Lc 18
18
Techlal tiju' qya kyimni tchmil exju' ajkawil
1Xitma'n Jesus jun techlal kye tu'n txi' t-xnaq'tza'n qa ati tu'n kna'n Dyos kukxju' ex lay tz'anjtz tikk'u'j. 2Xitma'n kye: Atitoq jun ajkawil tojun tnam mixti'x nxob' te Dyos ex mixti'x kyoklen xjal te. 3Ex atitoq jun qya kyimni tchmil tojxju' tnam lu, atitoq q'oj ti'j, pon twitz ajkawil qanilte tu'n tb'inchanjtz tnik'alilti'j ti'ju' tajq'oj. 4Mixtzunti'x xitb'i'n ajkawil tqanb'etzju' qya toj b'a'npun q'ij, yajxi'tzuntl kub' t-xima'n: Maskye min nchin xob'e' te Dyos ex mixti' kyoklen xjal weye', 5kukxna' tul qya lu, oknkla'ye' tu'ntzun lalun tzultl, qu'n jaku' min wajb'iltle' tu'n tok nka'yi'ne' ajtutl, chij.
6Xitma'ntl Qajaw: A tma taq'wix ajkawil ja'lu. 7Ja'lotzun, ¿Mlaytzun che tkol Dyosju' sk'o'nqe' tu'n, nche kub'san te q'ijtl ex q'onik'an? ¿ma yajtzunlo che tzajel ttzaq'we'n? 8Lwiyxi'x che tzajel tklo'n. Ajtzun wule' ayine' Tk'wal Dyos, ¿Atixtoqtzunlo okslab'l twitz tx'otx'? chi Jesus.
Techlal ti'j parisey ex ti'j peyul chojb'il te Rom
9Xitma'n Jesus juntl techlal kye junjun, b'a'n kten toj kwitz tu'n nok kq'o'n kyib' qa tnik'alkyi'j, nche elkyik'o'n txqantl: 10Exi' kab'e' ichan na'l Dyos toj tja Dyos: pariseyu' jun, atzu'n juntl jun peyul chojb'il te Rom. 11Kub' we' parisey, na'n Dyos kjalu: Dyos, kxe'l nq'o'ne' chjonte teya qu'n mikxa'qine' se'nqe' txqantl, eleq' qe', b'inchal myab'a'n ex ajpajilqe', ex mikxa'qine' se'n peyul chojb'il te Rom lu. 12Kamaj nchin mewayine' toj sman ex nxinq'o'ne' tlajoji'n tnej ti'j tkyaqilju' nkanb'a'ne', chij. 13Atzunte' peyul chojb'il te Rom kyejten najchaqinin, mixpeti'x jaw ka'yin twitz kya'j, inpe' oktjuma'n ttzitk'u'j ex intoq tma'n: ¡Dyos, q'aq'antz tk'u'ja wi'je', aj ilqinwe'!, chij. 14Kxe'l nma'ne' kyeye', apete' peyul chojb'il te Rom lu tnik'alte ti'j tej tanj tja, atzunte' parisey mya. Qu'n aju' ax njaw nimantetib', kb'el me'ssa'n; atzu'n nkub' tme'ssa'ntib', kjawil nima'n, chi Jesus.
E'kub' tky'i'wla'n Jesus k'wal
(Mt 19.13-15; Mc 10.13-16)
15Ex eb'aj pon q'i'n tal k'wal tk'etz Jesus tu'n kyok tmko'n; tetzunj tok kyka'yi'n t-xnaq'tzb'en, e'okten myolkyeju' nche tzaj q'inkye k'wal. 16Exi'tzun ttxko'n Jesus ex xitma'n kye:
—Chetzajku' k'walj nk'etze', lalun che oktene' myolkye, qu'n ate' tkawb'il Dyos kyeju' nche ok se'nqe' tal k'wal. 17Axxi'x kxe'l nma'ne' kyeye', alkye min xtk'amu' tkawb'il Dyos kse'n jun tal k'wal, lay tz'ok toj, chi Jesus.
Yolin jun ichan q'inun tuk'i'l Jesus
(Mt 19.16-30; Mc 10.17-31)
18Xit-xjelu'n junju' nejenel te Jesus kjalu:
—B'a'n Xnaq'tzal, ¿titi' tu'n nb'inchanteye' tu'n nkanb'anteye' chwinqlal tejumajx? chij.
19Xi'tzun ttzaq'we'n Jesus te:
—¿Tiqu'n nchin oka' tq'o'na te b'a'n? Mix-a'lo'te b'a'n, o'kxte Dyos b'a'n. 20Tojtzqi'ntlqe'tl teju'ya chaq'b'il: Lalun tz'ajpajina, lalun b'yonxjala, lalun tz'alq'ana, lalun tziyana toj chajyolil, ex nimanktza tmana ex ttxuya, chi Jesus.
