'uxb'il, ab'j ex tze, min nche ka'yin, min nche b'in ex min nb'ent kyb'et. 21Ljo'nx kyb'yon xjal, ljo'nx kyk'a'n, kukx kyb'inchan ajpajilju' ex kukx kyalq'anju'.

Currently Selected:

Ap 9: MAMO

Highlight

Copy