Lc 19

A Jesus tuk'i'l Sakyey

1Okxtzun Jesus toj Jeriko ex xi'toq tik' toju' nintnam. 2Najlitoq jun ichan atzu' Sakyey tb'i, kynejel peyul chojb'il te Rom. 3Tajb'iltoqju' ichan lu tu'n tlonte Jesus, mixtoqtzunti' nb'ent tka'yinte qu'n nimtoq xjal ate' extzun b'o'stoq twe' Sakyey. 4Qu'mtzun kub'nej ojqel, jaw xwe'tzin ti'j jun nin tze sikomoro tb'i nqayin jatu'n tik'a'toq Jesus tu'ntoq tb'ent tka'yinte. 5Tetzunj tik' Jesus atzu', jawx ka'yin jawl ex xitma'n:

—Sakyey, wix kutku'tza, qu'n chin kjele' ja'lo tjaya, chij.

6Lwiyxi'xtzun ku'tz Sakyey ex tk'am Jesus toj tja tuk'i'l tzalajb'il. 7Tetzunj kyka'yinte xjal ja'lu, kykyaqil e'okten yolil ti'j Jesus, intoq kyma'n qa matxitoq tz'okx tu'n tkyaj tja jun aj il. 8Kub'tzun we' Sakyey ex xitma'n te Qajaw:

—Ka'yintzpe'ya Taye, kxe'l nq'o'nwe' nik'jan ti'j tkyaqilju' ati weye' kye prow; qatzun matxi' chinalq'ane' ti'j jun xjal, kxe'l wanjsa'n kyajmaje', chij.

9Xi'tzun tma'n Jesus te:

—Matzulju' kolb'il toju' ja lu ja'lo, qu'n ex tyajajil Ab'raamte' ichan lu. 10Ma chinulwe' ayine' Tk'wal Dyos jyolkye ex klolkyeju' tzpetniqe', chij.

Techlal ti'ju' pwaq

11Intoq che b'in xjal kyi'ju' ntma'n Jesus lu, ex xitma'n jun techlal kye, qu'n ch'inxtltoq tpon Jerusalen, aye'tzu'n xjal intoq kyxima'n qa xi' tponju' kmuj tu'n tul tkawb'il Dyos.

12Xitma'n kye: Atitoq jun ichan nim toklen, xi' najchaq toj juntl tx'otx', tu'n tokq'o'n te nimaqkawil ex tu'n tanjtztlti'j. 13Na'mtoqtzun txi', eb'aj ttxko'n lajoj kyxolju' tmajin, xitq'o'n txqan medi teyile junjun ex xitma'n kye: che aq'unanqe'ye' ti'ju' medi lu tzmax ajwule', chij. 14Ik'o'ntoqtzun kyu'n xjal toju' ttanam, xikylepb'a'n jun q'malte ti'jxi' kjalu: Min qajb'ile' tu'n tokju' ichan lu te qnimaqkawile'.

15Atzunte okq'o'n te nimaqkawil, ex ul jumajtl toju' ttx'otx'. Tetzunj tul, xitchq'o'n kytxokliju' tmajin ojetoq txitq'o'n medi kye, tu'ntoq tb'inte jte' matxitoq kub'ti'j tu'n junjun. 16Ulju' jun nejtl ex tma: Taye, makanb'et lajoj kyintlju' tu'n tmediya, chij. 17Xittzaq'we'n nimaqkawil te: B'a'nxi'x, jun b'a'n aq'unalta; loq'tzun b'a'n sela'ya ti'ju' ch'i'n, k'okyel nq'o'na te kawil kye lajoj tnam, chij. 18Ulju' juntl ex tma: Taye, makanb'et jwe' kyintlju' tu'n tmediya, chij. 19Ex xittzaq'we'n teju' juntl lu: k'okyela te kawil kye jwe' tnam, chij.

20Atzun juntl ul ex tma: Taye, lu tmediya lu. Makub' nk'u'ne' tojun su't; 21machin xob'e' teya, qu'n kuw xjala, intk'mo'n tmediya ja minxa' tq'o'na, ex njaw twitz tawala jamin nxa' tawa'na, chij. 22Xi'tzun tma'n nimaqkawil te: Myab'a'n aq'unala, tu'nxju' tyola k'okyela toj xjel wu'ne'. Qa kanli twitza kuw xjal qine', in nk'mo'ne' medi jamin nxa'nq'o'ne', ex njaw twitz wawale' jamin nxa' wawa'ne', 23¿tiqu'n min sokx tq'o'na nmediye' toj b'ank, ma'wtlo tzaj tq'o'ntla weye' tk'ixi' tub'chil tej ẍin ule' njaye'? chij. 24Ex xitma'n kyeju' ate'toq atzu': Kyiq'imile' medi te ex kyq'onxe' teju' xkanb'et lajoj kyintlju' tu'n, chij. 25Aye'tzunkye xikyma'n te: Taye, ¡qana' atitl lajoj kyintlju' toj tq'ob'! chechij. 26Xittzaq'we'n nimaqkawil kye: Kxe'l nma'ne' kyeye', alkye ati txqan te, kxel q'et txqantl; atzunte' mixti' te, okpe' k'elel iq'etju' ch'i'n ati te. 27Aye'tzunkye' wajq'oje min kyajb'iltoq tu'n woke' te nimaqkawil, che kyiq'inqe'tze' tzala ex kyb'yonqeku'ye' nwitzku'ye', chij, chi Jesus.