21Xitzun tma'n ichan te:
—Tkyaqil ja'lu nche japun wu'ne' ntzajlenxe' toj nku'xumale', chij.
22Tej tb'inte Jesus ja'lu, xittzaq'we'n:
—Atix juntl ti'xti' tu'n tb'inchanteya: k'ayinxa tkyaqilju' ati teya ex q'onxa kye prow. Ktenb'eltzun tq'inumaltza toj kya'j. Kuttzaj tzuntza ex lpeka wi'je', chij.
23Tetzunj tb'inte ichan ja'lu, jaw b'isun b'a'nxi'x, qu'n nimaq q'inuntoq. 24Tej tka'yinte Jesus ikju'na'j, tma:
—¡Ch'uẍ tu'n kyokju' q'inun toj tkawb'il Dyos! 25Lwiyxi'x jaku' tz'ex jun chej kamey toj t-xopajil jun b'aq, kyetwitz jun q'inun tu'n tok toj tkawb'il Dyos, chij.
26Aye'tzu'n eb'inte xikyqani'n te:
—¿Alkyetzun kb'antel tklet? chechij.
27Xittzaq'we'n Jesus kye:
—Aju' layx b'ent toj kywitz xjal kb'entel tu'n Dyos, chij.
28Xitma'n Luch te:
—Taye, mab'ajkyaj qq'o'nqe' tkyaqil ti'xti' qeye' ex maqo oklpeye' ti'ja, chij.
29Xittzaq'we'n kye:
—Axxi'x, alkyexku' makyej tq'o'n tja, t-xu'jil, ttzik mo titz'in, tman mo tk'wal, naq tu'n tpaju' tkawb'il Dyos, 30nimxi'xtl oktk'ma' toju' tchwinqlal ja'lo, ex ktk'ma' chwinqlal tejumajx toju' chwinqlal tzul.
Xitma'n Jesus tqanil tkamik toxmaji'n
(Mt 20.17-19; Mc 10.32-34)
31Exittxko'n Jesus kab'lajoj t-xnaq'tzb'en oqe'kxkye ex xitma'n kye: Maqo'x ja'lo Jerusalen, jakjapumela' tkyaqilju' tz'ib'a'n kyu'n t-sanjelal Dyos wi'je' ayine' Tk'wal Dyos. 32Chin xel q'o'ne' toj kyq'ob' najchaq xjal, ex che xmayil wi'je', chin okyel kyili'ne' ex k'okyel kytzub'a'n wi'je'. 33Chin b'ajel kyjuma'ne' ex chin b'el kyb'yo'ne'; tojtzun toxi'n q'ij chin jawil anq'ine', chij.
34Mixti'x kane ja'lu toj kywitz, ex mixtoqti' b'i'n kyu'n titi' tz'elpuna', qu'n mixtoqti'x tu'me'l tu'n tkane toj kywitz.
Tq'a'na Jesus jun moẍ toj Jeriko
(Mt 20.29-34; Mc 10.46-52)
35Tej atitltoq Jesus nqayin Jeriko, atitoq jun moẍ q'uqli ttzi b'e ex intoq mon, 36tej tb'inte nimtoq xjal nche ik', xitqani'n ti'toqju' nb'aj. 37Xikyma'n xjal te qa atoq Jesus aj Nasaret ljo'n tik' atzu', 38xi'tzun ẍch'in te:
—¡Jesus, Tk'wal Dab'i, q'aq'antz tk'u'ja wi'je'! chij.
39Aye'tzu'n xjal nejlqe' intoq xikymyo'n tu'ntoq lalun ẍch'in, atzunte jaw ẍch'inxi'xtl:
—¡Tk'wal Dab'i, q'aq'antz tk'u'ja wi'je'! chij.
40Atzunte Jesus kub' we' ex xitma'n tu'n ttzaj q'i'n tk'etz. Tetzunj atitltoq nqaku' tk'etz, xitqani'n Jesus te:
41¿Titi' tajb'ila tu'n nb'inchanteye' ti'ja? chij.
Xittzaq'we'n moẍ te:
Taye, wajb'ile' tu'n nka'yine', chij.
42Xi'tzun tma'n Jesus te:
—¡Ka'yina! tu'n tokslab'la xq'aneta'ya, chij.
43Textzu'n kmoj lu ka'yinju' moẍ, ex xilpe ti'j Jesus intoq jaw tajwali'n Dyos. Ex kykyaqilju' xjal e'lonteju' lu, intoq jawkyajwali'n Dyos.
Currently Selected:
Lc 18: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