Okx Jesus toj Jerusalen

(Mt 21.1-11; Mc 11.1-11; Jn 12.12-19)

28Tb'ajlenxi'tzun tma'n Jesus ja'lu, xitljo'n tb'e tu'n tpon Jerusalen. 29Tej tpon nqayin B'etpaje ex B'etanya, t-xe witz Olib'o, exi' tchq'o'n kab'e' t-xnaq'tzb'en, 30xitma'n kye:

—Kukyxi'ye' toju' kojb'il na'mx qpon toj, ajtzun kypone' k'okyel yal jun b'ur kyu'ne' yo'l atzu', mixa'lo'xi' jun xjal jaw ti'j. Kypjumile' ex kyiq'intze'. 31Qatzun ati jun saj qaninte kyeye' tiqu'n nela' kypju'ne', kymanxe' qa k'ajb'el te Qajaw.

32Exi'tzu'n xnaq'tzb'en ex okyal kyu'n se'nxju' xitma'n Jesus kye. 33Intoqtzun elkypju'n b'ur, xiqani'n kye kyu'n tajaw:

—¿Tiqu'n nela' kypju'ne'? chechij.

34Xi'tzun kytzaq'we'n:

—In nojqelan tu'n tajb'en te Qajaw, chechij.

35Jaxtzun kyq'o'n kyxb'alun tib'aju' b'ur, xikyiq'i'n te Jesus ex jaw kyq'o'n Jesus ti'j. 36In b'et-xi' Jesus, intoq kub' kyq'o'n xjal kxb'alun toju' b'e. 37Tetzunj kypon lq'e t-xe witz Olib'o, kykyaqilju' lepchqe'k ti'j e'aq'wi ẍch'il tu'n kytzalajb'il ex njaw kyajwali'n Dyos tu'n tkyaqilju' b'a'nq'ob'aj matxitoq kyil. 38Intoq kyma'n:

—¡K'i'wla'nte' Nimaqkawil tzul toj tb'i Qman Dyos! ¡Nak'b'ilxwit toj kya'j ex ajwalilxwit! chechij.

39Xi'tzun kyma'n junjun parisey ate'toq kyxol xjal te Jesus:

—Xnaq'tzal, tzak'unqe'xa t-xnaq'tzb'ena, chechij.

40Atzunte Jesus xittzaq'we'n kye:

—Kxe'l nma'ne' kyeye', qa min ẍeẍch'inju' xjal lu, che ẍch'ilju' ab'j, chij.

41Tetzunj tpon nqayin tk'etz Jerusalen, tej tka'yinte nintnam, jaw oq' Jesus ti'j, 42tma: ¡Naqwit ikx makane toj twitza ja'lo aju' kb'antel tq'onte nak'b'il teya! atzun ja'lo qajlo e'wa'n te'lu teya ex lay b'ent tka'yinteya. 43Tzul q'ij te k'ixk'oj teya, ajtjaw kyb'incha'n tajq'oja maqb'il ti'jileya, k'okyel kytxoli'n kyib' ti'ja ex che okyel tzaqpaj q'ojil ti'ja toj tkyaqil plaj, 44ex majx kb'el xitu'na kyu'n. Che kb'el kyb'yo'n xjal najlqe' toja, ex mixti'tl jun ab'j kjel tib'aj juntl ab'j toja, qu'n min sel tnik'a toju' kmuj sul Dyos ka'yilteya, chi Jesus.

Tẍstilsa Jesus tja Dyos

(Mt 21.12-17; Mc 11.15-19; Jn 2.13-22)

45Yajxi'tzuntl, okx Jesus toju' tja Dyos ex aq'wi xla'jalmixkyeju' intoq che k'ayin toj, 46xitma'n kye:

—Intma'nte' kyoj Tu'jil kjalu: Ja te na'j Dyos k'okyela'te' njaye', aye'tzunkye' matxi' tz'ok kyq'o'ne' te kjul eleq', chij.

47Intoq q'on xnaq'tzb'il Jesus tkyaqil q'ij toju' tja Dyos, aye'tzu'n kynejel pale, e'xnaq'tzal kawb'il exqe' nejenel toju' tnam intoq kyjyo'n tu'me'l se'n tu'n tkub'a' kyb'yo'n. 48Mixtoqtzunti' nknet tu'me'l kyu'n, qu'n kykyaqil xjal inxi'xtoq kub' t-xnaq'tzb'il Jesus toj kywitz.

Currently Selected:

Lc 19: MAMO

Highlight

Copy